Buska den Beibel

Proverbionan 25; Proverbionan 26 BSNP Edita

Proverbionan 25

25:1 Esakinan tambe ta proverbionan di Salomon, ku e hendenan di Ezekias, rei di Juda, a kopia.

25:2 Ta e gloria di Dios pa skonde un asunto, ma e gloria di reinan ta pa skudriñá un asunto.

25:3 Meskos ku e shelunan ta haltu, i tera ta profundo, asina e kurason di reinan ta inskudriñabel.

25:4 Kita e skuma for di e plata, anto lo sali un artíkulo-di-uzo pa e platé.

25:5 Kita e malbado for di e presensia di rei, i su trono lo wòrdu stablesí den hustisia.

25:6 No halsa bo mes den e presensia di rei, i no para den e lugá di e grandinan.

25:7 Pasobra ta mihó pa nan bisabo: "Subi bin aki riba," ku pa nan umiyábo den presensia di prens, kende bo wowo a mira.

25:8 No sea purá pa pleita bo kaso; pasobra kiko lo bo hasi na final, ora bo próhimo ponebo na bèrguensa?

25:9 Pleita bo kaso ku bo próhimo, i no revelá sekreto di un otro,

25:10 pa esun ku tende esaki no ponebo na bèrguensa, i bo reputashon keda ruiná.

25:11 Un palabra papiá na ora apropiá ta manera un apel di oro den montura di plata.

25:12 Manera un rench'i orea di oro i un adorno di oro fini, asina ta un reprendedó sabí pa un orea ku ta skucha.

25:13 Manera friu di sneu den tempu di kosecha, asina ta un mensahero fiel pa esnan ku ta mand'é, pasobra e ta refreská alma di su shonnan.

25:14 Manera nubia i bientu sin awaseru, asina ta un hende ku ta gaba regalo ku e no a duna.

25:15 Ku hopi pasenshi un gobernante por wòrdu pèrsuadí, i un lenga suave ta kibra wesu.

25:16 Bo a haña miel? Kome solamente loke bo mester, pa bo no yena di mas i sak'é bèk.

25:17 No pone pia den kas di bo próhimo ku muchu frekuensia, pa e no fada di bo i odiabo.

25:18 Manera un klòp, un spada i un flecha skèrpi, asina ta un hende ku ta duna testimonio falsu kontra su próhimo.

25:19 Konfiansa den un hende infiel den tempu di angustia ta manera un djente putrí i un pia saká for di lugá.

25:20 Manera un hende ku ta kita su paña riba un dia ku ta hasi friu, i manera binager riba soda, ta esun ku ta kanta kantika pa un kurason tristu.

25:21 Si bo enemigu tin hamber, dun'é pan pa kome, i si e tin set, dun'é awa pa bebe;

25:22 pasobra asina lo bo montoná karbon sendí riba su kabes, i SEÑOR lo rekompensábo.

25:23 Bientu di nòrt ta trese awaseru, i lenga ku ta kalumniá ta trese kara rabiá.

25:24 Mihó biba den un skina riba dak, ku biba den un kas huntu ku un muhé pleitadó.

25:25 Manera awa friu pa un alma ku tin set, asina ta bon notisia for di un tera leu.

25:26 Manera un fuente trublá i un pos kontaminá, asina ta un hende hustu ku ta kai dilanti di e malbado.

25:27 No ta bon pa kome hopi miel; tampoko no ta onorabel pa buska bo mes onor.

25:28 Esun ku no tin dominio riba su spiritu ta manera un stat bashá abou, sin muraya.

Proverbionan 26

26:1 Meskos ku sneu no ta pas pa zomer i awaseru no ta pas pa tempu di kosecha, asina onor no ta pas pa un bobo.

26:2 Manera un mòfi ta zwef, manera zwarchi ta bula rònt, asina un maldishon sin motibu no ta alkansá su meta.

26:3 Un zwip ta pa kabai, un bosal pa buriku, i un bara pa lomba di hende bobo.

26:4 No kontestá un bobo segun su bobedat, pa bo tambe no bira meskos kuné.

26:5 Kontestá un bobo manera su bobedat ta meresé, pa e no kere su mes sabí.

26:6 Esun ku manda un mensahe pa medio di un bobo ta kòrta su mes pia afó i ta bebe violensia.

26:7 Manera pia di un hende lam ta kologá slap, asina ta un proverbio den boka di bobonan.

26:8 Manera un ku ta mara piedra den un slenger, asina ta esun ku ta duna onor na un bobo.

26:9 Manera un sumpiña den man di un buraché, asina ta un proverbio den boka di bobonan.

26:10 Manera un tiradó di flecha ku ta heridá tur hende, asina ta esun ku ta kontratá un bobo òf kualkier hende ku ta pasa.

26:11 Manera un kachó ta bolbe na loke ku el a saka, asina un bobo ta ripití su bobedat.

26:12 Bo ta mira un hende ku ta kere su mes sabí? Tin mas speransa pa un bobo ku pa e hende ei.

26:13 E floho ta bisa: "Tin un leon riba kaminda! Tin un leon den kaya!"

26:14 Manera porta ta drai riba su skarnirnan, asina e floho ta drai riba su kama.

26:15 Un floho ta hinka su man den tayó, ma ta muchu kansansio p'é pa hib'é bèk na su boka.

26:16 E floho ta kere su mes mas sabí ku shete hende ku por kontestá ku prudensia.

26:17 Esun ku pasa entremeté su mes den pleitu di otro ta manera un hende ku ta kohe un kachó na su orea.

26:18 Manera un hende loko ku ta tira flambeu, flecha i morto,

26:19 asina ta e hende ku ta gaña su próhimo, i ta bisa: "Ai ta chansa mi ta chansa!"

26:20 Pa falta di palu, kandela ta paga, i kaminda no tin hasidó di redu, pleitu ta stòp.

26:21 Manera karbon ta pa karbon sendí, i palu pa kandela, asina un hende pleitadó ta pa forma pleitu.

26:22 E palabranan di un hasidó di redu ta manera kuminda di boka dushi, i nan ta baha bai den e partinan di mas paden di hende.

26:23 Manera un artíkulo di klei, pasá den skuma di plata, asina ta lepnan ferviente i un mal kurason.

26:24 Esun ku ta odia ta disimulá esei ku su lepnan, ma den su kurason e ta montoná engaño.

26:25 Ora ku e papia kariñoso asina, no ker'é, pasobra tin shete abominashon den su kurason.

26:26 Maske su odio ta purba di tapa su mes ku engaño, su maldat lo wòrdu revelá dilanti di e asamblea.

26:27 Esun ku koba un pos lo kai aden, i esun ku bòlter un piedra, e piedra lo lora bin bèk riba djé.

26:28 Un lenga mentiroso ta odia esnan ku e ta lastimá, i un boka ku ta labia ta obra ruina.