Buska den Beibel

Marko 4; Marko 5 BSNP Edita

Marko 4

4:1 I atrobe El a kuminsá siña hende kantu di laman. I a reuní asina un multitut grandi Su dilanti, ku El a bai den un boto ku tabata riba laman i a sinta den djé; i henter e multitut tabata riba tera kantu di laman.

4:2 I E tabata siña nan hopi kos pa medio di parábola, i tabata bisa nan den Su siñansa:

4:3 "Skucha esaki! Mira, e sembradó a sali pa sembra;

4:4 i a sosodé ku segun ku e tabata sembra, un parti a kai kantu di kaminda, i e parhanan a bin i a kom'é.

4:5 I otro parti a kai den lugá yen di piedra, kaminda no tabatin muchu tera; i mesora el a nase, pasobra e tera no tabata hundu.

4:6 I despues ku solo a sali, el a kima; i pasobra e no tabatin rais, el a seka.

4:7 I otro parti a kai meimei di mata di sumpiña, i e matanan di sumpiña a krese i a hogu'é, i e no a duna kosecha.

4:8 I otronan a kai den bon tera, i segun ku nan tabata krese i bona nan tabata duna kosecha i tabata produsí trinta, sesenta i shen bes mas tantu."

4:9 I El a bisa: "Esun ku tin orea pa tende, lagu'é tende."

4:10 I ora ku E tabata Su so, Su siguidónan, huntu ku e diesdosnan, a kuminsá puntr'E tokante di e parábolanan.

4:11 I El a bisa nan: "Na boso a wòrdu duná e misterio di e reino di Dios; ma esnan ku ta pafó ta haña tur kos den parábola,

4:12 asina ku 'mirando nan ta mira i no ta ripará, i tendiendo nan ta tende i no ta komprendé, pa nan no kombèrtí i wòrdu pordoná.'"

4:13 I El a bisa nan: "Boso no ta komprendé e parábola aki? I kon anto boso lo komprendé tur e parábolanan?

4:14 E sembradó ta sembra e palabra.

4:15 I esakinan ta esnan ku ta kantu di kaminda, unda e palabra a wòrdu sembrá; i ora nan tende esaki, Satanás ta bin mesora i ta kita e palabra ku a wòrdu sembrá den nan.

4:16 I di e mesun manera esakinan ta esnan ku simia a wòrdu sembrá riba nan den lugánan yen di piedra, kendenan, ora nan tende e palabra, mesora ta risibié ku goso;

4:17 i nan no tin rais den nan mes, ma ta temporario; i ora surgi aflikshon òf pèrsekushon pa kousa di e palabra, mesora nan ta trompeká.

4:18 I e otronan ta esnan ku simia a wòrdu sembrá riba nan meimei di e matanan di sumpiña; esakinan ta esnan ku a tende e palabra,

4:19 i e preokupashonnan di mundu, i e engaño di rikesa, i e deseonan pa otro kosnan ta drenta i ta hoga e palabra, i e ta keda sin duna fruta.

4:20 I eseinan ta esnan ku a wòrdu sembrá den bon tera; i nan ta tende e palabra, ta asept'é i ta duna fruta: algun trinta, algun sesenta i algun shen bes mas tantu."

4:21 I El a bisa nan: "Hende no ta trese un lampi pa wòrdu poní bou di un kaha di midi trigo òf bou di kama, no t'asina? No ta pa pone riba un kandelá e ta?

4:22 Pasobra no tin nada skondí ku lo no wòrdu revelá, ni nada no a keda tení sekreto ku lo no sali na kla.

4:23 Si un hende tin orea pa tende, lagu'é tende."

4:24 I El a bisa nan: "Mira bon kiko boso ta skucha. Ku e mesun midí ku boso midi kuné, lo wòrdu midí pa boso, i mas ainda lo wòrdu duná na boso.

4:25 Pasobra esun ku tin, mas lo wòrdu duná na djé; i esun ku no tin, asta loke e tin lo wòrdu kitá for di djé."

4:26 I El a bisa: "E reino di Dios ta manera un hòmber ku ta stroi simia riba tera;

4:27 i anochi e ta bai drumi i di dia e ta lanta, i e simia ta nase i ta krese, di ki manera e mes no sa.

4:28 Tera ta produsí fruta di su mes; promé e yerba, despues e tapushi, despues e pipitanan yen asina den e tapushi.

4:29 Ma ora ku e fruta ta hechu, mesora e ta pasa machete den djé, pasobra tempu di kosecha a yega."

4:30 I El a bisa: "Ku kiko nos lo kompará e reino di Dios, òf ku kual parábola nos lo present'é?

4:31 E ta manera un simia di mòster ku, ora ku e wòrdu sembrá den tera, ta mas chikitu ku tur otro simia ku tin riba tera,

4:32 ma despues ku el a wòrdu sembrá, ta krese i ta bira mas grandi ku tur e matanan di hòfi, i ta saka ramanan grandi, asina ku e parhanan di shelu por traha neishi den su sombra."

G2532 -- ma -> yet
G3752 -- ku -> when
G4687 -- el a wòrdu sembrá -> it is sown
G305 -- ta krese -> it grows
G1096 -- ta bira -> up and becomes
G3173 -- mas grandi -> larger
G3956 -- ku tur -> than all
G3001 -- matanan di hòfi -> the garden
G3001 -- matanan di hòfi -> plants
G4160 -- ta saka -> and forms
G2798 -- ramanan -> branches
G3173 -- grandi -> large
G5620 -- asina -> so
G4071 -- ku -> G4071
G3772 -- e -> G3772
G1410 -- por -> can
G2681 -- traha -> G2681
G5259 -- neishi -> G5259
G4639 -- sombra -> G4639

4:33 I ku hopi parábola similar E tabata papia e palabra ku nan, segun ku nan por a tende esaki;

4:34 i E no a papia ku nan sin uza parábola, ma E tabata splika tur kos na Su disipelnan ora nan tabata nan so.

4:35 I riba e mesun dia ei, ora ku a bira tardi, El a bisa nan: "Laga nos krusa bai na e otro banda."

4:36 I lagando e multitut atras nan a hib'E huntu ku nan, manera E tabata, den e boto; i tabatin otro botonan huntu kunE.

4:37 I a lanta un tempestat di bientu fuerte, i e olanan tabata dal den e boto, di tal manera ku ya e boto a kuminsá yena.

4:38 I E tabata na soño riba e kusinchi patras den e boto; i nan a lant'E i a bis'E: "Maestro, no ta importáBo ku nos ta peresé?"

4:39 I ora ku El a lanta, El a reprendé e bientu i a bisa e laman: "Silensio, keda ketu!" I e bientu a kai i a bira kompletamente kalmo.

4:40 I El a bisa nan: "Pakiko boso tin miedu asina? Di kon boso no tin fe?"

4:41 I nan a haña masha hopi miedu i un a bisa otro: "Ta ken esaki ta anto, ku asta bientu i laman ta obedes'E?"

Marko 5

5:1 I nan a yega na e otro banda di laman, na tera di e gadarenonan.

5:2 I ora ku El a sali for di e boto, mesora un hòmber ku un spiritu impuru a sali for di e tumbanan bin kontr'E,

5:3 i su lugá di biba tabata meimei di e tumbanan. I ni un hende no tabata por a mar'é mas, ni ku kadena,

5:4 pasobra hopi biaha e tabata wòrdu mará ku bui i kadena, i e tabata ranka e kadenanan kibra, i tabata kibra e buinan na pida-pida; i ni un hende no tabatin sufisiente forsa pa domin'é.

5:5 I konstantemente, di dia i anochi, e tabata grita meimei di e tumbanan i den e serunan i tabata gòlpia su kurpa kòrt'é ku piedra.

5:6 I ora ku el a mira Jesus djaleu, el a kore bin i a bùig te na suela Su dilanti;

5:7 i gritando na bos haltu, el a bisa: "Kiko mi tin di hasi ku Bo, Jesus, Yu di e Dios Haltísimo? Mi ta rogaBo pa Dios, no tormentámi!"

5:8 Pasobra Jesus tabata bis'é: "Abo, spiritu impuru, sali for di e hòmber aki!"

5:9 I El a puntr'é: "Kon bo nòmber ta?" I el a kontest'E: "Mi nòmber ta Legion; pasobra nos ta hopi."

5:10 I el a kuminsá rogu'E masha hopi mes pa no manda nan bai for di e region ei.

5:11 Awor aya na barika di e seru tabatin un trupa grandi di porko ta kome.

5:12 I e demoñonan a rogu'E, bisando: "Manda nos den e porkonan, pa nos drenta den nan."

5:13 I El a pèrmití nan. I ora ku e spiritunan impuru a sali, nan a drenta den e porkonan; i e trupa di porko a basha na kareda for di e bahada steil bai den laman, mas o menos dos mil; i nan a hoga den laman.

5:14 I e kuidadónan di porko a kore bai i a konta esaki den stat i den kampo. I e hendenan a bin mira kiko a pasa.

5:15 I nan a bin serka Jesus i a mira e hòmber ku tabata poseí pa demoño, sintá abou, bistí i bon na su tino, e mesun hòmber ku tabatin e legion; i nan a haña miedu.

5:16 I esnan ku a mira esaki a konta nan kon e kos a sosodé ku e hòmber poseí pa demoño, i tambe di e porkonan.

5:17 I nan a kuminsá rogu'E pa bai for di nan region.

5:18 I ora ku E tabata bai den e boto, e hòmber ku tabata poseí pa demoño tabata rogu'E pa e por a kompañ'E.

5:19 Sinembargo, Jesus no a pèrmitié, ma El a bis'é: "Bai bo kas serka bo hendenan i konta nan ki kosnan grandi Señor a hasi pa bo, i kon El a tene miserikòrdia di bo."

5:20 I el a bai i a kuminsá proklamá den Dekápolis ki kosnan grandi Jesus a hasi p'é; i tur hende a keda strañá.

5:21 I ora Jesus a krusa atrobe den boto bai na e otro banda, un multitut grandi a reuní rònt di djE; i El a keda kantu di laman.

5:22 I un di e ofisialnan di snoa, ku yama Jairo, a bin, i ora ku el a mira Jesus, el a tira su kurpa abou na Su pia,

5:23 i a rogu'E masha hopi mes, bisando: "Mi yu muhé chikitu ta serka di muri; pa fabor, bin i pone Bo mannan riba djé, pa e por bira bon i biba."

5:24 I El a bai kuné. Un multitut grandi tabata siguiE i tabata push'E di tur banda.

5:25 I un muhé ku diesdos aña largu tabatin un derama di sanger,

5:26 i ku a sufri mashá na man di hopi dòkter, i ku a gasta tur loke e tabatin sin ku el a wòrdu yudá, ma mas bien a bira pió,

5:27 ora ku el a tende tokante di Jesus, a aserk'E den e multitut ku tabata Su tras i a mishi ku Su mantel.

5:28 Pasobra el a bisa: "Si mi djis mishi ku Su paña, lo mi bira bon."

5:29 I mesora su derama di sanger a stòp; i el a sinti den su kurpa ku el a kura di su aflikshon.

5:30 I mesora Jesus, Kende a sinti den Su Mes ku poder a sali for di djE, a bira wak den e multitut i a bisa: "Ta ken a mishi ku Mi paña?"

5:31 I Su disipelnan a bis'E: "Bo ta mira e multitut ta pusha bin riba Bo, i Bo ta bisa: 'Ta ken a mishi ku Mi?'"

5:32 I El a wak rònt pa mira ta ken a hasi esaki.

5:33 Ma e muhé, tur spantá i na temblamentu, sabiendo kiko a sosodé kuné, a bin i a tira su kurpa abou Su dilanti, i a kont'E tur e bèrdat.

5:34 I El a bis'é: "Mi yu, bo fe a salbabo; bai na pas i sea kurá di bo aflikshon."

5:35 Mientras ku E tabata papia ainda, a bin hende for di kas di e ofisial di snoa, bisando: "Bo yu muhé a muri; pakiko sigui molestiá e Maestro?"

5:36 Ma Jesus, Kende a tende loke a wòrdu papiá, a bisa e ofisial di snoa: "No tene miedu, kere solamente."

5:37 I E no a pèrmití ni un hende bai kunE, solamente Pedro i Santiago i Juan, ruman di Santiago.

5:38 I nan a yega na kas di e ofisial di snoa, i El a mira e desòrdu i hende ta grita yora i lamentá.

5:39 I ora ku El a drenta paden, El a bisa nan: "Pakiko hasi beheit asina i yora? E mucha no a muri, ma ta na soño e ta."

5:40 I nan a hariE. Ma El a saka nan tur afó, i a hiba e tata i e mama di e mucha i esnan ku tabata huntu kunE, i a bai den e kamber kaminda e mucha tabata.

5:41 I El a kohe e mucha na su man i a bis'é: "Talita kum!" (loke tradusí kier men: "Mucha, Mi ta bisabo, lanta!")

5:42 I mesora e mucha muhé a lanta i a kuminsá kana; pasobra e tabatin diesdos aña. I nan a keda masha asombrá mes.

5:43 I El a ordená nan striktamente pa no laga ningun hende sa di esaki; i El a bisa pa dun'é algu di kome.