Buska den Beibel

Proverbionan 4; Proverbionan 5; Proverbionan 6 BSNP Edita

Proverbionan 4

4:1 Mi yunan, tende instrukshon di un tata, i paga atenshon pa boso haña komprendementu;

4:2 pasobra mi a duna boso siñansa sano; no bandoná mi instrukshon.

4:3 Tempu ku mi tabata un yu pa mi tata, delikado i e úniko yu hòmber den bista di mi mama,

4:4 el a siñami i a bisami: "Laga bo kurason tene duru na mi palabranan; warda mi mandamentunan i biba.

4:5 Atkirí sabiduria! Atkirí komprendementu! No lubidá mi palabranan, ni desviá for di nan.

4:6 No bandoná sabiduria, i é lo wardabo; stim'é, i é lo kuidabo.

4:7 E prinsipio di sabiduria ta: Atkirí sabiduria; i riba tur kos, atkirí komprendementu;

4:8 hals'é, i é lo halsabo; é lo onrabo si bo bras'é.

4:9 E lo pone un adorno di grasia riba bo kabes; é lo regalábo un korona di gloria."

4:10 Tende, mi yu, i aseptá mi palabranan, i e añanan di bo bida lo ta hopi.

4:11 Mi a dirigíbo den e kaminda di sabiduria; mi a guiabo den e berehanan di rektitut.

4:12 Ora bo kana, bo pasonan lo no wòrdu strobá; i si bo kore, lo bo no trompeká.

4:13 Gara instrukshon; no lagu'é bai. Kuid'é, pasobra e ta bo bida.

4:14 No pasa riba e bereha di e malbadonan, i no subi e kaminda di hòmbernan malbado.

4:15 Evitá esei, no pasa riba djé; hala leu for di djé i sigui bo kaminda.

4:16 Pasobra nan no por drumi si nan no a hasi maldat; i nan soño ta wòrdu kitá for di nan, ora ku nan no por hasi un hende trompeká.

4:17 Pasobra nan ta kome e pan di maldat, i ta bebe e biña di violensia.

4:18 Ma e bereha di e hustu ta manera lus di ourora, ku ta briya mas i mas te ora ku bira di dia kla.

4:19 Kaminda di e malbado ta manera skuridat; nan no sa riba kiko nan ta trompeká.

4:20 Mi yu, paga atenshon na mi palabranan; inkliná bo orea na loke mi ta bisa.

4:21 No laga nan kita for di bo bista; warda nan den bo kurason.

4:22 Pasobra nan ta bida pa esnan ku haña nan, i salú pa henter nan kurpa.

4:23 Warda bo kurason riba tur kos, pasobra e ta e fuente di bida.

4:24 Kita for di bo un boka engañoso, i tene lepnan pèrvèrso leu for di bo.

4:25 Laga bo wowo wak règt bo dilanti; laga bo klèp di wowo keda fihá stret bo dilanti.

4:26 Mira bon unda bo pianan ta hibabo, e ora ei tur bo kamindanan lo keda stablesí.

4:27 No bira ni na man drechi ni na man robes; tene bo pia leu for di maldat.

Proverbionan 5

5:1 Mi yu, paga atenshon na mi sabiduria, inkliná bo orea na mi komprendementu,

5:2 pa bo mantené prudensia, i bo lepnan por warda konosementu.

5:3 Pasobra lepnan di un adúltera ta gotia miel, i su boka ta mas suave ku zeta;

5:4 ma na final e ta marga manera apsintus, skèrpi manera spada di dos filo.

5:5 Su pianan ta baha bai te na morto; su pasonan ta hiba derechito Seol.

5:6 E no ta pensa mes riba e bereha di bida; su kamindanan ta instabil, ma e no sa esaki.

5:7 Pesei anto, mi yunan, skuchami, i no desviá for di e palabranan di mi boka.

5:8 Tene bo kaminda leu for di e adúltera, i no yega serka di su porta di kas,

5:9 pa bo no duna bo vigor na otronan, i bo añanan na esun kruel;

5:10 pa stranheronan no wòrdu yená ku bo forsa, i fruta di bo trabou keda den kas di un stranhero,

5:11 i na final di bo bida bo keha, ora bo karni i bo kurpa kaba na nada,

5:12 i bo bisa: "Mira kon mi a odia instrukshon! Mira kon mi kurason a rechasá reprendementu!

5:13 Mi no a obedesé bos di mi siñadónan, ni a inkliná mi orea na esnan ku a instruími!

5:14 Mi tabata kasi totalmente ruiná meimei di e asamblea i e kongregashon."

5:15 Bebe awa for di bo mes rembak, i awa fresku for di bo mes pos.

5:16 Bo fuentenan mester basha ofer den e kayanan, koridanan di awa den e plenchinan?

5:17 Laga nan ta pa bo so, i no pa kompartí ku stranhero.

5:18 Laga bo fuente ta bendishoná, i alegrábo den e esposa di bo hubentut.

5:19 Manera un biná amabel i un gasèl grasioso, laga su pechunan satisfasébo tur ora; sea semper enkantá ku su amor.

5:20 Mi yu, pakiko bo mester ta enkantá ku un adúltera, i brasa pechu di un muhé stranhero?

5:21 Pasobra e kamindanan di un hende ta den bista di SEÑOR, i E ta vigilá tur su berehanan.

5:22 Su mes inikidatnan lo kapturá e malbado, i e lo keda gará den e kabuyanan di su piká.

5:23 E lo muri pa falta di instrukshon, i den su gran lokura e lo desviá.

Proverbionan 6

6:1 Mi yu, si bo a para bòrg pa bo próhimo, si bo a para garantia pa un stranhero,

6:2 bo a wòrdu kohí den trampa ku e palabranan di bo boka; bo a wòrdu kohí prezo ku e palabranan di bo boka.

6:3 Hasi esaki anto, mi yu, i libra bo mes, ya ku bo a kai den man di bo próhimo: bai, umiyá bo mes, i insistí serka bo próhimo.

6:4 No laga soño dominá bo wowo, ni madoho dominá bo klèp di wowo;

6:5 libra bo mes manera un gasèl for di man di yagdó, i manera un parha for di man di yagdó di parha.

6:6 Bai wak vruminga, abo floho, opservá su maneranan, i sea sabí!

6:7 E no tin hefe, ni kapitan, ni gobernante,

6:8 tòg e ta prepará su kuminda den zomer, i ta rekohé su provishonnan den tempu di kosecha.

6:9 O floho, kuantu tempu mas bo kier keda drumi? Ki ora bo tin idea di lanta for di bo soño?

6:10 "Lagami drumi poko mas, kabishá poko mas, lagami drumi poko mas ku man krusá"--

6:11 asina bo pobresa lo bin manera un bagamundo, i bo nesesidat manera un hòmber armá.

6:12 Un hende ku no ta sirbi pa nada, un hòmber malbado, ta esun ku ta kana rònt ku boka engañoso,

6:13 ku ta kinipí wowo, ku ta hasi seña ku pia, ku ta mustra ku dede;

6:14 kende, ku pèrvèrsidat den su kurason, ta plania maldat kontinuamente, kende ta sembra desunion.

6:15 Pesei su kalamidat lo bin direpiente; instantáneamente e lo wòrdu kibrá, i lo no tin kuramentu.

6:16 Tin seis kos ku SEÑOR ta odia, sí, shete kos ku ta un abominashon p'E:

6:17 wowonan altanero, un lenga mentiroso, i mannan ku ta drama sanger inosente,

6:18 un kurason ku ta plania maldat, pianan ku ta lihé pa kore hasi maldat,

6:19 un testigu falsu ku ta papia mentira, i esun ku ta sembra desunion entre rumannan.

6:20 Mi yu, warda e mandamentu di bo tata, i no bandoná e siñansa di bo mama;

6:21 mara nan kontinuamente riba bo kurason, mara nan rònt di bo garganta.

6:22 Ora bo ta riba kaminda, nan lo guiabo; ora bo ta drumi, nan lo kuidabo; i ora bo lanta, nan lo papia ku bo.

6:23 Pasobra e mandamentu ta un lampi, i e siñansa ta lus; i e reprendementunan di disiplina ta e kaminda di bida,

6:24 pa wardabo for di e muhé malbado, for di e labiamentu di e adúltera.

6:25 No deseá su bunitesa den bo kurason, ni lagu'é garabo ku su klèp di wowo.

6:26 Pasobra pa kousa di un prostituta un hòmber ta wòrdu rebahá te na un pida pan; i un adúltera ta yag riba un bida presioso.

6:27 Un hòmber por tuma kandela den su bus sin kima su paña?

6:28 Of un hòmber por kana riba karbon kayente sin kima su pia?

6:29 Asina ta pasa ku esun ku drumi ku esposa di su próhimo; esun ku mishi kuné no ta keda sin haña kastigu.

6:30 Hende no ta despresiá un ladron si e hòrta pa yena su barika, ora ku e tin hamber;

6:31 ma ora ku e wòrdu hañá ta hòrta, e mester paga bèk shete bes mas tantu; e mester duna tur loke tin den su kas.

6:32 Esun ku kometé adulterio ku un muhé ta falta komprendementu; esun ku hasi esaki ta kaba ku su mes.

6:33 Herida i desonor e lo haña, i su reproche lo no wòrdu kitá nunka.

6:34 Pasobra yalursheit ta lanta furia di un hòmber; e lo no tin miserikòrdia riba e dia di vengansa.

6:35 E lo no aseptá ningun sorto di kompensashon, i lo no kalma, ni maske kuantu regalo bo dun'é.