Buska den Beibel

Galatanan 1; Galatanan 2; Galatanan 3 BSNP Edita

Galatanan 1

1:1 Pablo, un apòstel (no mandá for di hende, ni dor di hende, ma dor di Jesu-Cristo, i Dios Tata, Kende a lant'E for di e mortonan),

1:2 i tur e rumannan ku ta huntu ku mi, Na e iglesianan di Galasia:

1:3 Grasia sea ku boso i pas di Dios nos Tata, i di Señor Jesu-Cristo,

1:4 Kende a duna Su mes pa nos pikánan, pa E por a libra nos di e siglo malu djawor aki, konforme e boluntat di nos Dios i Tata,

1:5 na Kende sea gloria pa semper i semper. Amèn.

1:6 Mi ta keda asombrá ku asina lihé boso a bandoná Esun ku a yama boso pa e grasia di Cristo, pa un evangelio diferente,

1:7 ku realmente no ta un otro; solamente tin algun hende ku ta hasi boso bira intrankil i ku kier trose e evangelio di Cristo.

1:8 Ma maske nos, òf un angel for di shelu, lo a prediká na boso un evangelio kontrario na esun ku nos a prediká na boso, ku é sea maldishoná.

1:9 Manera nos a bisa kaba, asina mi ta bolbe bisa awor: si kualkier hende prediká na boso un evangelio kontrario na esun ku boso a risibí, ku é sea maldishoná.

1:10 Pasobra ta fabor di hende mi ta buska awor, òf di Dios? Of ta hende mi ta trata di agradá? Si ainda ta hende mi tabata trata di agradá, lo mi no tabata un sirbidó di Cristo.

1:11 Pasobra mi kier pa boso sa, rumannan, ku e evangelio ku mi a prediká no ta segun hende.

1:12 Pasobra mi no a risibié for di hende, ni ningun hende no a siñami esaki, ma mi a risibié pa medio di un revelashon di Jesu-Cristo.

1:13 Pasobra boso a tende di mi manera di biba di antes den hudaismo, kon mi tabata pèrsiguí e iglesia di Dios sin miserikòrdia i tabata trata di destruié;

1:14 i mi tabata mas avansá den hudaismo ku hopi di mi kontemporáneonan entre mi paisanonan, siendo muchu mas zeloso pa e tradishonnan di mi antepasadonan.

1:15 Ma ora ku a agradá Dios, Kende a apartámi for di den barika di mi mama i a yamami pa medio di Su grasia,

1:16 pa revelá Su Yu den mi, pa mi predik'E entre e paganonan, mi no a konsultá mesora ku karni i sanger,

1:17 ni mi no a bai Jerusalèm serka esnan ku tabata apòstel promé ku mi, ma mi a bai Arabia, i a bolbe atrobe na Damasko.

1:18 Anto tres aña despues mi a bai Jerusalèm pa sera konosí ku Pedro, i a keda diesinku dia serka djé.

1:19 Ma mi no a mira ni un di e otro apòstelnan ku eksepshon di Santiago, ruman hòmber di Señor.

1:20 (Awor tokante di e kosnan ku mi ta skirbi boso, mi ta sigurá boso dilanti di Dios ku mi no ta gaña.)

1:21 Despues mi a bai den e regionnan di Siria i Silisia.

1:22 I ainda e iglesianan di Judea ku tabata den Cristo no tabata konosémi personalmente;

1:23 solamente nan a sigui tende: "Esun ku un tempu tabata pèrsiguí nos, awor ta prediká e fe ku un tempu e tabata trata di destruí."

1:24 I nan tabata glorifiká Dios pa mi motibu.

Galatanan 2

2:1 Anto, despues di un periodo di dieskuater aña, mi a bolbe bai Jerusalèm ku Barnabas, i a hiba Tito tambe huntu ku mi.

2:2 I ta pa motibu di un revelashon mi a bai; i mi a komuniká na nan e evangelio ku mi ta prediká entre e paganonan, ma mi a hasi esaki den privá na esnan ku tabata hende di influensia, pa miedu ku lo mi tabata kore, òf a kore, en bano.

2:3 Ma ni Tito mes, kende tabata huntu ku mi, no a wòrdu obligá pa wòrdu sirkumsidá, ounke ku e tabata un griego.

2:4 Ma tabata pa kousa di e rumannan falsu ku a slùip drenta pa spioná nos libertat ku nos tin den Cristo Jesus, pa trese nos na sklabitut.

2:5 Ma nos no a someté nos na nan ni pa ún ora so, pa e bèrdat di evangelio por keda serka boso.

2:6 Ma di esnan ku tabata di gran influensia (kiko nan tabata no ta hasi ningun diferensia pa mi; Dios no ta hasi distinshon di persona)--pasobra esnan di influensia no a kontribuí nada na mi.

2:7 Ma alkontrario, mirando ku mi a wòrdu konfiá ku e evangelio na esnan insirkumsidá, meskos ku Pedro a wòrdu konfiá ku e evangelio na esnan sirkumsidá,

2:8 (pasobra Esun ku a traha efektivamente pa Pedro den su apostolado pa esnan sirkumsidá, a traha efektivamente pa mi tambe pa e paganonan),

2:9 i ora Santiago, Sefas i Juan, kendenan a wòrdu konsiderá di ta pilarnan, a rekonosé e grasia ku a wòrdu duná na mi, nan a duna ami i Barnabas e man drechi di komunion, pa nos bai serka e paganonan i nan serka esnan sirkumsidá.

2:10 Solamente, nan a pidi nos pa kòrda riba e pobernan, presisamente loke mi tambe tabata ansioso pa hasi.

2:11 Ma ora Pedro a bin Antiokia mi a opon'é abiertamente, pasobra e tabata robes.

2:12 Pasobra promé ku e binida di algun hende di parti di Santiago, e tabatin kustumber di kome ku e paganonan; ma ora nan a bin, el a kuminsá retirá i distansiá su mes, pa miedu di esnan ku tabata di sirkumsishon.

2:13 I e restu di e hudiunan a uni nan mes kuné den hipokresia, ku e resultado ku asta Barnabas a wòrdu desviá dor di nan hipokresia.

2:14 Ma ora mi a mira ku nan no tabata franko tokante di e bèrdat di e evangelio, mi a bisa Pedro den presensia di tur hende: "Si abo, siendo hudiu, ta biba manera e paganonan i no manera e hudiunan, di kon bo ta obligá e paganonan biba manera hudiu?

2:15 "Nos ta hudiu di nasementu, i no pekadó for di entre e paganonan;

2:16 sinembargo, sabiendo ku un hende no ta wòrdu hustifiká pa medio di e obranan di Lei ma dor di fe den Cristo Jesus, nos tambe a kere den Cristo Jesus, pa nos por wòrdu hustifiká pa medio di fe den Cristo, i no pa medio di e obranan di Lei; komo ku pa medio di e obranan di Lei ningun hende lo no wòrdu hustifiká.

2:17 "Ma si mientras ku nos ta buska pa wòrdu hustifiká den Cristo, nos mes tambe a wòrdu hañá di ta pekadó, anto ta un sirbidó di piká Cristo ta? Di ningun manera!

2:18 Pasobra si mi bolbe traha loke mi a destruí, mi ta proba ku mi mes ta un transgresor.

2:19 Pasobra dor di Lei mi a muri pa Lei, pa mi por biba pa Dios.

2:20 Mi a wòrdu krusifiká ku Cristo; i no ta ami ta biba mas, ma Cristo ta biba den mi; i e bida ku mi ta biba awor den karni, mi ta biba pa medio di fe den e Yu di Dios, Kende a stimami, i a entregá Su mes pa mi.

2:21 Mi no ta anulá e grasia di Dios; pasobra si hustisia ta bin dor di Lei, e ora ei ta en bano Cristo a muri."

Galatanan 3

3:1 O galationan bobo! Ta ken a bruha boso kabes pa boso no obedesé e bèrdat, boso, dilanti kende nan wowo Jesu-Cristo a wòrdu presentá klaramente komo krusifiká?

3:2 Esaki ta e úniko kos ku mi kier haña sa for di boso: ta pa medio di e obranan di Lei boso a risibí e Spiritu, òf ta pa medio di tendementu ku fe?

3:3 Ta asina bobo boso ta? Despues di a kuminsá den e Spiritu, boso ta bai kaba den karni awor?

3:4 Ta en bano boso a sufri tantu kos asina--si di bèrdat tabata en bano?

3:5 Akaso esun anto, kende ta duna boso e Spiritu i ta obra milagernan meimei di boso, ta hasi esaki pa medio di e obranan di Lei òf pa medio di tendementu ku fe?

3:6 Asina tambe Abraham "a kere Dios, i esaki a wòrdu kontá komo hustisia p'é."

3:7 Pesei, sea sigur ku ta esnan ku ta di fe ta yunan di Abraham.

3:8 I Skritura, mirando di padilanti ku Dios lo hustifiká e paganonan pa medio di fe, di antemano a prediká e evangelio na Abraham, bisando: "Tur nashon lo ta bendishoná den bo."

3:9 Asina anto, esnan ku ta di fe ta bendishoná huntu ku e kreyente Abraham.

3:10 Pasobra tur esnan ku ta di e obranan di Lei ta bou di un maldishon; pasobra ta pará skirbí: "Maldishoná ta tur esnan ku no ta permanesé den tur kos skirbí den e buki di Lei, pa kumpli ku nan."

3:11 Awor ku ni un hende no ta hustifiká pa medio di Lei dilanti di Dios ta evidente; pasobra: "E hende hustu lo biba pa medio di fe."

3:12 Sinembargo, Lei no ta pa fe; alkontrario: "Esun ku praktiká nan lo biba pa medio di nan."

3:13 Cristo a redimí nos di e maldishon di Lei, birando un maldishon pa nos--pasobra ta pará skirbí: "Maldishoná ta tur esnan ku ta kologá na un palu"--

3:14 pa den Cristo Jesus e bendishon di Abraham por yega serka e paganonan, pa nos por risibí e promesa di e Spiritu dor di fe.

3:15 Rumannan, mi ta papia den término di relashonnan humano: ounke ta trata solamente di un aliansa di hende, tòg ora ku el a wòrdu ratifiká, ni un hende no ta pon'é un banda ni ta añadí kondishonnan na djé.

3:16 Awor e promesanan a wòrdu hasí na Abraham i na su simia. E no ta bisa: "I na simianan," komo si fuera e ta referí na hopi, ma mas bien na ún: "I na bo simia," esta, Cristo.

3:17 Loke mi ta bisando ta esaki: e Lei, ku a bin kuater shent'i trinta aña despues, no ta hasi e aliansa ku a wòrdu ratifiká pa Dios anteriormente pèrdè su valides, pa asina anulá e promesa.

3:18 Pasobra si e erensia ta basá riba lei, e no ta basá mas riba un promesa; ma Dios a dun'é na Abraham pa medio di un promesa.

3:19 Ta pakiko tin Lei anto? El a wòrdu añadí pa motibu di transgreshonnan, i a wòrdu ordená dor di angelnan pa medio di man di un mediador, te ora ku e simia lo a bin, na kende e promesa a wòrdu hasí.

3:20 Awor un mediador no ta pa ún so; ma Dios ta ún.

3:21 Lei ta kontrario anto na e promesanan di Dios? Di ningun manera! Pasobra si a wòrdu duná un lei ku tabata por a duna bida, e ora ei di bèrdat hustisia lo a wòrdu basá riba lei.

3:22 Ma Skritura a sera tur hende bou di piká, pa e promesa pa medio di fe den Jesu-Cristo por a wòrdu duná na esnan ku ta kere.

3:23 Ma promé ku fe a bin nos tabata wardá bou di guardia di lei, wardá pa e fe ku lo a wòrdu revelá despues.

3:24 Pesei Lei a bira nos tutor pa guia nos na Cristo, pa nos por wòrdu hustifiká pa medio di fe.

3:25 Ma awor ku fe a bin, nos no ta bou di un tutor mas.

3:26 Pasobra boso tur ta yunan di Dios dor di fe den Cristo Jesus.

3:27 Pasobra boso tur, ku a wòrdu batisá den Cristo, a bisti boso mes ku Cristo.

3:28 Awor no tin ni hudiu ni griego, no tin ni esklabu ni hende liber, no tin ni hòmber ni muhé; pasobra boso tur ta ún den Cristo Jesus.

3:29 I si boso ta pertenesé na Cristo, e ora ei boso ta desendiente di Abraham, erederonan segun promesa.