Buska den Beibel

Proverbionan 16; Proverbionan 17; Proverbionan 18 BSNP Edita

Proverbionan 16

16:1 E plannan di kurason ta pertenesé na hende, ma e kontesta di lenga ta bin di SEÑOR.

16:2 Tur e kamindanan di un hende ta limpi den su mes bista, ma SEÑOR ta pisa e motibunan.

16:3 Enkomendá bo obranan na SEÑOR, i bo plannan lo wòrdu stablesí.

16:4 SEÑOR a traha tur kos ku un propósito, sí, asta e malbado pa e dia di kalamidat.

16:5 Kada hende ku ta orguyoso di kurason ta un abominashon pa SEÑOR; siguramente e lo no keda sin kastigu.

16:6 Pa medio di miserikòrdia i bèrdat inikidat ta wòrdu ekspiá, i pa medio di e temor di SEÑOR hende ta keda leu for di maldat.

16:7 Ora ku un hende su kaminda ta agradá SEÑOR, E ta pone asta su enemigunan keda na pas kuné.

16:8 Mihó un tiki ku hustisia, ku gran entrada ku inhustisia.

16:9 E mente di un hende ta plania su kaminda, ma SEÑOR ta dirigí su pasonan.

16:10 Un sentensia dibino ta riba lep di rei; su boka no mester faya ora ku e ta huzga.

16:11 Peso i balansa hustu ta di SEÑOR, tur e piedranan-pa-pisa, ku ta den e saku, ta Su obra.

16:12 Ta un abominashon pa reinan hasi maldat, pasobra un trono ta wòrdu stablesí riba hustisia.

16:13 Lepnan hustu ta e delisia di reinan, i nan ta stima esun ku ta papia loke ta korekto.

16:14 Rabia di un rei ta manera mensaheronan di morto, ma un hende sabí lo kalma esaki.

16:15 Den e lus riba kara di rei tin bida, i su grasia ta manera un nubia di awaseru di primavera.

16:16 Kuantu mas mihó ta pa haña sabiduria ku pa haña oro! I pa haña komprendementu ta di preferá riba plata.

16:17 Kaminda grandi di e rektonan ta: pa apartá bo mes for di maldat; esun ku paga tino kon e ta kana ta preservá su alma.

16:18 Orguyo ta bin promé ku destrukshon, i un spiritu arogante promé ku kaída.

16:19 Ta mihó pa ta di un spiritu umilde huntu ku e umildenan, ku parti botín ku e orguyosonan.

16:20 Esun ku paga tino na e palabra lo haña bondat, i bendishoná ta esun ku ta konfia den SEÑOR.

16:21 Esun di kurason sabí lo wòrdu yamá prudente, i palabranan agradabel ta promové konosementu.

16:22 Komprendementu ta un fuente di bida pa esun ku tin é, ma e disiplina di hende bobo ta bobedat.

16:23 Kurason di un hende sabí ta guia su boka, i su lepnan ta papia ku konosementu.

16:24 Palabranan agradabel ta manera un panal di miel, dushi pa alma i kuramentu pa wesu.

16:25 Tin un kaminda ku ta parse bon den bista di hende, ma su fin ta e kaminda di morto.

16:26 Apetit di un trahadó ta traha p'é, pasobra su boka ta obligu'é.

16:27 Un hende pèrvèrso ta koba saka maldat, i su palabranan ta manera un kandela tur na flam.

16:28 Un hende pèrvèrso ta sembra pleitu, i un hasidó di redu ta separá amigunan íntimo.

16:29 Un hende violento ta tenta su próhimo, i ta hib'é den un kaminda ku no ta bon.

16:30 Esun ku kinipí ku su wowo ta hasi asina pa plania kosnan pèrvèrso; esun ku primi su lepnan riba otro tin mal intenshon.

16:31 Kabei blanku ta un korona di gloria; den e kaminda di hustisia e ta wòrdu hañá.

16:32 Esun ku no ta rabia lihé ta mihó ku e poderoso, i esun ku ta goberná su spiritu ta mihó ku esun ku ta kapturá un stat.

16:33 Lòt ta wòrdu tirá den skochi, ma SEÑOR ta Esun ku ta disidí tur kos.

Proverbionan 17

17:1 Mihó un pida pan seku, ku trankilidat, ku un kas yen di ko'i kome, ku pleitamentu.

17:2 Un sirbidó sabí lo goberná riba un yu ku ta kousa bèrguensa, i e lo tin parti den e erensia huntu ku e rumannan.

17:3 Wea pa dirti metal ta pa plata, i fòrnu ta pa oro, ma ta SEÑOR ta sonda kurason.

17:4 Un malbado ta skucha na lepnan engañoso; i un gañadó ta paga atenshon na lenga malisioso.

17:5 Esun ku hasi bofon di e hende pober ta insultá Esun ku a trah'é; i esun ku gosa di mira kalamidat lo no keda sin kastigu.

17:6 Nietu ta korona di hende bieu, i gloria di e yunan ta nan mayornan.

17:7 Palabranan elokuente no ta pas den boka di un hende bobo, muchu menos lepnan mentiroso ta pas pa un prens.

17:8 Plaka pasá bou di mesa ta manera un talisman den bista di su doño; unda ku e bira, e ta prosperá.

17:9 Esun ku tapa un transgreshon ta buska amor, ma esun ku ripití un asunto ta separá amigunan íntimo.

17:10 Un reprendementu ta drenta mas profundo den un hende ku tin komprendementu, ku shen sla den un bobo.

17:11 Un hende rebelde ta buska solamente maldat, pesei un mensahero kruel lo wòrdu mandá kontra djé.

17:12 Mihó enfrentá un ber ku nan a hòrta su yunan for di djé, ku enfrentá un bobo den su bobedat.

17:13 Esun ku paga bon ku malu, maldat lo no bai for di su kas nunka.

17:14 E kuminsamentu di pleitu ta manera ora dam kibra; pesei, laga e asunto para, promé ku e rementá.

17:15 Esun ku hustifiká e malbado, i esun ku kondená e hustu, tur dos ta abominashon pa SEÑOR.

17:16 Ki bal plaka den man di un bobo pa kumpra sabiduria, siendo ku e no tin deseo pa haña esei?

17:17 Un amigu ta stima tur ora bai, i un ruman ta nasí pa tempu di atversidat.

17:18 Un hende ku falta komprendementu ta sera kombenio, i ta para bòrg den presensia di su próhimo.

17:19 Esun ku stima transgreshon ta stima pleitu, i esun ku traha un porta haltu ta buska destrukshon.

17:20 Un hende ku kurason engañoso nunka ta haña bondat, i esun ku lenga pèrvèrso ta kai den maldat.

17:21 Esun ku engendrá un bobo ta engendr'é pa su mes tristesa, i tata di un bobo no tin goso.

17:22 Un kurason kontentu ta un bon remedi, ma un spiritu abatí ta seka wesu.

17:23 Un malbado ta aseptá plaka pasá bou di mesa, pa trose e kaminda di hustisia.

17:24 Sabiduria ta dilanti di esun ku tin komprendementu, ma wowo di un bobo ta dwal te na e finnan di tera.

17:25 Un yu bobo ta tristesa pa su tata, i amargura pa esun ku a pon'é na mundu.

17:26 Tampoko no ta bon pa kastigá e hustu, ni pa suta e nobelnan pa nan rektitut.

17:27 Esun ku midi su palabranan tin konosementu, i esun ku tin un spiritu kalmo ta un hende di komprendementu.

17:28 Asta un bobo ta pasa pa sabí, ora ku e keda ketu; ora ku e sera su boka, e ta pasa pa un hende prudente.

Proverbionan 18

18:1 Esun ku isolá su mes ta buska su mes deseo; su furia ta lanta kontra tur sabiduria sano.

18:2 Un bobo no tin delisia den komprendementu, ma solamente den ekspreshon di su mes opinion.

18:3 Ora ku un malbado bin, despresio tambe ta bin, i huntu ku desonor ta bin reproche.

18:4 E palabranan di boka di un hende ta awa hundu, i e fuente di sabiduria ta un roi ku ta brota.

18:5 No ta bon pa duna un malbado preferensia, ni pa laga un hustu kai na ora di huisio.

18:6 E lepnan di un bobo ta trese pleitu, i su boka ta pidi sla.

18:7 E boka di un bobo ta su ruina, i su lepnan ta un trampa pa su alma.

18:8 E palabranan di un hasidó di redu ta manera kuminda di boka dushi, i nan ta baha bai te den e partinan di mas paden di hende.

18:9 Tambe esun ku ta floho den su trabou ta ruman di esun ku ta destruí.

18:10 E nòmber di SEÑOR ta un toren fuerte; e hustu ta kore drenta den djé i ta sigur.

18:11 E rikesa di un hende riku ta su stat fortifiká, i manera muraya haltu den su mes imaginashon.

18:12 Promé ku su kaída kurason di un hende ta halsa su mes, ma umildat ta bin promé ku onor.

18:13 Esun ku rospondé promé ku e skucha, esei ta bobedat i bèrguensa p'é.

18:14 E spiritu di un hende ta sosten'é den su malesa, ma ken por soportá un spiritu abatí?

18:15 Kurason di e hende prudente ta atkirí konosementu, i orea di e hende sabí ta buska konosementu.

18:16 Regalo di un hende ta habri kaminda p'é, i ta hib'é dilanti di hòmbernan grandi.

18:17 Esun ku ta promé pa pleita su kaso ta parse hustu, te ora ku un otro bin interogu'é.

18:18 Tiramentu di lòt ta pone fin na pleitu, i ta tene e poderosonan separá for di otro.

18:19 Un ruman ofendí ta mas difisil pa gana ku un stat fortifiká, i pleitu ta manera baranan di un kastel.

18:20 Barika di un hende lo keda satisfecho ku e fruta di su boka; e lo keda satisfecho ku e produkto di su lepnan.

18:21 Morto i bida ta den e poder di lenga, i esnan ku stima esaki lo kome su fruta.

18:22 Esun ku haña un esposa ta haña algu bon, i ta risibí fabor for di SEÑOR.

18:23 E pober ta papia ku rogamentu, ma e riku ta rospondé brutu.

18:24 Un hende ku tin hopi amigu por yega na ruina, ma tin un amigu ku ta mas pegá ku un ruman.