Buska den Beibel

Proverbionan 10; Proverbionan 11; Proverbionan 12 BSNP Edita

Proverbionan 10

10:1 E proverbionan di Salomon: Un yu sabí ta hasi su tata kontentu, ma un yu bobo ta un tristesa pa su mama.

10:2 Tesoronan hañá ku maldat no ta duna probecho, ma hustisia ta libra for di morto.

10:3 SEÑOR lo no pèrmití pa e hustu pasa hamber, ma deseo di e malbado E ta tira un banda.

10:4 Esun ku traha ku man negligente ta bira pober, ma man di e balente ta hasi riku.

10:5 Esun ku rekohé den zomer ta un yu sabí, ma esun ku drumi den tempu di kosecha ta un yu ku ta kousa bèrguensa.

10:6 Tin bendishon riba kabes di e hustu, ma violensia ta tapa boka di e malbado.

10:7 Rekuèrdo di e hustu ta bendishoná, ma nòmber di e malbado lo putri.

10:8 Esun sabí di kurason lo aseptá mandamentunan, ma un bobo ku ta papia hopi lo wòrdu bentá abou.

10:9 Esun ku kana den rektitut ta kana konfiadamente, ma esun ku pèrvèrtí su kamindanan lo wòrdu deskubrí.

10:10 Esun ku kinipí wowo ta kousa problema, i un bobo ku ta papia hopi lo wòrdu bentá abou.

10:11 Boka di e hustu ta un fuente di bida, ma violensia ta tapa boka di e malbado.

10:12 Odio ta lanta pleitu, ma amor ta tapa tur piká.

10:13 Sabiduria ta wòrdu hañá riba lep di esun ku tin komprendementu, ma bara ta pa lomba di esun ku falta komprendementu.

10:14 E hende sabí ta montoná sabiduria, ma boka di e bobo ta destrukshon serkano.

10:15 Rikesa di e hende riku ta su fòrti; destrukshon di e pobernan ta nan pobresa.

10:16 Labor di e hustu ta kondusí na bida, fruta di e malbado ta kondusí na kastigu.

10:17 Esun ku tene kuenta ku instrukshon ta riba e bereha di bida, ma esun ku rechasá reprendementu ta kana dwal.

10:18 Esun ku skonde odio tin lepnan mentiroso, i esun ku plama kalumnia ta un bobo.

10:19 Ora tin hopi papiamentu, piká no ta falta, ma esun ku frena su lepnan ta sabí.

10:20 Lenga di e hustu ta manera plata puru; kurason di e malbado ta di poko balor.

10:21 Lepnan di e hustu ta alimentá hopi hende, ma e bobo ta muri pa falta di komprendementu.

10:22 Ta e bendishon di SEÑOR ta hasi riku, i E no ta agregá tristesa na djé.

10:23 Meskos ku hasimentu di maldat ta dibertishon pa e malbado, asina sabiduria ta pa un hende di komprendementu.

10:24 Loke e malbado ta teme lo bin riba djé, i deseo di e hustu lo wòrdu duná na djé.

10:25 Ora warwarú pasa, e malbado no t'ei mas, ma e hustu tin un fundeshi etèrno.

10:26 Manera binager ta pa djente i huma pa wowo, asina e floho ta pa esnan ku ta mand'é.

10:27 E temor di SEÑOR ta prolongá bida, ma añanan di e malbado lo wòrdu hasí kòrtiku.

10:28 E speransa di e hustu ta alegria, ma e ekspektativa di e malbado lo peresé.

10:29 E kaminda di SEÑOR ta un fortalesa pa e rekto, ma e lo ta destrukshon pa e hasidónan di inikidat.

10:30 E hustu nunka lo wòrdu moví, ma e malbado lo no biba den e tera.

10:31 Boka di e hustu ta produsí sabiduria, ma lenga pèrvèrso lo wòrdu kòrtá afó.

10:32 Lepnan di e hustu ta produsí loke ta aseptabel, ma boka di e malbado, loke ta pèrvèrso.

Proverbionan 11

11:1 Un balansa engañoso ta abominashon pa SEÑOR, ma un peso hustu ta Su delisia.

11:2 Ora ku orguyo bin, desonor tambe ta bin, ma sabiduria ta serka e umildenan.

11:3 Integridat di e rektonan lo guia nan, ma pèrvèrsidat di e traidónan lo destruí nan.

11:4 Rikesa no ta di probecho den e dia di rabia, ma hustisia ta libra for di morto.

11:5 Hustisia di e hende perfekto lo dirigí su kaminda, ma e malbado lo kai pa medio di su mes maldat.

11:6 Hustisia di e hendenan rekto lo libra nan, ma e traidónan lo wòrdu atrapá den nan mes golosidat.

11:7 Ora ku un hende malbado muri, su ekspektativa lo peresé, i e speransa di hende inhustu ta peresé.

11:8 E hustu ta wòrdu librá for di tribulashon, ma e malbado ta tuma su lugá.

11:9 Un hipokrít ta destruí su próhimo ku su boka, ma pa medio di sabiduria e hustu lo wòrdu librá.

11:10 Ora ta bai bon ku e hustu, e stat ta regosihá; i ora ku e malbado peresé tin gritu di alegria.

11:11 Pa medio di e bendishon di e hendenan rekto e stat ta wòrdu halsá, ma pa medio di boka di e malbado e ta keda trastorná.

11:12 Esun ku despresiá su próhimo ta falta huisio, ma un hende ku komprendementu ta keda ketu.

11:13 Esun ku ta kana hasi redu ta saka sekreto, ma esun ku ta di konfia ta tapa e asunto.

11:14 Kaminda no tin guiansa, e pueblo ta kai, ma kaminda tin hopi konsehero tin viktoria.

11:15 Esun ku para bòrg pa un stranhero siguramente lo sufri pa esei, ma esun ku no ta gusta para bòrg lo ta sigur.

11:16 Un muhé amabel ta optené onor, i hòmbernan violento ta optené rikesa.

11:17 E hende miserikòrdioso ta hasi bon na su mes alma, ma e hende kruel ta tormentá su mes karni.

11:18 E malbado ta risibí pago engañoso, ma esun ku sembra hustisia ta haña un rekompensa bèrdadero.

11:19 Esun ku para firme den hustisia lo optené bida, i esun ku sigui maldat lo kousa su mes morto.

11:20 Esnan ku ta di kurason pèrvèrso ta un abominashon pa SEÑOR, ma esnan perfekto den nan kaminda ta Su delisia.

11:21 Siguramente e hende malbado lo no keda sin kastigu, ma e desendientenan di e hustu lo wòrdu librá.

11:22 Manera un renchi di oro den snùit di porko, asina un muhé bunita sin diskreshon ta.

11:23 Deseo di e hustu ta resultá den kos bon so, ma ekspektativa di e malbado ta resultá den furia so.

11:24 Tin ku ta repartí i tòg ta haña mas; tin ku ta retené mas di loke ta hustu, ma tòg ta resultá den pobresa.

11:25 E hende generoso lo prosperá, i esun ku duna di bebe tambe lo haña di bebe.

11:26 Esun ku tene mainshi atras, pueblo lo maldishon'é, ma bendishon lo ta riba kabes di esun ku ta bende mainshi.

11:27 Esun ku diligentemente buska loke ta bon ta buska fabor, ma esun ku buska maldat, maldat lo bin riba djé.

11:28 Esun ku konfia den su rikesa lo kai, ma e hustu lo floresé manera blachi bèrdè.

11:29 Esun ku tormentá su mes kas lo eredá bientu, i e bobo lo ta sirbidó di esun ku ta sabí di kurason.

11:30 Fruta di e hustu ta un palu di bida, i esun ku ta sabí ta gana alma.

11:31 Si e hustu wòrdu rekompensá riba tera, kuantu mas e malbado i e pekadó!

Proverbionan 12

12:1 Esun ku ta stima disiplina ta stima konosementu, ma esun ku ta odia reprendementu ta bobo.

12:2 Un bon hende lo risibí grasia serka SEÑOR, ma un hende ku plania maldat E lo kondená.

12:3 Un hende lo no wòrdu stablesí pa medio di maldat, ma rais di e hustu nunka lo no wòrdu moví.

12:4 Un muhé birtuoso ta e korona di su esposo, ma e muhé ku ta kousa bèrguensa ta manera putrimentu den su wesunan.

12:5 E pensamentunan di e hustunan ta korekto, ma e konsehonan di e malbadonan ta engañoso.

12:6 E palabranan di e malbadonan ta skonde warda pa drama sanger, ma boka di e hustunan lo libra nan.

12:7 E malbadonan ta wòrdu trastorná i no t'ei mas, ma kas di e hustunan lo permanesé.

12:8 Un hende lo wòrdu elogiá segun su sabiduria, ma un hende di kurason pèrvèrso lo wòrdu despresiá.

12:9 Mihó ta esun ku ta wòrdu menospresiá, i tòg tin un sirbidó, ku esun ku ta hasi su mes grandi, i tin falta di pan.

12:10 Un hende hustu ta kuida bida di su bestia, ma kompashon di e malbadonan ta kruel.

12:11 Esun ku kultivá su tera lo tin pan na kantidat, ma esun ku kore tras di banidat tin falta di komprendementu.

12:12 E malbado ta deseá e botín di hende malbado, ma rais di e hustunan ta duna fruta.

12:13 Un hende malbado ta kai den trampa dor di transgreshon di su lepnan, ma e hustu lo skapa for di tribulashon.

12:14 Un hende lo wòrdu sasiá ku bondat dor di e fruta di su boka, i e echonan di man di un hende lo bolbe bèk na djé.

12:15 E kaminda di un bobo ta korekto den su mes bista, ma un hende sabí ta esun ku ta skucha konseho.

12:16 Rabia di un bobo ta keda riparabel mesora, ma un hende prudente no ta hiba insulto na kuenta.

12:17 Esun ku ta papia bèrdat ta konta loke ta korekto, ma un testigu falsu ta papia mentira.

12:18 Tin hende ta papia sin pensa, manera hinká di spada, ma lenga di hende sabí ta trese kuramentu.

12:19 Lepnan ku ta papia bèrdat lo ta stablesí pa semper, ma un lenga mentiroso ta pa un momento so.

12:20 Tin engaño den kurason di esnan ku ta plania maldat, ma konseheronan di pas tin goso.

12:21 Lo no pasa nada malu ku e hustu, ma e malbadonan ta yen di problema.

12:22 Lepnan mentiroso ta un abominashon pa SEÑOR, ma esnan ku ta trata ku fieldat ta Su delisia.

12:23 Un hende prudente ta keda ketu tokante di su konosementu, ma kurason di bobonan ta proklamá lokura.

12:24 Man di e hende balente lo goberná, ma negligensia ta hiba na trabou fòrsá.

12:25 Ansha den kurason di hende ta hasié abatí, ma un bon palabra ta hasié kontentu.

12:26 E hustu ta un guia pa su próhimo, ma kaminda di e malbadonan ta hasi nan kana dwal.

12:27 E floho no ta hasa loke el a kohe ku yagmentu, ma diligensia ta e poseshon presioso di hende.

12:28 Den e kaminda di hustisia tin bida, i den e kaminda ei no tin morto.