Buska den Beibel

Huan 2; Huan 3; Huan 4 BSNP Edita

Huan 2

2:1 I riba e di tres dia tabatin un kasamentu na Kana di Galilea, i e mama di Jesus tabata einan;

2:2 i Jesus ku Su disipelnan tambe tabata kombidá pa e kasamentu.

2:3 I ora biña a kaba, e mama di Jesus a bis'E: "Nan no tin mas biña."

2:4 I Jesus a bis'é: "Muhé, kiko Mi tin di hasi ku bo? Mi ora no a yega ainda."

2:5 Su mama a bisa e sirbidónan: "Kiko ku E bisa boso, hasié."

2:6 Awor einan tabatin seis tinashi di piedra pa pone awa aden, segun e kustumber di purifikashon di e hudiunan, kada un ku un kontenido di binti pa trinta galon.

2:7 Jesus a bisa nan: "Yena e tinashinan ku awa." I nan a yena nan te na rant.

2:8 I El a bisa nan: "Awor saka poko afó i hib'é pa e bòtelier." I nan a hib'é p'é.

2:9 I ora ku e bòtelier a purba e awa ku a bira biña, i no tabata sa for di unda esaki a bin (ma e sirbidónan ku a saka e awa sí tabata sa), e bòtelier a yama e brùidehòm,

2:10 i a bis'é: "Tur hende ta sirbi e bon biña promé, i despues ku e hendenan a bebe basta, esun di kalidat inferior; ma abo a warda e bon biña te awor."

2:11 E prinsipio aki di Su milagernan Jesus a hasi na Kana di Galilea, i a manifestá Su gloria; i Su disipelnan a kere den djE.

2:12 Despues di esaki El a bai Kapernaum, E i Su mama, Su ruman hòmbernan i Su disipelnan; i aya nan a keda algun dia.

2:13 I e Pasku di e hudiunan tabata serka, i Jesus a bai Jerusalèm.

2:14 I El a haña sintá den tèmpel esnan ku tabata bende buey, karné i palomba, i e kambiadónan di plaka.

2:15 I El a traha un zwip di kabuya i a saka nan tur for di tèmpel, huntu ku e karnénan i e bueynan; i El a basha e plaka di e kambiadónan abou i a bòlter nan mesanan;

2:16 i na esnan ku tabata bende palomba El a bisa: "Kita e kosnan aki for di einan; stòp di hasi e kas di mi Tata un kas di negoshi."

2:17 Su disipelnan a kòrda ku tabata pará skirbí: "E zelo pa Bo kas lo kaba ku Mi."

2:18 Pesei, e hudiunan a kontestá i a bis'E: "Ki señal Bo ta mustra nos, ku Bo mag hasi e kosnan aki?"

2:19 Jesus a kontestá i a bisa nan: "Destruí e tèmpel aki i den tres dia lo Mi lant'é."

2:20 Pesei, e hudiunan a bisa: "A tuma kuarent'i seis aña pa traha e tèmpel aki, anto Abo lo lant'é den tres dia?"

2:21 Ma E tabata papia di e tèmpel di Su kurpa.

2:22 Pesei ora ku El a wòrdu lantá for di e mortonan, Su disipelnan a kòrda ku El a bisa esaki; i nan a kere e Skritura i e palabra ku Jesus a papia.

2:23 Awor ora ku E tabata na Jerusalèm durante di e Fiesta di Pasku, hopi hende a kere den Su nòmber ora nan a mira Su milagernan ku E tabata hasi.

2:24 Ma Jesus, di Su parti, no tabata konfia Su mes na nan, pasobra E tabata konosé tur hende,

2:25 i pasobra E no tabatin mester di ningun hende pa duna testimonio tokante di hende, komo ku E mes tabata sa kiko tabatin den hende.

Huan 3

3:1 Awor tabatin un hòmber di e fariseonan, kende tabata yama Nikodemo, un gobernante di e hudiunan;

3:2 e hòmber aki a bin serka Jesus den anochi i a bis'E: "Rabi, nos sa ku Bo a bin di Dios komo un maestro, pasobra ni un hende no por hasi e milagernan aki ku Abo ta hasi si Dios no ta kuné."

G3778 -- e -> this
G3778 -- hòmber -> man
G2064 -- a bin -> came
G3571 -- serka Jesus den anochi -> to Jesus by night
G3004 -- i a bis'E -> and said
G4461 -- : "Rabi -> to HimRabbi
G3609a -- , nos sa -> we know
G2064 -- ku Bo a bin -> that You have come
G2316 -- di Dios -> from God
G1320 -- komo un maestro -> ] a teacher
G3762 -- , pasobra ni -> for no
G3762 -- un hende -> one
G1410 -- por -> can
G4160 -- hasi -> do
G3778 -- e -> these
G4592 -- milagernan -> signs
G4160 -- aki ku Abo ta hasi -> that You do
G1437 -- si -> unless
G2316 -- Dios -> God

3:3 Jesus a kontestá i a bis'é: "Di bèrdat, di bèrdat, Mi ta bisabo, si un hende no nase di nobo, e no por mira e reino di Dios."

3:4 Nikodemo a bis'E: "Kon un hende por nase ora ku e ta bieu? Akaso e por drenta den barika di su mama pa di dos biaha i nase?"

3:5 Jesus a kontestá: "Di bèrdat, di bèrdat, Mi ta bisabo, si un hende no nase di awa i di e Spiritu, e no por drenta e reino di Dios.

3:6 Loke ta nasí di karni, ta karni, i loke ta nasí di e Spiritu, ta spiritu.

3:7 No keda strañá ku Mi a bisabo: 'Bo mester nase di nobo.'

3:8 Bientu ta supla unda ku e kier i bo ta tende su zonidu, ma bo no sa di unda e ta bin ni na unda e ta bai; asina ta tur esnan ku nase di e Spiritu."

3:9 Nikodemo a kontestá i a bis'E: "Kon e kosnan aki por ta?"

3:10 Jesus a kontestá i a bis'é: "Abo ta e maestro di Israel, i bo no ta komprendé e kosnan aki?

3:11 Di bèrdat, di bèrdat, Mi ta bisabo, nos ta papia loke nos sa, i ta duna testimonio di loke nos a mira; i boso no ta risibí nos testimonio.

3:12 Si Mi a konta boso kosnan terenal i boso no ta kere, kon boso lo kere si Mi konta boso kosnan selestial?

3:13 I ni un hende no a subi na shelu, sino Esun ku a baha for di shelu, esta, e Yu di Hende.

3:14 I meskos ku Moisés a halsa e kolebra den desierto, asina tambe e Yu di Hende mester wòrdu halsá,

3:15 pa ken ku kere den djE por tin bida etèrno.

3:16 "Pasobra Dios a stima mundu asina tantu, ku El a duna Su Yu unigénito, pa ken ku kere den djE no bai pèrdí, ma tin bida etèrno.

3:17 Pasobra Dios no a manda e Yu den mundu pa kondená mundu, ma pa mundu wòrdu salbá dor di djE.

3:18 Esun ku kere den djE no ta kondená; esun ku no ta kere ta kondená kaba, pasobra e no a kere den e nòmber di e Yu unigénito di Dios.

3:19 I esaki ta e kondenashon, ku e lus a bin den mundu, i hende tabata stima e skuridat mas ku e lus; pasobra nan echonan tabata malu.

3:20 Pasobra esun ku ta hasi maldat ta odia e lus, i no ta bin na e lus, pa su echonan no wòrdu eksponí.

3:21 Ma esun ku ta praktiká bèrdat ta bin na e lus, pa por wòrdu manifestá ku su echonan ta wòrdu hasí den Dios."

3:22 Despues di e kosnan aki Jesus i Su disipelnan a bin na tera di Judea, i ayanan El a pasa un tempu huntu ku nan i tabata batisá.

3:23 I Juan tambe tabata batisá na Enon pegá ku Salim, pasobra ayanan tabatin hopi awa; i e hendenan tabata bin i tabata wòrdu batisá.

3:24 Pasobra Juan no a wòrdu tirá den prizon ainda.

3:25 E ora ei a surgi un diskushon entre e disipelnan di Juan i un hudiu tokante di purifikashon.

3:26 I nan a bin serka Juan i a bis'é: "Rabi, Esun ku tabata serka bo na e otro banda di Jordan, di Kende bo a duna testimonio, mira, E ta batisá i tur hende ta bin serka djE."

3:27 Juan a kontestá i a bisa: "Un hende no por risibí nada, si esei no a wòrdu duná na djé for di shelu.

3:28 Boso mes ta mi testigu ku mi a bisa: 'Ami no ta e Cristo,' ma: 'Mi a wòrdu mandá Su dilanti.'

3:29 Esun ku tin e brùit ta e brùidehòm, ma e amigu di e brùidehòm, ku ta para serka i ta tend'é, ta regosihá grandemente pa motibu di e bos di e brùidehòm. I asina e goso aki di mi a keda kumplí.

3:30 E mester oumentá, ma ami mester bira menos.

3:31 "Esun ku ta bin for di ariba ta riba tur; esun ku ta di mundu, di mundu e ta i ta papia di mundu. Esun ku ta bin for di shelu ta riba tur.

3:32 Loke ku El a mira i tende, di esei E ta duna testimonio, i ningun hende no ta risibí Su testimonio.

3:33 Esun ku a risibí Su testimonio a konfirmá ku Dios ta bèrdadero.

3:34 Pasobra Esun ku Dios a manda ta papia e palabranan di Dios, pasobra Dios ta duna e Spiritu sin midí.

3:35 E Tata ta stima e Yu, i a entregá tur kos den Su man.

3:36 Esun ku kere den e Yu tin bida etèrno; ma esun ku no obedesé e Yu lo no mira bida, ma e furia di Dios ta keda riba djé."

Huan 4

4:1 Pesei ora Señor a haña sa ku e fariseonan a tende ku Jesus tabata haña i batisá mas disipel ku Juan

4:2 (ounke ku Jesus mes no tabata batisá, sino Su disipelnan),

4:3 El a sali for di Judea i a bolbe bai Galilea.

4:4 I E mester a pasa dor di Samaria.

4:5 Asina El a yega na un stat di Samaria ku yama Sikar, pegá ku e pida tereno ku Jakòb a duna su yu hòmber Jose;

4:6 i ayanan e pos di Jakòb tabata. Jesus anto, kansá di Su biahe, a kai sinta na e pos. I tabata mas o menos diesdos or di mèrdia.

4:7 A bin un muhé samaritano pa saka awa. Jesus a bis'é: "DunaMi di bebe."

4:8 Pasobra Su disipelnan a bai den stat pa kumpra kuminda.

4:9 Anto e muhé samaritano a bis'E: "Kon por ta ku Abo, siendo un hudiu, ta pidi ami, un muhé samaritano, pa dunaBo di bebe?" (Pasobra hudiu no tin nada di aber ku samaritano.)

4:10 Jesus a kontestá i a bis'é: "Si bo tabata konosé e don di Dios i ta Ken ta Esun ku ta bisabo: 'DunaMi di bebe,' lo bo a pidiE, i E lo a dunabo awa bibu."

4:11 E muhé a bis'E: "Señor, Bo no tin nada pa saka awa kuné i e pos ta hundu; unda anto Bo ta haña e awa bibu ei?

4:12 Akaso Bo ta mas grandi ku nos tata Jakòb ku a duna nos e pos aki, i for di kual e mes i su yunan i su bestianan a bebe?"

4:13 Jesus a kontestá i a bis'é: "Ken ku bebe di e awa aki lo bolbe haña set;

4:14 ma ken ku bebe di e awa ku Ami lo dun'é lo no haña set nunka, ma e awa ku Ami lo dun'é lo bira den djé un fuente di awa ku ta brota pa bida etèrno."

4:15 E muhé a bis'E: "Señor, dunami e awa aki, pa mi no haña set i pa mi no tin mester di bin te akinan pa saka awa."

4:16 Jesus a bis'é: "Bai, yama bo esposo i bin aki."

4:17 E muhé a kontestá i a bisa: "Mi no tin esposo." Jesus a bis'é: "Bo a bisa bon: 'Mi no tin esposo';

4:18 pasobra bo tabatin sinku esposo; i esun ku bo tin awor aki no ta bo esposo; den esaki bo a papia bèrdat."

4:19 E muhé a bis'E: "Señor, mi ta ripará ku Bo ta un profeta.

4:20 Nos tatanan tabata adorá riba e seru aki; i boso ta bisa ku ta na Jerusalèm e lugá ta, kaminda hende mester adorá."

4:21 Jesus a bis'é: "Muhé, kereMi, e ora lo yega ku ni riba e seru aki, ni na Jerusalèm boso lo no adorá e Tata.

4:22 Boso ta adorá loke boso no konosé; nos ta adorá loke nos konosé, pasobra salbashon ta bin for di e hudiunan.

4:23 Ma e ora lo yega, i ta awor, ku e adoradónan bèrdadero lo adorá e Tata den spiritu i bèrdat; pasobra ta hendenan asina e Tata ta buska pa ador'E.

4:24 Dios ta Spiritu, i esnan ku ta ador'E mester adorá den spiritu i bèrdat."

4:25 E muhé a bis'E: "Mi sa ku e Mesias ta bin (Esun ku ta wòrdu yamá Cristo); ora Esun ei bin, E lo deklará nos tur kos."

4:26 Jesus a bis'é: "Ami ku ta papia ku bo t'E."

4:27 I na e momento aki Su disipelnan a yega i nan a keda strañá ku E tabata papia ku un muhé; tòg ni un no a bisa: "Kiko Bo ta buska?" òf: "Pakiko Bo ta papia kuné?"

4:28 Asina e muhé a laga su purún para i a bai den stat, i a bisa e hendenan:

4:29 "Bin mira un hòmber ku a bisami tur kos ku mi a hasi; no ta esaki lo ta e Cristo?"

4:30 Nan a sali for di stat i a bin serka djE.

4:31 Mientras tantu e disipelnan tabata rogu'E, bisando: "Kome, Rabi!"

4:32 Ma El a bisa nan: "Mi tin kuminda pa kome ku boso no sa di djé."

4:33 Pesei, e disipelnan tabata bisa otro: "Por ta ku un hende a trese algu di kome p'E?"

4:34 Jesus a bisa nan: "Mi kuminda ta pa hasi e boluntat di Esun ku a mandaMi, i pa kumpli ku Su trabou.

4:35 Boso no ta bisa: 'Falta kuater luna pa tempu di kosecha yega'? Mira, Mi ta bisa boso, hisa boso kara wak i mira e kunukunan, pasobra nan ta blanku pa wòrdu kosechá.

4:36 Ya kaba esun ku ta kosechá ta risibí pago i ta rekohé fruta pa bida etèrno, pa esun ku ta sembra i esun ku ta kosechá por regosihá huntu.

4:37 Pasobra den e kaso aki e dicho ta bèrdat: 'Un ta sembra i otro ta kosechá.'

4:38 Mi a manda boso kosechá lokual boso no a traha p'é; otronan a traha i boso a benefisiá di nan trabou."

4:39 I hopi samaritano for di e stat ei a kere den djE pa motibu di e palabra di e muhé ku a duna testimonio: "El a bisami tur kos ku mi a hasi."

4:40 Asina ta ku ora ku e samaritanonan a bin serka djE, nan a pidiE pa keda serka nan; i El a keda dos dia einan.

4:41 I hopi mas a kere pa motibu di Su palabra.

4:42 I nan a bisa e muhé: "Awor nos no ta kere mas pa motibu di loke abo a bisa, pasobra nos mes a tende i nos sa ku Esun aki di bèrdat ta e Salbador di mundu."

4:43 I despues di e dos dianan ei El a sali for di einan i a bai Galilea.

4:44 Pasobra Jesus mes a duna testimonio ku un profeta no tin onor den su mes tera.

4:45 Ora ku El a yega Galilea, e galileonan a risibiE, pasobra nan a mira tur kos ku El a hasi na Jerusalèm na e Fiesta di Pasku; pasobra nan mes tambe a bai e Fiesta.

4:46 Asina El a bin atrobe na Kana di Galilea, kaminda El a hasi awa bira biña. I tabatin un ofisial di rei, kende su yu hòmber tabata malu na Kapernaum.

4:47 Ora ku el a tende ku Jesus a sali di Judea bin Galilea, el a bai serka djE i a rogu'E pa bin kura su yu hòmber; pasobra e tabata muriendo.

4:48 Anto Jesus a bis'é: "Si boso no mira señal i milager, boso lo no kere."

4:49 E ofisial di rei a bis'E: "Señor, bin promé ku mi yu muri."

4:50 Jesus a bis'é: "Bai numa; bo yu ta bibu." E hòmber a kere e palabra ku Jesus a papia kuné, i el a bai.

4:51 I mientras ku e tabata na kaminda ainda, su esklabunan a bin kontr'é, i a bis'é ku su yu ta bibu.

4:52 Anto el a puntra nan ki ora el a kuminsá mehorá. I nan a bis'é: "Ayera pa un or di mèrdia e keintura a lagu'é."

4:53 Anto e tata a kòrda ku tabata na e ora ei ku Jesus a bis'é: "Bo yu ta bibu"; i e mes a kere i tur e hendenan di su kas.

4:54 Esaki anto ta e di dos milager ku Jesus a hasi ora ku El a sali di Judea bin Galilea.