Buska den Beibel

Proverbionan 22; Proverbionan 23; Proverbionan 24 BSNP Edita

Proverbionan 22

22:1 Un bon nòmber ta mas di deseá ku gran rikesa, i apresio ta mihó ku plata i oro.

22:2 Riku i pober tin esaki den komun: SEÑOR ta Esun ku a traha nan tur.

22:3 Un hende prudente ta mira maldat i ta skonde, ma e simpelnan ta sigui bai, i ta haña kastigu pa esei.

22:4 E rekompensa di umildat i e temor di SEÑOR ta rikesa, onor i bida.

22:5 Sumpiña i trampa ta den kaminda di e hende pèrvèrso; esun ku ta warda su alma lo keda leu di nan.

22:6 Instruí un mucha den e kaminda ku e mester kana, i asta ora ku e bira bieu e lo no apartá su mes for di djé.

22:7 E riku ta manda riba e pobernan, i e fiadó ta bira esklabu di esun ku ta fi'é.

22:8 Esun ku sembra inikidat lo kosechá banidat, i e bara di su furia lo peresé.

22:9 Esun ku ta generoso lo ta bendishoná, pasobra e ta kompartí su pan ku esun ku ta pober.

22:10 Kore ku e hasidó di bofon i pleitu lo sali bai; sí, pleitu i insulto lo stòp.

22:11 Esun ku ta stima puresa di kurason, i ku su manera di papia ta kariñoso, rei ta su amigu.

22:12 E wowonan di SEÑOR ta preservá konosementu, ma E ta trastorná palabra di e hòmber traishonero.

22:13 E floho ta bisa: "Tin un leon pafó; lo mi wòrdu matá den kaya!"

22:14 E boka di un adúltera ta un pos hundu; esun ku SEÑOR maldishoná lo kai aden.

22:15 Lokura ta mará den kurason di un mucha; bara di korekshon lo alehá esaki for di djé.

22:16 Esun ku oprimí e pober pa oumentá su rikesa, i esun ku duna na e riku, siguramente lo yega na pobresa.

22:17 Inkliná bo orea i tende e palabranan di hende sabí, i dirigí bo kurason na mi konosementu.

22:18 Pasobra lo ta algu agradabel si bo warda nan den bo, pa nan por ta kontinuamente riba bo lepnan.

22:19 Pa bo konfiansa por ta den SEÑOR, mi a siñabo awe, sí, abo.

22:20 No t'asina ku mi a skirbibo kosnan ekselente di konseho i konosementu,

22:21 pa lagabo sa e siguridat di e palabranan di bèrdat, pa bo por kontestá korektamente esun ku a mandabo?

22:22 No hòrta hende pober, pasobra e ta pober, ni oprimí hende afligí na e porta di stat;

22:23 pasobra SEÑOR lo pleita nan kaso, i kita bida di esnan ku ta hòrta nan.

22:24 No sera amistat ku hende ku ta gusta rabia, i no anda ku hende di mal genio,

22:25 pa bo no siña su kamindanan, i pone un trampa pa bo alma.

22:26 No sea un di esnan ku ta para bòrg, un di esnan ku ta para bòrg pa debe.

22:27 Si bo no tin nada pa paga kuné, pakiko nan lo mester kita bo kama fo'i bou di bo?

22:28 No kita marka di e frontera antiguo ku bo tatanan a pone.

22:29 Bo ta mira un hende ku abilidat den su trabou? E lo para dilanti di reinan; e lo no para dilanti di hende insignifikante.

Proverbionan 23

23:1 Ora bo sinta pa kome ku un gobernante, paga bon atenshon na loke tin bo dilanti,

23:2 i pone kuchú na bo garganta, si bo ta un hende golos.

23:3 No deseá su delikatesanan, pasobra esaki ta kuminda engañoso.

23:4 No kansa bo kurpa pa rikesa; stòp di preokupá pa esei.

23:5 Ora bo pone bo bista riba djé, e no t'ei mas. Pasobra rikesa siguramente ta kria hala pa su mes, manera un águila ku ta bula bai laira.

23:6 No kome pan di hende pichiri, ni deseá su delikatesanan;

23:7 pasobra manera e ta pensa den su kurason, asina e ta. E ta bisabo: "Kome i bebe!" ma su kurason no ta ku bo.

23:8 Lo bo saka bèk e boka di kuminda ku bo a kome, i bo palabranan kariñoso lo ta pòrnada.

23:9 No papia den presensia di un bobo, pasobra e lo despresiá e sabiduria di bo palabranan.

23:10 No kita marka di e frontera antiguo, ni drenta kunuku di e wérfanonan.

23:11 Pasobra nan Redentor ta poderoso; E lo pleita nan kaso kontra bo.

23:12 Dirigí bo kurason na instrukshon, i bo oreanan na palabranan di konosementu.

23:13 No keda sin duna un mucha disiplina; maske bo sut'é ku bara, e lo no muri.

23:14 Sut'é ku bara, i libra su alma for di Seol.

23:15 Mi yu, si bo kurason ta sabí, e ora ei mi kurason tambe lo keda kontentu.

23:16 Sí, mi alma lo regosihá, ora bo lepnan papia loke ta korekto.

23:17 No laga bo kurason envidiá pekadó, ma biba semper den e temor di SEÑOR.

23:18 Siguramente tin un futuro, i bo speransa lo no wòrdu kòrtá kitá afó.

23:19 Skucha, mi yu, i sea sabí, i dirigí bo kurason riba e kaminda.

23:20 No anda ku esnan ku ta gusta dal nan biña, ni ku esnan ku ta golos pa kome karni.

23:21 Pasobra e buraché i e hende golos lo bira pober, i kabishamentu lo hasi un hende bisti paña kibrá.

23:22 Skucha na bo tata ku a engendrábo, i no despresiá bo mama ora ku e bira bieu.

23:23 Kumpra bèrdat, i no bend'é, tambe sabiduria, instrukshon i komprendementu.

23:24 Tata di e hustu lo tin gran goso, i esun ku engendrá un yu sabí lo tin delisia den djé.

23:25 Laga bo tata i bo mama ta kontentu, i laga esun ku a hañabo regosihá.

23:26 Mi yu, dunami bo kurason, i laga bo wowo tin delisia den mi kamindanan.

23:27 Pasobra un prostituta ta un buraku hundu, i un adúltera ta un pos smal.

23:28 Sí, e ta skonde lur manera ladron, i ta oumentá e infielnan entre hòmbernan.

23:29 Ken tin ai? Ken tin ferdrit? Ken tin pleitu? Ken tin keho? Ken tin herida sin kousa? Ken tin wowo kòrá?

23:30 Esnan ku ta sinta oranan largu ku biña, esnan ku ta bai pa purba biña mesklá.

23:31 No wak biña ora ku e ta kòrá, ora ku e ta briya den kopa, ora ku e ta baha suave asina;

23:32 na final e ta morde manera kolebra, i ta pika manera víbora.

23:33 Bo wowonan lo mira kosnan straño, i bo kurason lo ekspresá kosnan pèrvèrso.

23:34 Lo bo ta manera un hende drumí meimei di laman, òf manera un hende drumí riba tòp di un master.

23:35 Lo bo bisa: "Nan a dal mi, ma mi no a sinti! Nan a batimi, ma mi no tabata sa mes! Ki ora lo mi spièrta? E ora ei mi ta bolbe buska mas."

Proverbionan 24

24:1 No sea envidioso di hende malbado, ni deseá di ta huntu ku nan;

24:2 pasobra nan kurason ta plania violensia, i nan lepnan ta papia di kalamidat.

24:3 Ku sabiduria un kas ta wòrdu trahá, i ku komprendementu e ta wòrdu stablesí.

24:4 I ku konosementu e kambernan ta wòrdu yená ku tur rikesa presioso i agradabel.

24:5 Un hòmber sabí ta fuerte, i un hòmber di konosementu ta oumentá poder.

24:6 Pa medio di konseho sabí bo ta hasi guera, i den un multitut di konseheronan tin viktoria.

24:7 Sabiduria ta for di alkanse di un bobo; e no ta habri su boka na e porta di stat.

24:8 Esun ku plania maldat, hende lo yam'é un trahadó di kòmplòt.

24:9 Plania lokura ta piká, i e hasidó di bofon ta un abominashon pa hende.

24:10 Si bo desmayá den e dia di angustia, bo forsa ta keda limitá.

24:11 Libra esnan ku ta wòrdu hibá na morto, i salba esnan ku ta kore peliger di wòrdu matá.

24:12 Si bo bisa: "Mira, nos no tabata sa esaki," esun ku ta pisa kurason no ta ripará esei? Esun ku ta warda bo alma no sa esei? I E lo no paga hende segun nan obranan?

24:13 Mi yu, kome miel, pasobra esei ta bon, sí, miel for di panal ta smak dushi den bo boka;

24:14 sabi ku asina sabiduria ta pa bo alma; si bo hañ'é, e ora ei lo tin futuro, i bo speransa lo no wòrdu kòrtá kitá afó.

24:15 O hòmber malbado, no skonde lur kas di e hustu; no destruí su lugá di biba;

24:16 pasobra un hende hustu ta kai shete bes, i ta lanta atrobe, ma e malbadonan ta trompeká den tempu di kalamidat.

24:17 No gosa ora bo enemigu kai, i no laga bo kurason ta kontentu ora ku e trompeká,

24:18 pa SEÑOR no mira esaki i keda malkontentu, i E kita Su rabia for di riba djé.

24:19 No kunsumí pa kousa di hasidónan di maldat, ni sea envidioso di e malbadonan;

24:20 pasobra lo no tin futuro pa e hende malbado; lampi di e malbadonan lo wòrdu pagá.

24:21 Mi yu, teme SEÑOR i rei; no asosiá ku esnan rebelde;

24:22 pasobra direpiente nan kalamidat lo lanta, i ken sa ki ruina e dosnan ei por trese?

24:23 Esakinan tambe ta dichonan di hende sabí. Pa tin distinshon di persona den hasimentu di huisio no ta bon.

24:24 Esun ku bisa e malbado: "Bo ta hustu," pueblonan lo maldishon'é, nashonnan lo abores'é.

24:25 Ma lo bai bon ku esnan ku reprendé e malbado, i un bon bendishon lo bin riba nan.

24:26 Un kontesta korekto ta manera sunchi riba lep.

24:27 Prepará bo trabou pafó, pone tur kos kla pa bo mes den kunuku; i despues traha bo kas.

24:28 No para testigu kontra bo próhimo sin motibu, i no gaña ku bo lepnan.

24:29 No bisa: "Lo mi hasi kuné meskos ku el a hasi ku mi; lo mi paga e hòmber segun su obra."

24:30 Mi a pasa banda di kunuku di un floho, banda di hòfi di wendrùif di un hende ku falta komprendementu.

24:31 I mira, tabatin kadushi ta krese tur kaminda; e superfisio tabata yen-yen di bringamosa. I su transhi a keda bashá abou.

24:32 Ora mi a mira esaki, mi a reflekshoná riba djé; mi a opservá i a risibí instrukshon.

24:33 "Drumi poko mas, kabishá poko mas, drumi poko mas ku man krusá,"

24:34 asina bo pobresa lo bin manera un ladron, i bo nesesidat manera un hòmber armá.