Buska den Beibel

Proverbionan 19; Proverbionan 20; Proverbionan 21 BSNP Edita

Proverbionan 19

19:1 Mihó un hende pober ku ta kana den su integridat, ku un hende ku tin boka pèrvèrso i ta bobo tambe.

19:2 Tampoko no ta bon pa hende ta sin konosementu; i esun ku ta purá ku su pianan ta peka.

19:3 Lokura di un hende ta ruiná su kaminda, i den su kurason e ta bira razu kontra SEÑOR.

19:4 Rikesa ta trese hopi amigu, ma amigu di un hende pober ta bandon'é.

19:5 Un testigu falsu no ta keda sin kastigu, i esun ku ta papia mentira no ta skapa.

19:6 Hopi ta esnan ku ta buska fabor di hende generoso, i tur hende ta amigu di esun ku ta duna regalo.

19:7 Tur ruman di e hende pober ta odi'é; kuantu mas su amigunan ta hala leu for di djé! E ta buska nan ku palabra, ma nan no t'ei mas.

19:8 Esun ku haña sabiduria ta stima su mes alma; esun ku warda komprendementu lo haña bondat.

19:9 Un testigu falsu lo no keda sin kastigu, i esun ku papia mentira lo peresé.

19:10 Luho no ta pas pa un bobo, muchu menos pa un esklabu goberná riba prensnan.

19:11 Prudensia di un hende ta hasi ku e no ta rabia lihé, i pa laga un ofensa pasa ta su gloria.

19:12 Furia di un rei ta manera e gruñamentu di leon, ma su grasia ta manera serena riba yerba.

19:13 Un yu bobo ta kalamidat pa su tata, i pleitamentu di un esposa ta manera gota di awa ku ta lèk konstantemente.

19:14 Kas i rikesa ta erensia di tatanan, ma un esposa prudente ta di SEÑOR.

19:15 Flohedat ta pone hende kai den soño profundo, i un hende ku sinta pòrnada lo sufri hamber.

19:16 Esun ku warda e mandamentu ta warda su alma, ma esun ku deskuidá su kamindanan lo muri.

19:17 Esun ku tene miserikòrdia di un hende pober ta fia SEÑOR, i E lo pagu'é bèk pa su bon obra.

19:18 Disipliná bo yu mientras ku tin speransa ainda, i no deseá su morto.

19:19 Un hende di mal rabia lo sufri kastigu, pasobra si bo reskat'é, lo bo tin ku hasié atrobe.

19:20 Skucha konseho i aseptá disiplina, pa bo por ta sabí pa restu di bo bida.

19:21 Tin hopi plan den kurason di hende, ma e konseho di SEÑOR, esei lo permanesé.

19:22 Loke ta deseabel den un hende ta su kariño; i un hende pober ta mihó ku un gañadó.

19:23 E temor di SEÑOR ta kondusí na bida, asina ku un hende por drumi trankil, sin miedu di maldat.

19:24 Un floho ta hinka su man den tayó, i ni sikiera ta hib'é bèk na su boka.

19:25 Suta un hasidó di bofon, i un simpel lo bira spièrtu, i koregí un ku tin komprendementu, i e lo haña konosementu.

19:26 Esun ku maltratá su tata i kore ku su mama ta un yu ku ta kousa bèrguensa i ta trese reproche.

19:27 Stòp di skucha instrukshon, mi yu, i lo bo desviá for di e palabranan di konosementu.

19:28 Un testigu pèrvèrso ta hasi bofon di hustisia, i boka di e malbado ta guli inikidat.

19:29 Huisio ta prepará pa hasidó di bofon, i sla pa lomba di bobo.

Proverbionan 20

20:1 Biña ta un hasidó di bofon, bibida stèrki un borotadó; i esun ku ta bou di su influensia no ta sabí.

20:2 E furia di un rei ta manera e gruñamentu di leon; esun ku probok'é na rabia ta peka kontra su mes alma.

20:3 Evitá pleitu ta un onor pa un hende, ma tur bobo ta kla pa pleita.

20:4 Den hèrfst e floho no ta plug; pesei e ta pidi den tempu di kosecha, ma e no ta haña nada.

20:5 Un plan den kurason di un hende ta manera awa hundu, ma un hende di komprendementu ta saka esaki afó.

20:6 Hopi hende ta proklamá nan mes lealtat, ma ken por haña un hende konfiabel?

20:7 Un hende hustu ku ta kana den su integridat, ki bendishoná su yunan ta despues di djé.

20:8 Un rei ku ta sinta riba trono di hustisia ta sefta tur maldat ku su wowonan.

20:9 Ken por bisa: "Mi a limpia mi kurason, mi ta limpi di mi piká"?

20:10 Peso falsu i midí falsu, tur dos ta abominashon pa SEÑOR.

20:11 Te asta un mucha ta konosí pa su echonan, si su kondukta ta puru i rekto.

20:12 Orea ku ta tende i wowo ku ta mira, SEÑOR a traha tur dos.

20:13 No stima soño, pa bo no bira pober; habri bo wowo, i lo bo tin pan na abundansia.

20:14 E kumpradó ta bisa: "E no ta bon, e no ta bon"; ma ora ku e bira bai, e ora ei sí e ta gaba.

20:15 Tin oro i rubí na kantidat, ma lepnan prudente ta prenda presioso.

20:16 Kohe paña di esun ku ta para bòrg pa un deskonosí, i tene é mes komo garantia ora ku e para bòrg pa stranheronan.

20:17 Pan hañá ku engaño ta dushi pa un hende, ma despues su boka lo ta yen di greis.

20:18 Traha plan dor di buska konseho; i si bo bai guera, bai bou di bon guiansa.

20:19 Esun ku ta kana hasi redu ta saka sekreto; pesei, no asosiá ku esun ku tin lenga lòs.

20:20 Esun ku maldishoná su tata òf su mama, su lampi lo wòrdu pagá den tempu di skuridat profundo.

20:21 Un erensia hañá muchu lihé na prinsipio lo no ta bendishoná na fin.

20:22 No bisa: "Lo mi paga maldat bèk"; spera riba SEÑOR i E lo salbabo.

20:23 Peso falsu ta un abominashon pa SEÑOR, i un balansa engañoso no ta bon.

20:24 Ta SEÑOR ta dirigí pasonan di hende; pues, kon un hende por komprendé su mes kaminda?

20:25 Ta un trampa pa un hende bisa sin pensa: "Esaki ta santu!" i despues di a hasi e promesa, e bai reflekshoná riba kiko el a hasi.

20:26 Un rei sabí ta sefta e malbadonan, i ta pasa e wil riba nan.

20:27 E spiritu di hende ta e lampi di SEÑOR, ku ta skudriñá e profundidat di su kurason.

20:28 Lealtat i bèrdat ta preservá rei, i pa medio di hustisia e ta sostené su trono.

20:29 Gloria di hende yòn ta nan forsa, i onor di hende bieu ta nan kabei blanku.

20:30 Sota ku ta heridá ta limpia saka maldat afó, i sla ta purifiká profundidat di kurason.

Proverbionan 21

21:1 Manera riunan di awa, asina kurason di rei ta den e man di SEÑOR; E ta bir'é pa unda ku E kier.

21:2 Tur kaminda di hende ta rekto den su mes bista, ma SEÑOR ta pisa kurason.

21:3 Hasi hustisia i huisio ta mas aseptabel pa SEÑOR ku sakrifisio.

21:4 Un mirada orguyoso, un kurason halsá, i e lampi di e malbado ta piká.

21:5 E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.

21:6 Un tesoro hañá pa medio di un lenga engañoso ta damp ku ta pasa lihé, un trampa mortal.

21:7 Violensia di e malbado lo lastr'é bai kuné, pasobra e ta nenga di hasi huisio.

21:8 E kaminda di un hende kulpabel ta trosí, ma pa loke ta e hende puru, su kondukta ta rekto.

21:9 Mihó biba den un skina riba dak, ku biba den un kas huntu ku un muhé pleitadó.

21:10 Alma di e malbado ta deseá maldat; su próhimo no ta haña grasia den su bista.

21:11 Ora ku e hasidó di bofon wòrdu kastigá, e simpel ta bira sabí, ma ora ku e sabí wòrdu instruí, e ta haña konosementu.

21:12 E hustu ta opservá kas di e malbado, e ta entregá e malbadonan na ruina.

21:13 Esun ku sera su orea pa sklamashon di e pober, e tambe lo sklama, ma lo no wòrdu kontestá.

21:14 Un regalo na sekreto ta kalma rabia, i plaka pasá bou di mesa ta kalma furia pisá.

21:15 Pa ehekutá hustisia ta goso pa e hustu, ma ta teror pa e hasidónan di inikidat.

21:16 Un hende ku dwal kita for di e kaminda di komprendementu lo reposá den e asamblea di e mortonan.

21:17 Esun ku gusta plaser lo bira un hende pober; esun ku gusta biña i zeta lo no bira riku.

21:18 E malbado ta preis di reskate pa e hustu, i e infiel pa e rekto.

21:19 Mihó biba den desierto, ku biba huntu ku un muhé pleitadó i rabiadó.

21:20 Tin tesoro presioso i zeta den kas di e sabí, ma un hende bobo ta drispidí tur loke e tin.

21:21 Esun ku aspirá na hustisia i lealtat ta haña bida, hustisia i onor.

21:22 Un hende sabí ta subi muraya di stat di e poderoso, i ta bash'abou e fortalesa den kual nan ta konfia.

21:23 Esun ku warda su boka i su lenga ta warda su alma di angustia.

21:24 Un hende orguyoso i arogante-- "Hasidó di bofon" ta su nòmber; e ta aktua ku orguyo insolente.

21:25 Deseo di e floho ta mat'é, pasobra su mannan ta nenga di traha.

21:26 E ta pasa henter dia ta kudishá, mientras ku e hustu ta duna sin tene nada atras.

21:27 Sakrifisio di e malbado ta un abominashon, kuantu mas ora ku e tres'é ku mal intenshon.

21:28 Un testigu falsu lo peresé, ma palabra di un hende obedesido lo permanesé.

21:29 Un hende malbado ta sera su kara, ma e hende rekto ta stablesé su kaminda.

21:30 No tin sabiduria, ni komprendementu, ni konseho kontra SEÑOR.

21:31 E kabai ta wòrdu prepará pa e dia di bataya, ma viktoria ta pertenesé na SEÑOR.