Buska den Beibel

Proverbionan 7; Proverbionan 8; Proverbionan 9 BSNP Edita

Proverbionan 7

7:1 Mi yu, warda mi palabranan, i warda mi mandamentunan manera tesoro den bo.

7:2 Warda mi mandamentunan i biba, i mi siñansa manera bo pret'i wowo.

7:3 Mara nan na bo dedenan; skirbi nan riba tabla di bo kurason.

7:4 Bisa sabiduria: "Bo ta mi ruman muhé," i yama komprendementu bo amigu íntimo,

7:5 pa nan wardabo for di e adúltera, for di e muhé stranhero ku ta labia ku su palabranan.

7:6 Pasobra na bentana di mi kas mi tabata wak dor di yalusí,

7:7 i mi a mira entre e simpelnan, mi a ripará entre e hobennan, un hoben ku falta komprendementu

7:8 ta pasa den e kaya pegá ku e skina, kaminda e muhé ta biba; i el a kohe kaminda pa e kas

7:9 den skuritu, ora nochi ta sera, mei anochi i den skuridat.

7:10 I ata un muhé ta sali kontr'é, bistí manera prostituta, i ku astusia den su kurason.

7:11 E ta un hasidó di beheit i ta rebelde; su pianan no ta para na su kas.

7:12 Tin biaha e ta den kaya, otro biaha at'é riba plenchi ta lur na tur skina.

7:13 Asina e ta gara e hoben i ta sunch'é, i ku kara seku e ta bis'é:

7:14 "Mi a primintí di ofresé sakrifisionan di pas; awe mi a kumpli ku mi promesanan.

7:15 Pesei mi a sali pa kontrabo, pa ansiosamente buskabo pa mira, i mi a hañabo.

7:16 Mi a drecha mi kama ku paña di lino fini di tur koló for di Egipto.

7:17 Mi a sprèngu mi kama ku mirra, aloé i kané.

7:18 Ban, laga nos bebe di amor te ora dia habri; laga nos gosa di amor.

7:19 Pasobra mi esposo no ta na kas; el a bai hasi un biahe largu;

7:20 el a bai ku un saku di plaka den su man; te dia ku luna ta yen e ta bin kas."

7:21 Ku su kantidat di palabranan e ta konvens'é; ku su labiamentu e ta sedusié.

7:22 Mesora e hoben ta bai su tras, manera un buey ta bai pa wòrdu matá, manera un bobo mará na kadena,

7:23 te ora ku un flecha traspasá su higra; manera un parha ta pura bai na trampa, asina e no sa ku esaki lo kost'é su bida.

7:24 Pesei awor, mi yu hòmbernan, skuchami, i paga atenshon na e palabranan di mi boka.

7:25 No laga bo kurason desviá bai den su kamindanan; no dwal bai den su berehanan.

7:26 Pasobra hopi ta e víktimanan ku el a bent'abou, i na gran kantidat, tur esnan ku el a mata.

7:27 Su kas ta e kaminda pa Seol, ku ta baha bai na e kambernan di morto.

Proverbionan 8

8:1 Sabiduria no ta yama? I komprendementu no ta halsa su bos?

8:2 Riba e lugánan haltu banda di kaminda, kaminda e berehanan ta krusa otro, e ta bai para;

8:3 banda di e portanan, na entrada di e stat, na entrada di e portanan, e ta grita na bos haltu:

8:4 "Na boso, O hòmbernan, mi ta yama, i mi bos ta dirigí na e yunan di hende.

8:5 O boso, simpelnan, diserní prudensia, i boso, bobonan, diserní sabiduria.

8:6 Skucha, pasobra lo mi papia kosnan ekselente; i lo mi habri mi lepnan pa papia loke ta korekto.

8:7 Pasobra mi boka lo papia bèrdat, i maldat ta abominashon pa mi lepnan.

8:8 Tur e palabranan di mi boka ta hustu; no tin nada trosí ni pèrvèrso den nan.

8:9 Nan tur ta masha kla pa esun ku ta komprendé, i korekto pa esnan ku tin konosementu.

8:10 Risibí mi instrukshon, i no plata, i mas bien konosementu ku oro puru.

8:11 Pasobra sabiduria ta mihó ku rubí, i tur loke hende por deseá no ta di kompará kuné.

8:12 "Ami, sabiduria, ta biba huntu ku prudensia, i mi ta haña konosementu i prudensia.

8:13 E temor di SEÑOR ta pa odia maldat; orguyo, arogansia i mal kaminda, i un boka pèrvèrso, mi ta odia.

8:14 Konseho ta di mi, i sabiduria sano; ami ta komprendementu; poder ta di mi.

8:15 Pa medio di mi reinan ta reina, i gobernantenan ta determiná hustisia.

8:16 Pa medio di mi prensnan ta goberná, i nobelnan tambe, tur ku ta huzga ku rektitut.

8:17 Mi ta stima esnan ku ta stimami; i esnan ku buskami ku diligensia lo hañami.

8:18 Rikesa i onor ta serka mi, rikesa bèrdadero i hustisia.

8:19 Mi fruta ta mihó ku oro, sí, mihó ku oro fini, i loke mi ta produsí ta mihó ku plata puru.

8:20 Mi ta kana den e kaminda di hustisia, meimei di e berehanan di huisio,

8:21 pa mi por hasi esnan ku ta stimami eredá rikesa, pa mi por yena nan lugánan-di-warda-tesoro.

8:22 "SEÑOR a kreami na prinsipio di Su kaminda, promé ku Su obranan di promé aya.

8:23 For di etèrnidat mi tabata stablesí, for di prinsipio, promé ku tera tabata eksistí.

8:24 Tempu ku no tabatin profundidatnan mi a nase, tempu ku no tabatin fuentenan ku abundansia di awa.

8:25 Promé ku e serunan a wòrdu poní na nan lugá, promé ku e seritunan mi a nase;

8:26 tempu ku E no a traha tera ainda, ni e sabananan, ni e prinsipio di stòf di mundu.

8:27 Ora ku El a stablesé e shelunan, mi tabat'ei, ora ku El a marka un sírkulo riba superfisio di e profundidat,

8:28 ora ku El a stablesé e nubianan aya riba, ora ku El a fortifiká e fuentenan di e profundidat,

8:29 ora ku El a pone pa laman su límite, pa e awa no transgresá Su mandamentu, tempu ku El a marka e fundeshinan di tera;

8:30 e tempu ei mi tabata na Su lado, manera un trahadó eksperto, i dia tras dia mi tabata Su delisia, regosihando semper Su dilanti,

8:31 regosihando den e mundu, Su tera, i mi delisia tabata den e yunan di hende.

8:32 "Pesei anto, O yunan, skuchami, pasobra bendishoná ta esnan ku ta warda mi kamindanan.

8:33 Paga tino na instrukshon i sea sabí, i no neglishá esaki.

8:34 Bendishoná ta e hende ku ta skuchami, ku dia tras dia ta vigilá na mi portanan, ku ta spera na mi koseinnan-di-porta.

8:35 Pasobra esun ku hañami, ta haña bida, i ta risibí grasia for di SEÑOR.

8:36 Ma esun ku peka kontra mi ta hasi daño na su mes alma; tur esnan ku ta odiami ta stima morto."

Proverbionan 9

9:1 Sabiduria a traha su kas, el a kap forma su shete pilarnan;

9:2 el a mata su bestianan, el a meskla su biña, tambe el a pone su mesa;

9:3 el a manda su kriánan, e ta grita riba e lugánan di mas haltu di e stat:

9:4 "Esun ku ta simpel, lagu'é bin aki!" Na esun ku ta falta komprendementu e ta bisa:

9:5 "Bin, kome di mi pan, i bebe di e biña ku mi a meskla.

9:6 Bandoná bobedat i biba, i sigui den e kaminda di komprendementu."

9:7 Esun ku koregí un hasidó di bofon ta trese desonor riba su mes, i esun ku reprendé un malbado, e mes ta keda tur blousá.

9:8 No reprendé un hasidó di bofon, pa e no odiabo; reprendé un hende sabí, i e lo stimabo.

9:9 Duna instrukshon na un hende sabí, i e lo bira mas sabí ainda; siña un hende hustu, i e lo krese den siñansa.

9:10 E temor di SEÑOR ta e prinsipio di sabiduria, i e konosementu di Esun Santu ta komprendementu.

9:11 Pasobra pa medio di mi bo dianan lo wòrdu multipliká, i añanan lo wòrdu añadí na bo bida.

9:12 Si bo ta sabí, ta pa bo mes bo ta sabí, ma si bo hasi bofon, ta bo so lo karga esaki.

9:13 Un muhé bobo ta hasi beheit; e ta sin tino, e no sa nada.

9:14 E ta sinta na entrada di su kas, riba un asiento na e lugánan mas haltu di e stat,

9:15 yamando esnan ku ta pasa, kendenan ta hasi nan berehanan stret:

9:16 "Laga tur ku ta sin tino bin akinan," i na esun ku falta komprendementu e ta bisa:

9:17 "Awa hòrtá ta dushi, i pan komí na sekreto ta agradabel."

9:18 Ma e no sa ku e mortonan ta einan, ku su invitadonan ta den e profundidatnan di Seol.