Buska den Beibel

Proverbionan 27; Proverbionan 28; Proverbionan 29 BSNP Edita

Proverbionan 27

27:1 No gaba tokante di e dia di mañan, pasobra bo no sa kiko un dia por trese.

27:2 Laga un otro gababo, i no bo mes boka, un hende straño, i no bo mes lepnan.

27:3 Piedra ta pisá, i santu ta pisa hopi, ma furia di un bobo ta mas pisá ku tur dos.

27:4 Furia ta kruel i rabia ta un diluvio, ma ken por bestan ku hende yalurs?

27:5 Reprendementu duná ku tur frankesa ta mihó ku amor skondí.

27:6 Fiel ta e heridanan di un amigu, ma engañoso ta e sunchinan di un enemigu.

27:7 Un hende barika yen ta despresiá miel, ma pa un hende ku tin hamber tur kos marga ta smak dushi.

27:8 Manera un parha ku ta dwal bai for di su neishi, asina ta un hende ku ta dwal bai for di su kas.

27:9 Unguente i perfume ta hasi kurason kontentu, meskos ku dulsura di konseho, ku ta sali for di kurason di un amigu, ta hasi.

27:10 No bandoná bo amigu ni amigu di bo tata, ni bai kas di bo ruman den dia di bo kalamidat; mihó un bisiña ku ta serka ku un ruman ku ta leu.

27:11 Sea sabí, mi yu, i hasi mi kurason kontentu, pa mi por kontestá esun ku reprochámi.

27:12 Un hende prudente ta mira maldat i ta skonde, ma e simpelnan ta sigui nan kaminda i ta wòrdu kastigá.

27:13 Kohe paña di esun ku ta para bòrg pa un stranhero, i tene é mes komo garantia ora ku e para bòrg pa un adúltera.

27:14 Esun ku lanta bendishoná su amigu na bos haltu mainta tempran, esaki lo konta komo maldishon p'é.

27:15 Lèkmentu konstante riba un dia di hopi awaseru, i un muhé pleitadó, ta meskos.

27:16 Esun ku purba want'é ta wanta bientu, i ta gara zeta ku su man drechi.

27:17 Manera heru ta mula heru, asina un hende ta mula kara di su amigu.

27:18 Esun ku kuida e palu di figo lo kome di su fruta; esun ku kuida su shon lo wòrdu onrá.

27:19 Meskos ku den awa kara ta reflehá kara, asina kurason di hende ta reflehá hende.

27:20 Seol i Abadon nunka tin basta, tampoko wowo di hende.

27:21 Wea pa dirti metal ta pa plata i fòrnu pa oro, ma hende ta wòrdu probá dor di elogio ku e ta risibí.

27:22 Maske bo bati un bobo den un pilon ku un stamper, huntu ku pipita di mainshi, tòg su bobedat no ta kita for di djé.

27:23 Sea sigur ku bo konosé kondishon di bo tounan di karné, i wak bon pa bo krianan di bestia,

27:24 pasobra rikesa no ta pa semper, tampoko un korona no ta dura di generashon pa generashon.

27:25 Ora yerba seku disparsé, yerba nobo ta aparesé, i e yerbanan di e serunan ta wòrdu rekohí.

27:26 E lamchinan lo ta pa bo paña di bisti, i e kabritunan chubatu pa e preis di un kunuku.

27:27 I lo tin lechi di kabritu sufisiente pa bo kuminda, pa kuminda di bo kas i pa manteneshon di bo sirbientenan.

Proverbionan 28

28:1 E malbado ta hui sin ku ni un hende ta pèrsiguié, ma e hustu ta wapu manera leon.

28:2 Ora ku un pais ta rebelde, e tin hopi gobernante, ma un hende ku komprendementu i konosementu ta mantené òrdu.

28:3 Un hende pober ku ta oprimí e pobernan ta manera awaseru pisá ku ta ruiná kosecha.

28:4 Esnan ku bandoná lei ta elogiá e malbadonan, ma esnan ku warda lei ta resistí nan.

28:5 Hende malbado no ta komprendé hustisia, ma esnan ku ta buska SEÑOR ta komprendé tur kos.

28:6 Mihó un pober ku ta kana den su integridat, ku esun ku ta pèrvèrso den su kaminda, maske e ta riku.

28:7 Esun ku warda lei ta un yu prudente, ma esun ku ta kompañero di hende golos ta pone su tata na bèrguensa.

28:8 Esun ku oumentá su rikesa pa medio di interes i ganashi inhustu ta rekohé esaki pa esun ku tin miserikòrdia di e hende pober.

28:9 Esun ku hasi su mes sordo pa no skucha lei, asta su orashon ta un abominashon.

28:10 Esun ku hasi e hustunan dwal bai den mal kaminda lo kai den su mes buraku; ma e perfektonan lo eredá un bon erensia.

28:11 E hende riku ta sabí den su mes bista, ma e pober ku tin komprendementu ta skudriñ'é.

28:12 Ora ku e hustunan triunfá, gloria ta grandi, ma ora ku e malbadonan lanta kabes, hende ta bai skonde.

28:13 Esun ku skonde su pikánan lo no prosperá, ma esun ku konfesá i laga nan lo haña miserikòrdia.

28:14 Bendishoná ta e hende ku semper tin temor, ma esun ku hasi su kurason duru lo kai den kalamidat.

28:15 Manera un leon ku ta gruña i un ber hambrá, asina ta un malbado ku ta goberná un pueblo pober.

28:16 Un lider ku ta un gran opresor ta falta komprendementu, ma esun ku ta odia ganashi inhustu lo prolongá su dianan.

28:17 Un hende ku ta kargá ku kulpa di sanger humano lo keda un fugitivo te na su morto; no laga ningun hende sosten'é.

28:18 Esun ku kana den rektitut lo wòrdu salbá, ma esun ku ta pèrvèrso den su kamindanan lo kai direpiente.

28:19 Esun ku kultivá su tera lo tin pan na abundansia, ma esun ku sigui kosnan bano lo tin hopi pobresa.

28:20 Un hende fiel lo ta yen di bendishon, ma esun ku ta purá pa bira riku lo no keda sin kastigu.

28:21 No ta bon pa tin distinshon di persona, pasobra pa un pida pan un hende lo transgresá.

28:22 Un hende pichiri ta purá pa bira riku, i e no sa ku pobresa lo bin riba djé.

28:23 Esun ku ta reprendé un hende, despues lo haña mas apresio ku esun ku ta labia ku su lenga.

28:24 Esun ku hòrta su tata òf su mama, i ta bisa: "Esei no ta transgreshon," ta kompañero di un hende ku ta destruí.

28:25 Un hende arogante ta lanta pleitu, ma esun ku konfia den SEÑOR lo prosperá.

28:26 Esun ku konfia den su mes kurason ta un bobo, ma esun ku kana ku sabiduria lo wòrdu librá.

28:27 Esun ku duna na pober lo no tin falta di nada, ma esun ku sera su wowo lo risibí hopi maldishon.

28:28 Ora ku e malbadonan haña poder, hende ta skonde, ma ora nan peresé, e hustunan ta oumentá.

Proverbionan 29

29:1 Esun ku wòrdu reprendí hopi biaha i tòg ta hasi su nèk steif, lo wòrdu kibrá direpiente, sin remedi.

29:2 Ora ku e hustunan oumentá, pueblo ta regosihá, ma ora ku un malbado ta goberná, pueblo ta suspirá.

29:3 Esun ku stima sabiduria ta hasi su tata kontentu, ma esun ku anda ku prostituta ta malgastá su rikesa.

29:4 Pa medio di huisio rei ta stablesé e tera, ma un hende ku tuma plaka pasá bou di mesa ta destruié.

29:5 Un hende ku ta labia su próhimo ta span un nèt pa su pianan.

29:6 Un malbado ta kai den trampa di su mes transgreshon, ma e hustu ta kanta i ta regosihá.

29:7 E hustu ta konsiderá derecho di e pobernan, ma e malbado no ta komprendé un kos asina.

29:8 Hasidónan di bofon ta pega un stat na kandela, ma hende sabí ta kalma rabia.

29:9 Ora ku un hende sabí tin un diskushon ku un hende bobo, e bobo ta bira razu òf e ta hari; i no tin pas.

29:10 Hòmbernan dramadó di sanger ta odia esun ku ta perfekto, ma e hustunan ta buska su bienestar.

29:11 Un bobo ta duna rienda suelta na su rabia, ma un sabí ta wanta esaki aden.

29:12 Si un gobernante paga atenshon na mentira, tur su sirbidónan ta bira malbado.

29:13 E hende pober i e opresor tin esaki den komun: SEÑOR ta iluminá wowo di tur dos.

29:14 Si un rei huzga e pobernan segun bèrdat, su trono lo ta stablesí pa semper.

29:15 Bara i reprendementu ta duna sabiduria, ma un yu lagá pa su kuenta ta pone su mama na bèrguensa.

29:16 Ora ku e malbadonan oumentá, transgreshon ta oumentá, ma e hustunan lo mira nan kaída.

29:17 Koregí bo yu, i e lo dunabo trankilidat; sí, e lo hasi bo alma kontentu.

29:18 Kaminda no tin vishon e pueblo ta laga tur frena bai, ma felis ta esun ku ta warda lei.

29:19 Un esklabu lo no wòrdu koregí ku palabra so, pasobra maske e ta komprendé, e lo no kontestá.

29:20 Bo ta mira un hende ku ta muchu lihé ku su palabranan? Tin mas speransa pa un bobo ku p'é.

29:21 Esun ku mima su esklabu for di chikitu, na final e lo tin é komo yu.

29:22 Un hende rabiá ta lanta pleitu, i un hende furioso ta hasi hopi transgreshon.

29:23 Orguyo di un hende lo rebah'é, ma esun ku ta di spiritu umilde lo risibí onor.

29:24 Esun ku ta kómplise di un ladron ta su mes enemigu; e ta hañ'é obligá di hura, ma no ta tribi bisa nada.

29:25 Temor pa hende ta pone un trampa, ma esun ku konfia den SEÑOR lo ta halsá.

29:26 Hopi ta buska fabor di un gobernante, ma ta for di SEÑOR hende ta haña hustisia.

29:27 Un hende inhustu ta un abominashon pa e hustunan, i esun ku ta kana den rektitut ta un abominashon pa e malbado.