Buska den Beibel

Proverbionan 13; Proverbionan 14; Proverbionan 15 BSNP Edita

Proverbionan 13

13:1 Un yu sabí ta aseptá disiplina di su tata, ma un hasidó di bofon no ta hasi kaso di reprendementu.

13:2 Un bon hende ta kome bon for di e fruta di su boka, ma deseo di e traidó ta violensia.

13:3 Esun ku warda su boka ta preservá su bida, ma esun ku habri su boka hanchu ta kaba na ruina.

13:4 Alma di e hende floho ta antohá i no ta haña nada, ma alma di e hende balente ta keda satisfecho.

13:5 Un hende hustu ta odia mentira, ma un hende malbado ta aktua na un manera repugnante i bèrgonsoso.

13:6 Hustisia ta warda esun ku su kaminda ta perfekto, ma maldat ta trastorná e pekadó.

13:7 Tin ku ta pretendé di ta riku, ma no tin nada; otro ta pretendé di ta pober, ma tin gran rikesa.

13:8 Preis di reskate pa bida di un hende ta su rikesa, ma e pober no ta tende ningun amenasa.

13:9 Lus di e hustu ta briya kla, ma lampi di e malbado ta paga.

13:10 Orguyo ta okashoná pleitu so, ma sabiduria ta ku esnan ku ta aseptá konseho.

13:11 Rikesa hañá dor di engaño lo mengua, ma esun ku rekohé dor di trabou ta oumentá esaki.

13:12 Speransa posponí ta hasi e kurason sinti malu, ma deseo kumplí ta un palu di bida.

13:13 Esun ku despresiá instrukshon lo paga pesei, ma esun ku teme e mandamentu lo wòrdu rekompensá.

13:14 Siñansa di e hende sabí ta un fuente di bida, pa evitá e trampanan di morto.

13:15 Bon komprendementu ta produsí grasia, ma kaminda di e transgresornan ta duru.

13:16 Tur hende prudente ta trata ku konosementu, ma un bobo ta manifestá lokura.

13:17 Un mensahero malbado ta kai den atversidat, ma un embahador fiel ta trese kuramentu.

13:18 Pobresa i bèrguensa lo bin riba esun ku neglishá instrukshon, ma esun ku hasi kaso di korekshon lo wòrdu onrá.

13:19 Deseo kumplí ta agradabel pa e alma, ma pa apartá su mes for di maldat ta un abominashon pa e bobonan.

13:20 Esun ku anda ku hende sabí lo ta sabí, ma un kompañero di hende bobo lo sufri daño.

13:21 Atversidat ta pèrsiguí pekadónan, ma e hustunan lo wòrdu rekompensá ku prosperidat.

13:22 Un bon hende ta laga un erensia pa yunan di su yunan, i rikesa di e pekadó ta wardá pa e hustu.

13:23 Tin abundansia di kuminda den kunuku di e pober, ma esei ta bai pèrdí pa falta di hustisia.

13:24 Esun ku laga di uza bara ta odia su yu, ma esun ku ta stim'é ta disiplin'é for di tempran.

13:25 E hustu tin sufisiente pa satisfasé su apetit, ma stoma di e malbadonan ta pidi ketu bai.

Proverbionan 14

14:1 E muhé sabí ta traha su kas, ma esun bobo ta bash'é abou ku su mes man.

14:2 Esun ku ta kana den rektitut ta teme SEÑOR, ma esun ku ta pèrvèrso den su kamindanan ta despresi'E.

14:3 Den boka di e bobo tin un bara pa su lomba, ma lepnan di e sabínan lo preservá nan.

14:4 Kaminda no tin buey, stal ta keda limpi, ma dor di forsa di buey tin gran abundansia.

14:5 Un testigu fiel no ta gaña, ma un testigu falsu ta papia mentira.

14:6 Un hasidó di bofon ta buska sabiduria i no ta hañ'é, ma konosementu ta fasil pa esun ku tin komprendementu.

14:7 Bandoná e presensia di un hende bobo, sino lo bo no diserní palabranan di konosementu.

14:8 Sabiduria di e prudente ta pa komprendé su kaminda, ma bobedat di e bobonan ta engaño.

14:9 Hende bobo ta hasi bofon di piká, ma e fabor di Dios ta biba meimei di e rektonan.

14:10 E kurason konosé su mes amargura, i un deskonosí no ta kompartí den su goso.

14:11 Kas di e malbadonan lo wòrdu destruí, ma tènt di e rektonan lo floresé.

14:12 Tin un kaminda ku ta parse bon den bista di hende, ma su fin ta e kaminda di morto.

14:13 Asta den harimentu kurason por tin doló, i goso por kaba na pena.

14:14 Esun ku ta infiel den su kurason lo fada di su mes kamindanan, ma un bon hende lo keda satisfecho ku esun di djé.

14:15 E hende simpel ta kere tur kos, ma e hòmber prudente ta wak bon unda e ta bai.

14:16 Un hende sabí ta kouteloso, i ta apartá su mes for di maldat, ma e bobo ta arogante i sin kuidou.

14:17 Un hende ku ta rabia lihé ta hasi ko'i bobo, i un hende ku mal intenshon ta wòrdu odiá.

14:18 E simpelnan ta eredá lokura, ma e prudentenan ta koroná ku konosementu.

14:19 E malbadonan lo bùig pa e bonnan, i e impionan lo bùig na e portanan di hende hustu.

14:20 E pober ta wòrdu odiá asta dor di su bisiña, ma e riku tin hopi amigu.

14:21 Esun ku despresiá su próhimo ta hasi piká, ma esun ku tin miserikòrdia di e pobernan ta felis.

14:22 Esnan ku ta plania maldat no ta kana dwal? Ma lo tin miserikòrdia i bèrdat pa esnan ku ta plania bondat.

14:23 Den tur trabou tin ganashi, ma djis papia ku boka so ta kondusí na pobresa.

14:24 Korona di e sabínan ta nan rikesa, ma bobedat di e bobonan ta lokura.

14:25 Un testigu bèrdadero ta salba bidanan, ma esun ku papia mentira ta traishonero.

14:26 Den e temor di SEÑOR tin konfiansa fuerte, i su yunan lo tin un lugá di refugio.

14:27 E temor di SEÑOR ta un fuente di bida, pa evitá e trampanan di morto.

14:28 Un poblashon grandi ta gloria di un rei, ma skarsedat di hende ta ruina di un prens.

14:29 Esun ku no ta rabia lihé tin gran komprendementu, ma esun ku ta rabia lihé ta halsa bobedat.

14:30 Un kurason trankil ta bida pa e kurpa, ma envidia ta putrimentu di wesu.

14:31 Esun ku oprimí e pober ta insultá Esun ku a trah'é, ma esun ku tene miserikòrdia di esun den nesesidat ta onr'E.

14:32 E malbado ta keda bentá abou den su maldat, ma e hustu tin un refugio na ora di su morto.

14:33 Sabiduria ta reposá den kurason di esun ku tin komprendementu, i asta entre e bobonan e ta hasi su mes konosí.

14:34 Hustisia ta halsa un nashon, ma piká ta un bèrguensa pa kualke nashon.

14:35 Rei tin delisia den un sirbidó sabí, ma su rabia ta kontra esun ku ta kousa bèrguensa.

Proverbionan 15

15:1 Un kontesta suave ta kita rabia, ma un palabra skèrpi ta lanta rabia.

15:2 Lenga di e sabínan ta uza konosementu korektamente, ma boka di e bobonan ta brota lokura.

15:3 E wowonan di SEÑOR ta tur kaminda, vigilando malu i bon.

15:4 Un lenga suave ta un palu di bida, ma pèrvèrsidat den djé ta kibra e spiritu.

15:5 Un bobo ta despresiá disiplina di su tata, ma esun ku aseptá reprendementu ta prudente.

15:6 Den kas di e hustu tin hopi rikesa, ma den ganashi di e malbado tin problema.

15:7 Lepnan di e sabínan ta plama konosementu, ma kurason di e bobonan no ta hasi asina.

15:8 Sakrifisio di e malbadonan ta abominashon pa SEÑOR, ma orashon di e rektonan ta Su delisia.

15:9 Kaminda di e malbado ta abominashon pa SEÑOR, ma E ta stima esun ku ta sigui hustisia.

15:10 Disiplina severo ta pa esun ku bandoná e kaminda; esun ku ta odia reprendementu lo muri.

15:11 Seol i Abadon ta dilanti di SEÑOR, kuantu mas e kurasonnan di hende!

15:12 Un hasidó di bofon no ta stima esun ku reprend'é, ni e lo no bai serka e sabínan.

15:13 Un kurason alegre ta hasi kara kontentu, ma ora ku e kurason ta tristu, e spiritu ta kibrá.

15:14 Kurason di esun ku tin komprendementu ta buska konosementu, ma boka di e bobo ta alimentá su mes ku lokura.

15:15 Tur e dianan di esun ku ta afligí ta malu, ma esun di kurason kontentu semper tin fiesta.

15:16 Mihó djis un tiki, ku e temor di SEÑOR, ku gran tesoro, i problema huntu kuné.

15:17 Mihó un tayó di bèrdura kaminda tin amor, ku un toro gòrdá i odio huntu kuné.

15:18 Un hende ku ta rabia lihé ta lanta pleitu, ma esun ku no ta rabia lihé ta kalma pleitu.

15:19 Kaminda di e floho ta manera un trankera di sumpiña, ma bereha di e rektonan ta un kaminda grandi.

15:20 Un yu hòmber sabí ta hasi su tata kontentu, ma un hòmber bobo ta despresiá su mama.

15:21 Bobedat ta alegria pa esun ku falta komprendementu, ma un hende di komprendementu ta kana den rektitut.

15:22 Pa falta di konseho plannan ta frakasá, ma ku hopi konsehero nan ta wòrdu lográ.

15:23 Un hende tin alegria ora ku e duna un bon kontesta, i ki bon ta un palabra duná na ora!

15:24 E bereha di bida ta subi bai ariba pa esun sabí, asina ku e por keda leu for di Seol abou.

15:25 SEÑOR lo destruí kas di e orguyosonan, ma E lo stablesé frontera di e biuda.

15:26 Plannan di maldat ta un abominashon pa SEÑOR, ma palabranan agradabel ta puru.

15:27 Esun ku ta haragan pa ganashi ta tormentá su mes kas, ma esun ku ta odia plaka pasá bou di mesa lo biba.

15:28 Kurason di e hustu ta studia bon kon pa kontestá, ma for di boka di e malbadonan ta brota maldat.

15:29 SEÑOR ta leu for di e malbadonan, ma E ta tende orashon di e hustunan.

15:30 Wowo ku ta briya ta alegrá kurason; bon notisia ta hasi wesu salú.

15:31 Orea ku ta skucha reprendementu di bida lo biba meimei di e sabínan.

15:32 Esun ku neglishá disiplina ta despresiá su mes alma, ma esun ku skucha reprendementu ta atkirí komprendementu.

15:33 E temor di SEÑOR ta instrukshon pa sabiduria, i promé ku onor ta bin umildat.