Buska den Beibel

Proverbionan 1; Proverbionan 2; Proverbionan 3 BSNP Edita

Proverbionan 1

1:1 E proverbionan di Salomon, yu hòmber di David, rei di Israel:

1:2 pa konosé sabiduria i instrukshon, pa diserní e dichonan di komprendementu,

1:3 pa risibí instrukshon den kondukta prudente, hustisia, huisio i rektitut;

1:4 pa duna prudensia na e simpelnan, konosementu i disernimentu na e hobennan--

1:5 un hende sabí lo tende i lo oumentá su konosementu, i un hende di komprendementu lo atkirí bon konseho--

1:6 pa komprendé proverbio i parábola, palabranan di e sabínan i nan charadanan.

1:7 E temor di SEÑOR ta e prinsipio di konosementu; bobonan ta despresiá sabiduria i instrukshon.

1:8 Mi yu, tende e instrukshon di bo tata, i no bandoná e siñansa di bo mama;

1:9 pasobra nan lo ta un bunita adorno pa bo kabes, i koyarnan na bo garganta.

1:10 Mi yu, si pekadónan tentabo, no konsentí.

1:11 Si nan bisa: "Ban ku nos, laga nos skonde lur pa drama sanger, laga nos skonde ataká e inosentenan sin motibu;

1:12 laga nos traga nan bibu, manera Seol, i henté, manera esnan ku ta baha den graf;

1:13 nos lo haña tur sorto di rikesa presioso, nos lo yena nos kasnan ku botín;

1:14 purba bo suerte ku nos, nos tur lo tin un solo saku di plaka"--

1:15 mi yu, no anda ku nan. No laga bo pia kohe nan kaminda,

1:16 pasobra nan pia ta kore bai na maldat, i nan ta lihé pa drama sanger.

1:17 Bèrdaderamente, span nèt den bista di parha ta trabou pòrnada;

1:18 ma nan ta skonde lur pa drama nan mes sanger; nan ta skonde ataká nan mes bida.

1:19 Asina ta e kamindanan di kada un ku ta golos pa ganashi, kual ta kita bida di esnan ku ta doño di djé.

1:20 Sabiduria ta sklama den kaya, e ta halsa su bos riba plenchi;

1:21 na skina di kayanan drùk e ta sklama; na entrada di e portanan den e stat e ta trese su mensahe:

1:22 "Kuantu tempu mas, O simpelnan, boso lo stima simplisidat, i bofonadónan lo tin delisia den hasimentu di bofon, i bobonan lo odia sabiduria?

1:23 Bolbe na mi reprendementu! Mira, lo mi drama mi spiritu riba boso; lo mi hasi mi palabranan konosí na boso.

1:24 Pasobra mi a yama i boso a nenga; mi a saka mi man i ningun hende no a hasi kaso.

1:25 Ma boso a neglishá tur mi konseho, i no tabata kier mi reprendementu;

1:26 tambe lo mi hari boso kalamidat; lo mi hasi bofon ora miedu bin riba boso,

1:27 ora boso miedu bin manera un tempestat, i boso kalamidat bin manera warwarú, ora ku ansha i angustia bin riba boso.

1:28 "E ora ei nan lo yamami, ma lo mi no kontestá; nan lo buskami ku diligensia, ma nan lo no hañami,

1:29 pasobra nan tabata odia konosementu, i no a skohe pa e temor di SEÑOR.

1:30 Nan no kier a aseptá mi konseho, nan a rechasá tur mi reprendementu.

1:31 Pesei nan lo kome di e fruta di nan mes kondukta, i lo keda yen di nan mes kòmplòtnan.

1:32 Pasobra e desviashon di e simpelnan lo mata nan, i e negligensia di e bobonan lo destruí nan.

1:33 Ma esun ku skuchami lo biba konfiadamente, i lo biba trankil, sin miedu di maldat."

Proverbionan 2

2:1 Mi yu, si bo kier risibí mi palabranan i warda mi mandamentunan den bo,

2:2 hasi bo orea atento na sabiduria, i inkliná bo kurason na komprendementu;

2:3 pasobra si bo sklama pa disernimentu, halsa bo bos pa komprendementu,

2:4 si bo busk'é manera plata, i rondi'é manera tesoro skondí,

2:5 e ora ei lo bo diserní e temor di SEÑOR, i deskubrí e konosementu di Dios.

2:6 Pasobra SEÑOR ta duna sabiduria; for di Su boka ta sali konosementu i komprendementu.

2:7 E ta warda sabiduria sano pa esnan ku ta rekto; E ta un eskudo pa esnan ku ta kana den integridat;

2:8 E ta warda e berehanan di hustisia, i ta preservá e kaminda di Su santunan.

2:9 E ora ei lo bo diserní hustisia i huisio, i rektitut, sí, tur bon kaminda.

2:10 Pasobra sabiduria lo bin den bo kurason, i konosementu lo ta agradabel na bo alma.

2:11 Diskreshon lo wardabo; komprendementu lo kuidabo.

2:12 Sabiduria lo librabo for di e kaminda di maldat, for di e hende ku ta papia kosnan pèrvèrso,

2:13 for di esnan ku ta bandoná e berehanan di rektitut, pa kana den e kamindanan di skuridat;

2:14 kendenan tin delisia den hasimentu di maldat, i ta regosihá den e pèrvèrsidat di maldat,

2:15 kende nan berehanan ta trosí, i kendenan ta sigui nan kamindanan trosí.

2:16 E lo librabo tambe for di e muhé straño, for di e adúltera ku ta labia ku su palabranan,

2:17 ku ta bandoná e kompañero di su hubentut, i ta lubidá e aliansa di su Dios;

2:18 pasobra su kas ta senk bai abou te na morto, i su lastronan ta hiba te na e mortonan;

2:19 ni un hende ku bai serka djé no ta bolbe bèk, ni nan no ta alkansá e berehanan di bida.

2:20 Asina lo bo kana den e kaminda di bon hende, i permanesé riba e berehanan di e hustunan.

2:21 Pasobra e rektonan lo biba den e tera, i e perfektonan lo keda den djé;

2:22 ma e malbadonan lo wòrdu kòrtá kitá for di tera, i e traidónan lo wòrdu ranká for di djé ku rais ku tur.

Proverbionan 3

3:1 Mi yu, no lubidá mi siñansa, ma laga bo kurason warda mi mandamentunan,

3:2 pasobra dianan largu, bida largu i pas nan lo agregá na bo.

3:3 No laga miserikòrdia i bèrdat bandonábo; mara nan rònt di bo garganta, skirbi nan riba tabla di bo kurason.

3:4 Asina lo bo haña grasia i aprobashon den bista di Dios i hende.

3:5 Konfia den SEÑOR ku henter bo kurason, i no dependé riba bo mes komprendementu.

3:6 Den tur bo kamindanan rekonos'E, i E lo dirigí bo berehanan.

3:7 No sea sabí den bo mes bista; teme SEÑOR, i apartá bo mes for di maldat.

3:8 Esaki lo ta kuramentu pa bo kurpa, i tuti pa bo wesunan.

3:9 Onra SEÑOR ku bo rikesa, i ku e promé fruta di tur bo produktonan;

3:10 asina bo mangasinanan lo wòrdu yená ku abundansia, i bo bakinan-di-pèrs-wendrùif lo basha ofer di biña nobo.

3:11 Mi yu, no rechasá e disiplina di SEÑOR, ni aboresé Su reprendementu,

3:12 pasobra esun ku SEÑOR ta stima, E ta reprendé, meskos ku un tata ta reprendé e yu ku e tin delisia den djé.

3:13 Bendishoná ta e hende ku haña sabiduria, e hende ku haña komprendementu,

3:14 pasobra probecho di esaki ta mihó ku probecho di plata, i su ganashi mas ku oro fini.

3:15 E ta mas presioso ku rubí, i tur loke bo por deseá no ta di kompará kuné.

3:16 Bida largu ta den su man drechi, i rikesa i onor ta den su man robes.

3:17 Su kamindanan ta kamindanan agradabel, i tur su berehanan ta pas.

3:18 E ta un palu di bida pa esnan ku ta gar'é tene, i felis ta tur esnan ku tene duru na djé.

3:19 Pa medio di sabiduria SEÑOR a funda tera; pa medio di komprendementu El a stablesé e shelunan.

3:20 Pa medio di Su konosementu e profundidatnan a wòrdu kibrá, i e nubianan ta gotia serena.

3:21 Mi yu, no laga esakinan kita for di bo bista; retené sabiduria sano i diskreshon,

3:22 asina nan lo ta bida pa bo alma i adorno na bo garganta.

3:23 E ora ei lo bo kana den bo kaminda ku tur konfiansa, i bo pia lo no trompeká.

3:24 Ora bo kai drumi, lo bo no tin miedu; ora bo kai drumi, bo soño lo ta dushi.

3:25 No tene miedu di desaster inesperá, ni di atake di malbadonan ora ku esaki bin;

3:26 pasobra SEÑOR lo ta bo konfiansa, i lo warda bo pia di wòrdu kohí den trampa.

3:27 No laga di hasi bon na esnan ku meresé esaki, si ta den bo poder pa hasié.

3:28 No bisa bo próhimo: "Bai bolbe, i mañan lo mi dunabo," mientras ku bo tin é ku bo.

3:29 No plania maldat kontra bo próhimo, mientras ku e ta biba konfiadamente band'i bo.

3:30 No pleita ku un hende sin motibu, si e no a hasibo ningun daño.

3:31 No envidiá un hende di violensia, i no skohe ningun di su kamindanan.

3:32 Pasobra e hende pèrvèrso ta un abominashon pa SEÑOR, ma E tin komunion íntimo ku e hende rekto.

3:33 Maldishon di SEÑOR ta riba e kas di e malbado, ma E ta bendishoná e lugá di biba di e hustu.

3:34 E ta hasi bofon di e bofonadónan, ma E ta duna grasia na e umildenan.

3:35 E sabínan lo eredá onor, ma bobonan ta montoná bèrguensa riba nan mes.