Buska den Beibel

Salmo 97; Salmo 98; Salmo 99 BSNP Edita

Salmonan 97

97:1 SEÑOR ta reina; laga tera regosihá; laga e multitut di islanan ta kontentu.

97:2 Nubianan i skuridat profundo ta rondon'E; hustisia i huisio ta e fundeshi di Su trono.

97:3 Kandela ta bai Su dilanti, i ta kima Su atversarionan tur rònt.

97:4 Su lampernan ta lusa mundu; tera a mira i a tembla.

97:5 E serunan ta dirti manera was dilanti di SEÑOR, den e presensia di e Señor di henter tera.

97:6 E shelunan ta deklará Su hustisia, i tur e pueblonan ta mira Su gloria.

97:7 Laga tur esnan ku ta sirbi imagennan grabá, keda brongosá, esnan ku ta gloria den nan ídolonan; boso, diosnan tur, ador'E.

97:8 Sion a tende esaki i a keda kontentu, i e yu muhénan di Juda a regosihá pa motibu di Bo huisionan, O SEÑOR.

97:9 Pasobra Abo ta e SEÑOR Haltísimo riba henter tera; Bo ta halsá muchu mas haltu ku tur e diosnan.

97:10 Boso ku ta stima SEÑOR, odia maldat; E ta preservá alma di Su santunan; E ta libra nan for di man di e malbado.

97:11 Lus ta sembrá pa e hustu, i alegria pa esnan ku ta rekto di kurason.

97:12 Sea kontentu den SEÑOR, boso, hustunan, i duna gradisimentu na Su nòmber santu.

Salmonan 98

98:1 O kanta na SEÑOR un kantika nobo, pasobra El a hasi kosnan maraviyoso; Su man drechi i Su brasa santu a gana e viktoria p'E.

98:2 SEÑOR a hasi Su salbashon konosí; El a revelá Su hustisia den bista di e nashonnan.

98:3 El a kòrda riba Su miserikòrdia i Su fieldat pa ku e kas di Israel; tur e finnan di tera a mira e salbashon di nos Dios.

98:4 Grita di alegria na SEÑOR, mundu henter; hubilá i kanta di goso, i kanta alabansa.

98:5 Kanta alabansa na SEÑOR ku lirio, ku lirio i ku bos di kantamentu,

98:6 ku tròmpèt i ku zonidu di kachu; grita di alegria dilanti di Rei, e SEÑOR.

98:7 Laga laman ronka, i tur loke ku e ta kontené, mundu i esnan ku ta biba den djé.

98:8 Laga e riunan bati man; laga e serunan huntu kanta di goso

98:9 dilanti di SEÑOR, pasobra E ta bin pa huzga tera; E lo huzga mundu ku hustisia i e pueblonan ku rektitut.

Salmonan 99

99:1 SEÑOR ta reina, laga e pueblonan tembla; E ta sintá riba trono ariba di e kerubinnan, laga tera tembla!

99:2 SEÑOR ta grandi den Sion, i E ta halsá riba tur e pueblonan.

99:3 Laga nan alabá Bo nòmber grandi i temibel; santu E ta.

99:4 I e fortalesa di e Rei ta stima huisio; Bo a stablesé rektitut; Bo a ehekutá huisio i hustisia den Jakòb.

99:5 Halsa SEÑOR nos Dios i adorá na e banki pa Su pianan; pasobra E ta santu.

99:6 Moisés i Aaron tabata entre Su saserdotenan, i Samuel tabata entre esnan ku tabata invoká Su nòmber; nan a sklama na SEÑOR i El a kontestá nan.

99:7 El a papia ku nan den e pilar di nubia; nan a warda Su testimonionan, i e statuto ku El a duna nan.

99:8 O SEÑOR nos Dios, Bo a kontestá nan; Bo tabata pa nan un Dios ku ta pordoná, i tòg Bo a tuma vengansa riba nan echonan.

99:9 Halsa SEÑOR nos Dios, i adorá na Su seru santu, pasobra SEÑOR nos Dios ta santu.