Buska den Beibel

Salmo 111; Salmo 112; Salmo 113; Salmo 114; Salmo 115; Salmo 116; Salmo 117; Salmo 118 BSNP Edita

Salmonan 111

111:1 Alabá SEÑOR! Lo mi duna gradisimentu na SEÑOR ku henter mi kurason, den e reunion di e hendenan rekto i den e asamblea.

111:2 Grandi ta e obranan di SEÑOR; tur esnan ku tin delisia den nan ta studia nan.

111:3 Su obra ta glorioso i mahestuoso; i Su hustisia ta permanesé pa semper.

111:4 El a hasi ku Su maraviyanan lo wòrdu rekòrdá; SEÑOR ta yen di grasia i kompashon.

111:5 El a duna kuminda na esnan ku ta tem'E; E lo rekòrdá Su aliansa pa semper.

111:6 El a mustra Su pueblo e poder di Su obranan, dor di duna nan e erensia di e nashonnan.

111:7 E obranan di Su mannan ta bèrdat i hustisia; tur Su preseptonan ta sigur.

111:8 Nan ta para firme pa semper i semper; nan ta hasí den bèrdat i den rektitut.

111:9 El a manda redenshon pa Su pueblo; El a ordená Su aliansa pa semper; Su nòmber ta santu i temibel.

111:10 E temor di SEÑOR ta e prinsipio di sabiduria; tur hende ku kumpli ku Su mandamentunan tin bon komprendementu; Su alabansa ta permanesé pa semper.

Salmonan 112

112:1 Alabá SEÑOR! Bendishoná ta e hende ku ta teme SEÑOR, ku tin gran delisia den Su mandamentunan.

112:2 Su desendientenan lo ta poderoso riba tera; e generashon di e rektonan lo ta bendishoná.

112:3 Tin prosperidat i rikesa den su kas, i su hustisia ta permanesé pa semper.

112:4 Pa e rektonan lus ta sali den skuridat; e ta yen di grasia i kompashon, i ta hustu.

112:5 Ta bai bon ku e hende ku tin kompashon i ta fia, e lo atendé su asuntonan ku huisio,

112:6 pasobra e lo no wòrdu moví nunka; e hustu lo wòrdu rekòrdá pa etèrnidat.

112:7 E lo no tin miedu di mal notisia; su kurason ta trankil, konfiando den SEÑOR.

112:8 Su kurason ta firme, e lo no tin miedu, te ora ku e mira su deseo kumplí riba su atversarionan.

112:9 El a parti, el a duna na e pobernan; su hustisia ta permanesé pa semper; su kachu lo wòrdu halsá ku onor.

112:10 E malbado lo mira esaki i keda rabiá; e lo morde riba su djente i para kaba na nada; e deseo di e malbado lo peresé.

Salmonan 113

113:1 Alabá SEÑOR! Alabá, O boso sirbidónan di SEÑOR, alabá e nòmber di SEÑOR.

113:2 Bendishoná sea e nòmber di SEÑOR for di awor i pa semper.

113:3 For di ora solo sali te ora ku e drenta e nòmber di SEÑOR ta di alabá.

113:4 SEÑOR ta halsá riba tur nashon; Su gloria ta mas haltu ku e shelunan.

113:5 Ken ta manera SEÑOR nos Dios, Kende ta sintá riba trono den haltura,

113:6 Kende ta umiyá su mes pa mira e kosnan ku ta den shelu i riba tera?

113:7 E ta lanta hende pober for di stòf, i ta lanta esnan den nesesidat for di e lugá di benta sushi,

113:8 pa pone nan sinta huntu ku prensnan, huntu ku e prensnan di Su pueblo.

113:9 E ta hasi e muhé steril biba den kas, manera un mama di yu, masha felis. Alabá SEÑOR!

Salmonan 114

114:1 Tempu ku Israel a sali for di Egipto, e kas di Jakòb for di un pueblo di lenga straño,

114:2 Juda a bira Su santuario, Israel, Su dominio.

114:3 Laman a mira esaki i a hui; Jordan a hal'atras.

114:4 E serunan tabata bula manera karné chubatu, e seritunan manera lamchi.

114:5 Ki faltabo, O laman, ku bo ta hui? Abo, Jordan, ku bo ta hal'atras?

114:6 Boso, serunan, ku boso ta bula rònt manera karné chubatu, i boso, seritunan, manera lamchi?

114:7 Tembla, O tera, den e presensia di Señor, den e presensia di e Dios di Jakòb,

114:8 Kende a hasi e baranka bira un tanki di awa, e piedra duru un fuente di awa.

Salmonan 115

115:1 No na nos, O SEÑOR, no na nos, ma na Bo nòmber duna gloria, pa motibu di Bo miserikòrdia, i pa motibu di Bo bèrdat.

115:2 Pakiko e nashonnan mester puntra: "Unda nan Dios a keda awor?"

115:3 Ma nos Dios ta den e shelunan; E ta hasi tur loke ta agrad'E.

115:4 Nan ídolonan ta plata i oro, e obra di mannan di hende.

115:5 Nan tin boka, ma nan no por papia; nan tin wowo, ma nan no por mira;

115:6 nan tin orea, ma nan no por tende; nan tin nanishi, ma nan no por hole;

115:7 nan tin man, ma nan no por fula; nan tin pia, ma nan no por kana; nan no por saka zonidu for di nan garganta.

115:8 Esnan ku ta traha nan lo bira meskos ku nan, tur esnan ku ta konfia den nan.

115:9 O Israel, konfia den SEÑOR; E ta nan yudansa i nan eskudo.

115:10 O kas di Aaron, konfia den SEÑOR; E ta nan yudansa i nan eskudo.

115:11 Boso ku ta teme SEÑOR, konfia den SEÑOR; E ta nan yudansa i nan eskudo.

115:12 SEÑOR a kòrda riba nos; E lo bendishoná nos; E lo bendishoná e kas di Israel; E lo bendishoná e kas di Aaron.

115:13 E lo bendishoná esnan ku ta teme SEÑOR, tantu chikitu komo grandi.

115:14 Ku SEÑOR hasi boso oumentá mas i mas, boso i boso yunan.

115:15 Ku boso sea bendishoná di SEÑOR, Esun ku a traha shelu i tera.

115:16 E shelunan ta e shelunan di SEÑOR, ma tera El a duna na e yunan di hende.

115:17 E mortonan no ta alabá SEÑOR, ni esnan ku ta baha den e lugá di silensio;

115:18 ma nos lo bendishoná SEÑOR for di awor i pa semper. Alabá SEÑOR!

Salmonan 116

116:1 Mi ta stima SEÑOR, pasobra E ta tende mi bos i mi súplikanan.

116:2 Pasobra El a inkliná Su orea na mi, pesei lo mi sklama na djE tanten ku mi ta biba.

116:3 E kabuyanan di morto a enserámi, i e terornan di Seol a bin riba mi; mi a haña angustia i pena.

116:4 E ora ei mi a invoká e nòmber di SEÑOR: "O SEÑOR, mi ta rogaBo, salba mi bida!"

116:5 SEÑOR ta yen di grasia i ta hustu; sí, nos Dios ta yen di kompashon.

116:6 SEÑOR ta warda e simpelnan; mi tabata abatí, i El a salbami.

116:7 Bolbe na bo sosiegu, O mi alma, pasobra SEÑOR tabata masha bon mes pa bo.

116:8 Pasobra Bo a reskatá mi alma for di morto, mi wowo for di lágrima, i mi pia for di trompeká.

116:9 Lo mi kana dilanti di SEÑOR den e tera di e bibunan.

116:10 Mi a kere ora mi a bisa: "Mi ta masha afligí."

116:11 Mi a bisa den mi desesperashon: "Tur hende ta gañadó."

116:12 Kiko lo mi duna SEÑOR pa tur Su benefisionan na mi?

116:13 Lo mi hisa e kopa di salbashon, i invoká e nòmber di SEÑOR.

116:14 Lo mi kumpli ku mi promesanan na SEÑOR den presensia di henter Su pueblo.

116:15 Presioso den bista di SEÑOR ta e morto di Su santunan.

116:16 O SEÑOR, di bèrdat, mi ta Bo sirbidó, mi ta Bo sirbidó, yu hòmber di Bo sirbiente; Bo a lòs mi kadenanan.

116:17 Na Bo lo mi ofresé un sakrifisio di gradisimentu, i invoká e nòmber di SEÑOR.

116:18 Lo mi kumpli ku mi promesanan na SEÑOR den presensia di henter Su pueblo,

116:19 den e plenchinan di e kas di SEÑOR, meimei di bo, O Jerusalèm. Alabá SEÑOR!

Salmonan 117

117:1 Alabá SEÑOR, tur nashon; alab'E, tur pueblo!

117:2 Pasobra Su miserikòrdia pa nos ta grandi, i e fieldat di SEÑOR ta permanesé pa semper. Alabá SEÑOR!

Salmonan 118

118:1 Duna gradisimentu na SEÑOR, pasobra E ta bon; pasobra Su miserikòrdia ta pa semper.

118:2 Laga Israel bisa: "Su miserikòrdia ta pa semper."

118:3 Laga e kas di Aaron bisa: "Su miserikòrdia ta pa semper."

118:4 Laga esnan ku ta teme SEÑOR bisa: "Su miserikòrdia ta pa semper."

118:5 For di mi aflikshon mi a sklama na SEÑOR; SEÑOR a kontestámi i a ponemi den un lugá espasioso.

118:6 SEÑOR ta ku mi; lo mi no tin miedu; kiko hende por hasimi?

118:7 SEÑOR ta ku mi entre mi yudadónan; pesei lo mi mira ku satisfakshon riba esnan ku ta odiami.

118:8 Ta mihó pa tuma refugio den SEÑOR ku konfia den hende.

118:9 Ta mihó pa tuma refugio den SEÑOR ku konfia den prensnan.

118:10 Tur nashon tabata rondonámi; den e nòmber di SEÑOR lo mi destruí nan sigur.

118:11 Nan tabata rondonámi, sí, nan tabatin mi tur rondoná; den e nòmber di SEÑOR lo mi destruí nan sigur.

118:12 Nan a rondonámi manera abeha; nan a wòrdu pagá manera un kandela di sumpiña; den e nòmber di SEÑOR lo mi destruí nan sigur.

118:13 Ku violensia bo a pushami te ku mi a kai, ma SEÑOR a yudami.

118:14 SEÑOR ta mi fortalesa i mi kantika, i El a bira mi salbashon.

118:15 E zonidu di gritunan di alegria i di salbashon ta den e tèntnan di e hustunan; e man drechi di SEÑOR ta hasi kosnan grandi.

118:16 E man drechi di SEÑOR ta halsá; e man drechi di SEÑOR ta hasi kosnan grandi.

118:17 Lo mi no muri, ma lo mi biba, i konta di e obranan di SEÑOR.

118:18 SEÑOR a disiplinámi severamente, ma E no a entregámi na morto.

118:19 Habri e portanan di hustisia pa mi; lo mi drenta dor di nan, lo mi duna gradisimentu na SEÑOR.

118:20 Esaki ta e porta di SEÑOR; e hustunan lo drenta dor di djé.

118:21 Lo mi dunaBo gradisimentu, pasobra Bo a kontestámi, i Bo a bira mi salbashon.

118:22 E piedra ku e trahadónan a rechasá a bira e piedra-di-skina prinsipal.

118:23 Esaki ta loke SEÑOR a hasi; i e ta maraviyoso den nos bista.

118:24 Esaki ta e dia ku SEÑOR a traha; laga nos regosihá i ta kontentu den djé.

118:25 O SEÑOR, salba awor, nos ta rogabo; O SEÑOR, nos ta rogaBo, manda prosperidat!

118:26 Bendishoná ta esun ku ta bin den e nòmber di SEÑOR; nos a bendishoná boso for di e kas di SEÑOR.

118:27 SEÑOR ta Dios, i El a hasi Su lus briya riba nos; mara e sakrifisio ku kabuya na e kachunan di e altar.

118:28 Bo ta mi Dios, i mi ta dunaBo gradisimentu; mi Dios, mi ta halsaBo.

118:29 Duna gradisimentu na SEÑOR, pasobra E ta bon, pasobra Su miserikòrdia ta pa semper.