Buska den Beibel

Salmo 146; Salmo 147; Salmo 148; Salmo 149; Salmo 150 BSNP Edita

Salmonan 146

146:1 Alabá SEÑOR! Alabá SEÑOR, O mi alma!

146:2 Tanten ku mi ta biba lo mi alabá SEÑOR; lo mi kanta alabansa na mi Dios, tanten ku mi tin bida.

146:3 No konfia den prensnan, den yu di hende, den kende no tin salbashon.

146:4 Su spiritu ta sali, e ta bolbe na tera; e mes dia ei su pensamentunan ta peresé.

146:5 Bendishoná ta esun, kende su yudansa ta e Dios di Jakòb, kende su speransa ta den SEÑOR su Dios,

146:6 e Kreador di shelu i tera, laman i tur loke tin den nan; Kende ta warda bèrdat pa semper;

146:7 Kende ta ehekutá hustisia pa e oprimínan; Kende ta duna pan na esnan ku tin hamber. SEÑOR ta pone e prezonan den libertat;

146:8 SEÑOR ta habri wowo di e siegunan; SEÑOR ta lanta esnan ku ta abatí; SEÑOR ta stima e hustunan;

146:9 SEÑOR ta protehá e stranheronan; E ta sostené wérfano i biuda; ma e kaminda di e malbadonan E ta trastorná.

146:10 SEÑOR lo reina pa semper, bo Dios, O Sion, pa tur generashon. Alabá SEÑOR!

Salmonan 147

147:1 Alabá SEÑOR! Pasobra ta bon pa kanta alabansa na nos Dios, pasobra esei ta agradabel, i alabansa ta masha apropiá.

147:2 SEÑOR ta konstruí Jerusalèm; E ta rekohé e eksiliadonan di Israel.

147:3 E ta kura esnan di kurason kibrá, i ta mara nan heridanan.

147:4 E ta determiná e kantidat di e streanan; E ta yama nan tur na nan nòmber.

147:5 Grandi ta nos Señor, i abundante den fortalesa; Su komprendementu ta infinito.

147:6 SEÑOR ta sostené e afligínan; E ta tira e malbadonan te abou na suela.

147:7 Kanta na SEÑOR ku gradisimentu; kanta alabansa na nos Dios riba lirio,

147:8 Kende ta tapa e shelunan ku nubia, Kende ta proveé awaseru pa tera, Kende ta hasi yerba krese riba e serunan.

147:9 E ta duna baka su kuminda, tambe e yunan di raf ku ta chip.

147:10 E no tin delisia den e forsa di kabai; E no tin plaser den e pianan di un hòmber.

147:11 SEÑOR ta hiba gustu den esnan ku ta tem'E, den esnan ku ta spera riba Su miserikòrdia.

147:12 Alabá SEÑOR, O Jerusalèm! Alabá bo Dios, O Sion!

147:13 Pasobra El a fortalesé e grèndelnan di bo portanan; El a bendishoná bo yunan ku ta den bo.

147:14 E ta duna pas denter di bo fronteranan; E ta satisfasébo ku e mihó di e trigo.

147:15 E ta manda Su mandamentu na tera; Su palabra ta kore masha lihé.

147:16 E ta duna sneu manera lana; E ta plama fròst manera shinishi.

147:17 E ta tira Su eis manera piedra chikitu; ken por para dilanti di Su frialdat?

147:18 E ta manda Su palabra i ta dirti nan; E ta hasi Su bientu supla i e awanan kore.

147:19 E ta deklará Su palabranan na Jakòb, Su statutonan i Su ordenansanan na Israel.

147:20 E no a trata asina ku ningun otro nashon; i pa loke ta Su ordenansanan, nunka nan no a konosé nan. Alabá SEÑOR!

Salmonan 148

148:1 Alabá SEÑOR! Alabá SEÑOR for di e shelunan; alab'E den e halturanan!

148:2 Alab'E, tur Su angelnan; alab'E, tur Su ehérsitonan!

148:3 Alab'E, solo i luna; alab'E, tur strea di lus!

148:4 Alab'E, shelunan di shelunan, i e awanan ku ta ariba e shelunan!

148:5 Laga nan alabá e nòmber di SEÑOR, pasobra El a duna òrdu, i nan tabata kreá.

148:6 Tambe El a stablesé nan pa semper i semper; El a traha un dekreto ku lo no pasa nunka.

148:7 Alabá SEÑOR for di tera, mònster di laman i tur profundidat;

148:8 kandela i hagel, sneu i nubia; bientu di tempestat, kumpliendo Su palabra;

148:9 seru i tur seritu; palu di fruta i tur palu di seda;

148:10 baka i tur bestia di kria; bestia ku ta lastra i parha ku ta bula;

148:11 rei di tera i tur pueblo; prens i tur hues di tera;

148:12 tantu yònkuman komo birgen; ansiano i mucha.

148:13 Laga tur alabá e nòmber di SEÑOR, pasobra ta Su nòmber so ta halsá; Su gloria ta mas haltu ku tera i shelu.

148:14 I El a halsa un kachu pa Su pueblo, alabansa pa tur Su santunan, pa e yunan di Israel, un pueblo serka di djE. Alabá SEÑOR!

Salmonan 149

149:1 Alabá SEÑOR! Kanta un kantika nobo na SEÑOR, i Su alabansa den e kongregashon di e santunan.

149:2 Laga Israel alegrá su mes den Esun ku a trah'é; laga e yunan di Sion regosihá den nan Rei.

149:3 Laga nan alabá Su nòmber ku baliamentu; laga nan kanta alabansa na djE ku tamburein i lirio.

149:4 Pasobra SEÑOR ta hiba gustu den Su pueblo; E ta dòrna e afligínan ku salbashon.

149:5 Laga e santunan regosihá den gloria; laga nan kanta di goso riba nan kama.

149:6 Laga e alabansa di Dios ta den nan boka, i un spada di dos filo den nan man,

149:7 pa ehekutá vengansa riba e nashonnan, i kastigu riba e pueblonan;

149:8 pa mara nan reinan ku kadena, i nan nobelnan ku bui di heru;

149:9 pa ehekutá riba nan e huisio skirbí; esaki ta un onor pa tur Su santunan. Alabá SEÑOR!

Salmonan 150

150:1 Alabá SEÑOR! Alabá Dios den Su santuario; alab'E den Su firmamentu poderoso.

150:2 Alab'E pa Su echonan poderoso; alab'E segun Su grandesa ekselente.

150:3 Alab'E ku zonidu di tròmpèt; alab'E ku arpa i lirio.

150:4 Alab'E ku tamburein i baliamentu; alab'E ku instrumènt di kuèrdè i flùit.

150:5 Alab'E ku simbal ku ta zona duru; alab'E ku simbal ku ta resoná.

150:6 Laga tur loke tin rosea alabá SEÑOR. Alabá SEÑOR!