Buska den Beibel

Salmo 12; Salmo 13 BSNP Edita

Salmonan 12

12:1 Yuda, SEÑOR, pasobra no tin hende deboto mas; pasobra e fielnan ta disparsé for di meimei di e yunan di hende.

12:2 Nan ta papia mentira ku otro; ku lep ku ta labia i ku kurason dòbel nan ta papia.

12:3 Ku SEÑOR destruí tur lep ku ta labia, i e lenga ku ta gusta gaba,

12:4 ku a bisa: "Ku nos lenga nos lo triunfá; nos lepnan ta di nos; ken ta señor riba nos?"

12:5 "Pa motibu di e opreshon di e pobernan, pa motibu di e kehamentu di esnan den nesesidat, lo Mi lanta awor," SEÑOR ta bisa: "Lo Mi pon'é den e siguridat ku e ta anhelá na djé."

12:6 E palabranan di SEÑOR ta palabranan puru, manera plata refiná den un fòrnu di klei, purifiká shete biaha.

12:7 Abo, O SEÑOR, lo warda nan; Abo lo preservá nan for di e generashon aki pa semper.

12:8 Tur kaminda tin malbado ta kana rònt, mientras ku entre e yunan di hende maldat ta wòrdu halsá.

Salmonan 13

13:1 Kuantu tempu mas, O SEÑOR? Lo Bo lubidámi pa semper? Kuantu tempu mas lo Bo skonde Bo kara pa mi?

13:2 Kuantu tempu mas lo mi buska konseho den mi alma, teniendo tristesa den mi kurason dia tras dia? Kuantu tempu mas mi enemigu lo ta halsá riba mi?

13:3 Konsiderá i kontestámi, O SEÑOR, mi Dios; iluminá mi wowo, pa mi no drumi e soño di morto,

13:4 pa mi enemigu no bisa: "Mi a vens'é," pa mi atversarionan no regosihá ora mi kai.

13:5 Ma mi a konfia den Bo miserikòrdia; mi kurason lo regosihá den Bo salbashon.

13:6 Lo mi kanta na SEÑOR, pasobra E tabata masha bon mes pa mi.