Buska den Beibel

Huan 14; Huan 15; Huan 16; Huan 17 BSNP Edita

Huan 14

14:1 "No laga boso kurason bira intrankil; kere den Dios, kere tambe den Mi.

14:2 Den kas di Mi Tata tin hopi lugá-di-biba; si no tabata asina, lo Mi a bisa boso; pasobra Mi ta bai pa prepará un lugá pa boso.

14:3 I ora Mi bai i prepará un lugá pa boso, lo Mi bin atrobe i risibí boso serka Mi, pa kaminda Ami ta, boso tambe por ta.

14:4 I boso sa unda Mi ta bai, i e kaminda boso sa."

14:5 Tomas a bis'E: "Señor, nos no sa unda Bo ta bai; kon nos por sa e kaminda?"

14:6 Jesus a bis'é: "Ami ta e kaminda, i e bèrdat, i e bida; ni un hende no ta bin serka e Tata, sino pa medio di Mi.

14:7 Si boso tabata konoséMi, boso lo a konosé Mi Tata tambe; i for di awor padilanti boso konos'E i a mir'E."

14:8 Felipe a bis'E: "Señor, mustra nos e Tata i esei ta basta pa nos."

14:9 Jesus a bis'é: "Asina tantu tempu Mi tabata serka boso, i ainda bo no konoséMi, Felipe? Esun ku a miraMi a mira e Tata; kon bo ta bisa: 'Mustra nos e Tata'?

14:10 Bo no ta kere ku Mi ta den e Tata, i ku e Tata ta den Mi? E palabranan ku Mi ta bisa boso Mi no ta papia di Mi mes, ma e Tata ku ta biba den Mi ta hasi Su obranan.

14:11 KereMi ku Mi ta den e Tata, i e Tata den Mi; sino, kere pa motibu di e obranan mes.

14:12 Di bèrdat, di bèrdat, Mi ta bisa boso, esun ku kere den Mi, e obranan ku Mi ta hasi e tambe lo hasi; i obranan mas grandi ku esakinan e lo hasi, pasobra Mi ta bai serka e Tata.

14:13 I tur loke boso pidi den Mi nòmber, esei lo Mi hasi, pa e Tata wòrdu glorifiká den e Yu.

14:14 Si boso pidi algu den Mi nòmber, lo Mi hasié.

14:15 "Si boso ta stimaMi, boso lo warda Mi mandamentunan.

14:16 I lo Mi pidi e Tata, i E lo duna boso un otro Konsolador, pa E keda serka boso pa semper,

14:17 esta, e Spiritu di bèrdat, Kende e mundu no por risibí, pasobra e no ta mir'E ni konos'E, ma boso konos'E pasobra E ta biba serka boso i lo ta den boso.

14:18 Lo Mi no laga boso manera wérfano; lo Mi bin serka boso.

14:19 Despues di un poko tempu mundu lo no miraMi mas, ma boso lo miraMi; pasobra Ami ta biba, boso tambe lo biba.

14:20 Riba e dia ei boso lo sa ku Ami ta den Mi Tata, i boso den Mi, i Ami den boso.

14:21 Esun ku tin Mi mandamentunan i ta warda nan, esei ta esun ku ta stimaMi; i esun ku ta stimaMi lo wòrdu stimá dor di Mi Tata, i Ami lo stim'é i lo manifestá Mi mes na djé."

14:22 Judas (no Iskariot) a bis'E: "Señor, di kon anto Bo ta bai manifestá Bo mes na nos i no na e mundu?"

14:23 Jesus a kontestá i a bis'é: "Si un hende ta stimaMi, e lo warda Mi palabra; i Mi Tata lo stim'é, i Nos lo bin serka djé i biba serka djé.

14:24 Esun ku no ta stimaMi no ta warda Mi palabranan; i e palabra ku boso ta tende no ta di Mi, ma di e Tata ku a mandaMi.

14:25 "E kosnan aki Mi a papia ku boso, mientras ku Mi ta serka boso ainda.

14:26 Ma e Konsolador, Spiritu Santu, Kende e Tata lo manda den Mi nòmber, E lo siña boso tur kos i hasi boso rekòrdá tur loke Mi a bisa boso.

14:27 Pas Mi ta laga pa boso; Mi pas Mi ta duna boso; no manera mundu ta duna, Mi ta duna boso. No laga boso kurason bira intrankil, ni lagu'é tene miedu.

14:28 "Boso a tende ku Mi a bisa boso: 'Mi ta bai i lo Mi bolbe serka boso.' Si boso tabata stimaMi, boso lo a regosihá, pasobra Mi ta bai serka e Tata; pasobra e Tata ta mas ku Mi.

14:29 I awor Mi a bisa boso promé ku esaki sosodé, pa ora ku e sosodé, boso por kere.

14:30 Ami lo no papia muchu mas ku boso, pasobra e prens di e mundu aki ta bin, i e no tin nada di aber ku Mi;

14:31 ma pa mundu por sa ku Mi ta stima e Tata, i manera e Tata a ordenáMi, asina Mi ta hasi. Lanta, laga nos bai for di akinan.

Huan 15

15:1 "Ami ta e bèrdadero mata di wendrùif, i Mi Tata ta e kunukero.

15:2 Tur rama den Mi ku no ta karga fruta, E ta kita, i tur rama ku ta karga fruta, E ta snui, pa esaki duna mas fruta.

15:3 Boso ta limpi kaba pa motibu di e palabra ku Mi a papia ku boso.

15:4 Keda den Mi, i Ami den boso. Meskos ku e rama no por karga fruta di su mes, si e no keda den e mata di wendrùif, asina boso tampoko, si boso no keda den Mi.

15:5 "Ami ta e mata di wendrùif, boso ta e ramanan; esun ku keda den Mi, i Ami den djé, esei ta duna hopi fruta, pasobra separá di Mi boso no por hasi nada.

15:6 Si un hende no keda den Mi, e ta wòrdu tirá afó manera un rama i ta seka; i hende ta rekohé nan i ta tira nan den kandela, i nan ta wòrdu kimá.

15:7 Si boso keda den Mi, i Mi palabranan keda den boso, pidi tur loke boso kier, i esaki lo wòrdu hasí pa boso.

15:8 Den esaki Mi Tata ta wòrdu glorifiká, ku boso ta karga hopi fruta i asina ta demostrá di ta Mi disipelnan.

15:9 "Meskos ku e Tata a stimaMi, Ami tambe a stima boso; keda den Mi amor.

15:10 Si boso warda Mi mandamentunan, boso lo keda den Mi amor; meskos ku Mi a warda e mandamentunan di Mi Tata, i ta keda den Su amor.

15:11 E kosnan aki Mi a papia ku boso, pa Mi goso por ta den boso, i boso goso por ta kompleto.

15:12 Esaki ta Mi mandamentu, ku boso stima otro meskos ku Ami a stima boso.

15:13 Ni un hende no tin amor mas grandi ku esaki, ku un hende ta duna su bida pa su amigunan.

15:14 Boso ta Mi amigu, si boso hasi loke Mi ta ordená boso.

15:15 Mi no ta yama boso esklabu mas, pasobra e esklabu no sa kiko su shon ta hasi; ma Mi a yama boso amigu, pasobra tur kos ku Mi a tende di Mi Tata, Mi a partisipá na boso.

15:16 Boso no a skoheMi, ma Ami a skohe boso i a nombra boso, pa boso bai i duna fruta, i ku boso fruta lo keda, pa tur loke boso pidi e Tata den Mi nòmber, E duna boso.

15:17 Esaki Mi ta ordená boso, pa boso stima otro.

15:18 "Si mundu odia boso, sa anto ku el a odia Ami promé ku boso.

15:19 Si boso tabata di mundu, mundu lo a stima loke ta di djé; ma pasobra boso no ta di mundu, ma Ami a skohe boso for di den mundu, pesei mundu ta odia boso.

15:20 Kòrda riba e palabra ku Mi a bisa boso: 'Un esklabu no ta mas ku su shon.' Si nan a pèrsiguíMi, boso tambe nan lo pèrsiguí; si nan a warda Mi palabra, nan lo warda di boso tambe.

15:21 Ma tur e kosnan aki nan lo hasi ku boso pa kousa di Mi nòmber, pasobra nan no konosé Esun ku a mandaMi.

15:22 Si Mi no a bin i a papia ku nan, nan lo no tabatin piká, ma awor nan no tin diskulpa pa nan piká.

15:23 Esun ku ta odiaMi, ta odia Mi Tata tambe.

15:24 Si Mi no a hasi den nan e obranan ku ningun otro hende a hasi, nan lo no tabatin piká; ma awor nan a mira i a odia tantu Ami komo Mi Tata.

15:25 Ma nan a hasi esaki, pa e palabra ku ta pará skirbí den nan Lei keda kumplí: 'Sin motibu nan a odiaMi.'

15:26 "Ora ku e Konsolador bin, Kende lo Mi manda serka boso for di e Tata, es desir e Spiritu di bèrdat, Kende ta sali for di e Tata, E lo duna testimonio di Mi,

15:27 i boso lo duna testimonio tambe, pasobra for di prinsipio boso tabata ku Mi.

Huan 16

16:1 "E kosnan aki Mi a papia ku boso, pa boso no trompeká.

16:2 Nan lo saka boso for di snoa, ma e ora ta bin ku ken ku mata boso lo kere ku e ta ofresé sirbishi na Dios.

16:3 I e kosnan aki nan lo hasi, pasobra nan no a konosé e Tata, ni Ami.

16:4 Ma e kosnan aki Mi a papia ku boso, pa ora e tempu yega, boso kòrda ku Mi a bisa boso tokante di nan. I e kosnan aki Mi no a bisa boso for di prinsipio, pasobra Mi tabata serka boso.

16:5 "Ma awor Mi ta bai serka Esun ku a mandaMi; i ningun di boso no ta puntraMi: 'Unda Bo ta bai?'

16:6 Ma pasobra Mi a papia e kosnan aki ku boso, tristesa a yena boso kurason.

16:7 Ma Mi ta bisa boso e bèrdat, ta kumbiní boso ku Mi ta bai; pasobra si Mi no bai, e Konsolador lo no bin serka boso; ma si Mi bai, lo Mi mand'E serka boso.

16:8 I E, ora ku E bin, lo konbensé mundu di piká, i di hustisia i di huisio;

16:9 di piká, pasobra nan no ta kere den Mi;

16:10 di hustisia, pasobra Mi ta bai serka e Tata, i boso no ta miraMi mas;

16:11 i di huisio, pasobra e prens di e mundu aki a wòrdu huzgá.

16:12 "Ainda Mi tin hopi kos mas di bisa boso, ma boso no por soportá nan awor.

16:13 Ma ora ku E, e Spiritu di bèrdat, bin, E lo guia boso den tur bèrdat; pasobra E lo no papia di Su mes, ma tur loke E tende, E lo papia; i loke tin di bin, E lo revelá na boso.

16:14 E lo glorifikáMi, pasobra E lo tuma for di loke ta di Mi, i lo revelá esaki na boso.

16:15 Tur loke e Tata tin ta di Mi; pesei Mi a bisa ku E lo tuma for di loke ta di Mi i lo revelá esaki na boso.

16:16 "Un poko tempu mas i boso lo no miraMi mas, i atrobe un poko tempu i boso lo miraMi."

16:17 Pesei algun di Su disipelnan tabata bisa otro: "Kiko e kos aki ta ku E ta bisa nos: 'Un poko tempu mas i boso lo no miraMi, i atrobe un poko tempu i boso lo miraMi'; i, 'pasobra Mi ta bai serka e Tata'?"

16:18 I asina nan tabata bisa: "Kiko esaki ta ku E ta bisa: 'Un poko tempu mas'? Nos no sa di kiko E ta papia."

16:19 Jesus tabata sa ku nan kier a hasiE pregunta, i El a bisa nan: "Ta deliberá boso ta deliberá ku otro tokante di loke Mi a bisa: 'Un poko tempu mas i boso lo no miraMi, i atrobe un poko tempu i boso lo miraMi'?

16:20 Di bèrdat, di bèrdat, Mi ta bisa boso, ku boso lo yora i lamentá, ma mundu lo regosihá; i boso lo ta tristu, ma boso tristesa lo bira goso.

16:21 Ki ora ku un muhé ta den doló di parto, e tin tristesa, pasobra su ora a yega; ma despues ku el a duna lus na e yu, e no ta kòrda riba e ansha mas, di goso ku un yu a bin na mundu.

16:22 Pesei boso tambe tin tristesa awor; ma lo Mi mira boso atrobe, i boso kurason lo regosihá, i ni un hende lo no kita boso goso for di boso.

16:23 I riba e dia ei boso lo no hasiMi ningun pregunta. Di bèrdat, di bèrdat, Mi ta bisa boso, kiko ku boso pidi e Tata, E lo duna boso den Mi nòmber.

16:24 Te ainda boso no a pidi nada den Mi nòmber; pidi, i boso lo risibí, pa boso goso por ta kompleto.

16:25 "E kosnan aki Mi a papia ku boso den komparashon; ma e ora ta bin ku lo Mi no papia mas ku boso den komparashon, ma lo Mi papia bon kla ku boso tokante di e Tata.

16:26 Den e dia ei boso lo pidi den Mi nòmber, i Mi no ta bisa boso ku lo Mi pidi e Tata pa boso;

16:27 komo ku e Tata mes ta stima boso, pasobra boso a stimaMi i a kere ku Mi a sali for di e Tata.

16:28 Mi a sali for di e Tata i a bin den mundu; Mi ta sali for di mundu atrobe i ta bai serka e Tata."

16:29 Su disipelnan a bisa: "Mira, awor Bo ta papia bon kla, sin uza komparashon.

16:30 Awor nos sa ku Bo sa tur kos i no tin mester pa ningun hende hasiBo pregunta; pesei nos ta kere ku Bo a bin for di Dios."

16:31 Jesus a kontestá nan: "Boso ta kere awor?

16:32 Ata e ora ta bin i a yega kaba, ku boso lo wòrdu plamá, kada un pa su mes kas, i lo lagaMi so. I tòg Mi no ta so, pasobra e Tata ta ku Mi.

16:33 "E kosnan aki Mi a papia ku boso, pa den Mi boso por tin pas. Den mundu boso tin tribulashon, ma tene kurashi, Mi a vense mundu."

Huan 17

17:1 E kosnan aki Jesus a papia; i hisando Su kara na shelu, El a bisa: "Tata, e ora a yega; glorifiká Bo Yu, pa e Yu glorifikáBo,

17:2 meskos ku Bo a dun'E outoridat riba tur karni, pa E duna bida etèrno na tur esnan ku Bo a dun'E.

17:3 I esaki ta bida etèrno, ku nan por konoséBo, e úniko Dios bèrdadero, i Jesu-Cristo, Kende Bo a manda.

17:4 Mi a glorifikáBo riba tera. Mi a kumpli ku e trabou ku Bo a dunaMi pa hasi.

17:5 I awor, glorifikáMi serka Bo mes, Tata, ku e gloria ku Mi tabatin serka Bo promé ku mundu tabata.

17:6 "Mi a manifestá Bo nòmber na e hendenan ku Bo a dunaMi for di mundu. Di Bo nan tabata i Bo a dunaMi nan, i nan a warda Bo palabra.

17:7 Awor nan a haña sa ku tur loke Bo a dunaMi ta bin di Bo,

17:8 pasobra e palabranan ku Bo a dunaMi, Mi a duna nan; i nan a risibí nan i nan a komprendé di bèrdat ku Mi a sali for di Bo, i nan a kere ku ta Abo a mandaMi.

17:9 Mi ta pidi pa nan; no ta pa mundu Mi ta pidi, sino pa esnan ku Bo a dunaMi, pasobra ta di Bo nan ta;

17:10 i tur kos ku ta di Mi ta di Bo, i di Bo ta di Mi; i Mi a wòrdu glorifiká den nan.

17:11 I Ami no ta den mundu mas, ma nan sí ta den mundu, i Mi ta bin serka Bo. Tata santu, warda nan den Bo nòmber, e nòmber ku Bo a dunaMi, pa nan ta ún meskos ku Nos.

17:12 Mientras ku Mi tabata ku nan, Mi tabata warda nan den Bo nòmber ku Bo a dunaMi; i Mi a warda nan i ni un di nan no a bai pèrdí, ku eksepshon di e yu di pèrdishon, pa e Skritura wòrdu kumplí.

17:13 "Ma awor Mi ta bin serka Bo; i e kosnan aki Mi ta papia den mundu, pa nan por tin Mi goso kompleto den nan mes.

17:14 Mi a duna nan Bo palabra; i mundu a odia nan, pasobra nan no ta di mundu, meskos ku Ami no ta di mundu.

17:15 Mi no ta pidiBo pa saka nan for di mundu, ma pa Bo warda nan di e malbado.

17:16 Nan no ta di mundu, meskos ku Ami no ta di mundu.

17:17 Santifiká nan den e bèrdat; Bo palabra ta bèrdat.

17:18 Meskos ku Bo a mandaMi den mundu, Ami tambe a manda nan den mundu.

17:19 I pa nan Mi ta santifiká Mi mes, pa nan tambe por ta santifiká den bèrdat.

17:20 "Mi no ta pidi pa esakinan so, ma tambe pa esnan ku ta kere den Mi pa medio di nan palabra,

17:21 pa nan tur por ta ún, meskos ku Abo, O Tata, ta den Mi i Ami den Bo, pa nan tambe por ta den Nos; pa mundu kere ku ta Abo a mandaMi.

17:22 I e gloria ku Bo a dunaMi, Mi a duna nan, pa nan ta ún, meskos ku Nos ta ún;

17:23 Ami den nan i Abo den Mi, pa nan por ta perfekto den unidat, pa mundu por sa ku ta Abo a mandaMi, i ku Bo a stima nan, meskos ku Bo a stimaMi.

17:24 "Tata, Mi ta deseá ku nan tambe, kendenan Bo a dunaMi, por ta serka Mi, kaminda Mi ta, pa nan mira Mi gloria ku Bo a dunaMi; pasobra Bo a stimaMi promé ku fundashon di mundu.

17:25 "O Tata hustu, maske mundu no a konoséBo, Ami sí a konoséBo; i esakinan a rekonosé ku ta Abo a mandaMi;

17:26 i Mi a hasi Bo nòmber konosí na nan i lo Mi hasié konosí, pa e amor ku kual Bo a stimaMi por ta den nan i Ami den nan."