Search the Bible

Salmo 65; Salmo 66; Salmo 67 BSNP Edit

Salmonan 65

65:1 Lo tin silensio Bo dilanti, i alabansa den Sion, O Dios; i serka Bo e promesa lo wòrdu kumplí.

65:2 Abo ku ta skucha orashon, serka Bo tur hende ta bin.

65:3 Inikidatnan ta prevalesé kontra mi; i pa loke ta nos transgreshonnan, Abo ta pordoná nan.

65:4 Bendishoná ta esun ku Bo ta skohe i ta hala serka Bo, pa biba den Bo pationan. Nos lo keda satisfecho ku e bondat di Bo kas, Bo tèmpel santu.

65:5 Ku echonan temibel Bo ta kontestá nos den hustisia, O Dios di nos salbashon, Abo ku ta e konfiansa di tur e finnan di tera i di e laman di mas leu;

65:6 Kende ta stablesé e serunan pa medio di Su forsa, siendo fahá ku poder;

65:7 Kende ta kalma e ronkamentu di e lamannan, e ronkamentu di nan olanan, i e tumulto di e pueblonan.

65:8 I esnan ku ta biba na e finnan di tera tin temor pa Bo señalnan; Bo ta hasi e lugánan kaminda mainta i anochi ta nase grita di alegria.

65:9 Bo ta bishitá tera i ta muh'é; Bo ta hasié masha riku mes; e riu di Dios ta yen di awa; Bo ta prepará nan mainshi, pasobra asina Bo ta prepará tera.

65:10 Abundantemente Bo ta muha e tera labrá; Bo ta hasi su hoyonan pareu; Bo ta hasié moli ku yobidanan di awa; Bo ta bendishoná su kresementu.

65:11 Bo ta koroná e aña ku Bo bondat, i Bo berehanan ta gotia abundansia.

65:12 E lugánan di yerba bèrdè den desierto ta gotia, i e seritunan ta faha nan mes ku alegria.

65:13 E lugánan di yerba bèrdè ta tur bistí ku tounan di karné; i e vayenan ta tur tapá ku mainshi; nan ta grita di alegria, sí, nan ta kanta.

Salmonan 66

66:1 Grita di alegria na Dios, mundu henter;

66:2 kanta e gloria di Su nòmber; hasi Su alabansa glorioso.

66:3 Bisa Dios: "Ki temibel ta Bo obranan! Pa motibu di e grandesa di Bo poder Bo enemigunan lo someté nan mes na Bo ku obedensia fingí.

66:4 Mundu henter lo adoráBo i lo kanta alabansa na Bo; nan lo kanta alabansa na Bo nòmber."

66:5 Bin i mira e obranan di Dios; E ta temibel den Su echonan pa ku e yunan di hende.

66:6 El a hasi laman bira tera seku; na pia nan a pasa dor di riu; laga nos regosihá den djE ayanan!

66:7 E ta goberná pa medio di Su poder pa semper; Su wowonan ta vigilá e nashonnan; no laga e rebeldenan halsa nan mes.

66:8 Bendishoná nos Dios, O pueblonan, i laga e zonidu di Su alabansa resoná;

66:9 El a tene nos na bida i no a pèrmití pa nos pia slep.

66:10 Pasobra Bo a pone nos na prueba, O Dios; Bo a refiná nos manera plata ta wòrdu refiná.

66:11 Bo a hala nos den reda, Bo a pone un karga pisá riba nos hepnan.

66:12 Bo a laga hende pasa riba nos kabes; nos a pasa dor di kandela i dor di awa; tòg Bo a hiba nos na un lugá di abundansia.

66:13 Lo mi drenta den Bo kas ku ofrendanan kimá; lo mi paga mi promesanan na Bo,

66:14 kualnan mi lepnan a primintí i mi boka a papia tempu ku mi tabata den angustia.

66:15 Lo mi ofresé na Bo ofrendanan kimá di bestianan gòrdá huntu ku e huma di karnénan chubatu; lo mi ofresé bishénan machu ku kabritunan chubatu.

66:16 Bin i tende, boso tur ku ta teme Dios, i lo mi konta loke El a hasi pa mi alma.

66:17 Mi a sklama na djE ku mi boka, i El a wòrdu glorifiká ku mi lenga.

66:18 Si mi a warda maldat den mi kurason, Señor lo no a tendemi;

66:19 ma di bèrdat, Dios a tende; El a paga atenshon na e bos di mi orashon.

66:20 Bendishoná sea Dios, Kende no a rechasá mi orashon, ni a kita Su miserikòrdia for di mi.kantika.

Salmonan 67

67:1 Dios tene miserikòrdia di nos i bendishoná nos, i hasi Su kara resplandesé riba nos,

67:2 pa Bo kaminda por ta konosí riba tera, Bo salbashon meimei di tur nashon.

67:3 Laga e pueblonan alabáBo, O Dios; laga tur e pueblonan alabáBo.

67:4 Laga e nashonnan ta kontentu i kanta di alegria; pasobra Abo lo huzga e pueblonan ku rektitut, i guia e nashonnan riba tera.

67:5 Laga e pueblonan alabáBo, O Dios; laga tur e pueblonan alabáBo.

67:6 Tera a duna su fruta; Dios, nos Dios, ta bendishoná nos.

67:7 Dios ta bendishoná nos, asina ku tur e finnan di tera lo tin temor di djE.