Search the Bible

Salmo 3; Salmo 4 BSNP Edit

Salmonan 3

3:1 O SEÑOR, mira kon mi atversarionan a oumentá! Tin hopi ku ta lanta kontra mi.

3:2 Tin hopi ku ta bisa di mi alma: "No tin yudansa p'é serka Dios."

3:3 Ma Abo, O SEÑOR, ta un eskudo rònt di mi, mi gloria, i Esun ku ta halsa mi kabes.

3:4 Ku mi bos mi tabata sklama na SEÑOR, i El a kontestámi for di Su seru santu.

3:5 Mi a kai drumi i a pega soño; mi a spièrta, pasobra SEÑOR ta sostenémi.

3:6 Lo mi no tene miedu di dies milnan di hende ku a pone nan mes tur rònt kontra mi.

3:7 Lanta, O SEÑOR; salbami, O mi Dios! Pasobra Bo a dal kakumbein di tur mi enemigunan; Bo a kibra djente di e malbadonan na pida-pida.

3:8 Salbashon ta di SEÑOR; Bo bendishon sea riba Bo pueblo!David.

4:1 Kontestámi ora mi yama, O Dios di mi hustisia! Bo a aliviámi den mi aflikshon; tene miserikòrdia di mi i tende mi orashon.

4:2 O yunan di hende, kuantu tempu mas boso lo kambia mi gloria na bèrguensa? Kuantu tempu mas boso lo stima banidat i buska mentira?

4:3 Ma komprendé ku SEÑOR a apartá pa Su mes esun ku ta deboto; SEÑOR ta tende ora mi sklama na djE.

4:4 Rabia, ma no hasi piká; meditá den bo kurason riba bo kama i keda ketu.

4:5 Ofresé e sakrifisionan di hustisia, i konfia den SEÑOR.

4:6 Tin hopi ku ta puntra: "Ken lo mustra bondat na nos?" Laga e lus di Bo semblante resplandesé riba nos, O SEÑOR!

4:7 Bo a pone alegria den mi kurason, mas ku tempu nan mainshi i biña nobo tabata produsí na abundansia.

4:8 Na pas lo mi bai drumi i pega soño, pasobra ta Abo so, O SEÑOR, ta hasimi biba den siguridat.