Search the Bible

Salmo 22; Salmo 23; Salmo 24 BSNP Edit

Salmonan 22

22:1 Mi Dios, mi Dios, pakiko Bo a bandonáMi? Pakiko Bo ta asina leu di yudami, asina leu di e palabranan di mi sklamashon?

22:2 O mi Dios, di dia mi ta sklama, ma Bo no ta kontestá; i anochi, ma no tin sosiegu pa mi.

22:3 Ma Abo ta santu, Abo ku ta sintá riba trono di e alabansanan di Israel.

22:4 Den Bo nos tatanan a konfia; nan a konfia i Bo a libra nan.

22:5 Na Bo nan a sklama, i nan a wòrdu librá; den Bo nan a konfia, i nan no a keda brongosá.

22:6 Ma ami ta un bichi, i no un hende, un reproche pa hende, i despresiá pa e pueblo.

22:7 Tur esnan ku mirami ta hasi bofon di mi; nan ta trèk boka, nan ta sakudí kabes, bisando:

22:8 "El a konfia den SEÑOR; lagu'E libr'é; lagu'E reskat'é, pasobra E tin delisia den djé."

22:9 Ma Abo ta Esun ku a sakami for di barika di mi mama; Bo a hasimi konfia tempu ku mi tabata na pechu di mi mama.

22:10 For di mi nasementu mi a wòrdu entregá na Bo; for di den barika di mi mama Bo tabata mi Dios.

22:11 No sea leu di mi, pasobra angustia ta serka; pasobra no tin ningun hende pa yuda.

22:12 Hopi toro a rondonámi; toronan fuerte di Basan ta tur rònt di mi.

22:13 Nan ta span nan boka hanchu kontra mi, manera leon ku ta gruña i habraká.

22:14 Mi ta wòrdu bashá afó manera awa, i tur mi wesunan a sali for di lugá; mi kurason ta manera was; el a dirti den mi paden.

22:15 Mi forsa a seka manera un skèrf di pòchi-di-klei, i mi lenga ta pega na mi shel'i boka; i Bo ta ponemi drumi den stòf di morto.

22:16 Pasobra kachónan a rondonámi; un trupa di hasidónan di maldat ta tur rònt di mi; nan a traspasá mi mannan i mi pianan.

22:17 Mi por konta tur mi wesunan; nan ta wak, i ta keda wak mi.

22:18 Nan ta parti mi pañanan entre nan, i nan ta tira lòt riba mi bistí.

22:19 Ma Abo, O SEÑOR, no sea leu di mi; Abo, mi yudansa, pura bin na mi ayudo.

22:20 Libra mi alma for di spada, mi úniko bida, for di e poder di kachó.

22:21 Salbami for di boka di leon; i for di e kachunan di buey di mondi Bo ta kontestámi.

22:22 Lo mi anunsiá Bo nòmber na mi rumannan; meimei di e asamblea lo mi alabáBo.

22:23 Boso ku ta teme SEÑOR, alab'E; boso tur ku ta desendientenan di Jakòb, glorifik'E; boso tur ku ta desendientenan di Israel, para Su dilanti ku temor.

22:24 Pasobra E no a despresiá, ni a aboresé e aflikshon di esun ku ta afligí; tampoko E no a skonde Su kara p'é; ma ora ku el a sklama na djE pa yudansa, El a tende.

22:25 For di Bo mi alabansa ta bin den e gran asamblea; lo mi kumpli ku mi promesa den presensia di esnan ku tin temor di djE.

22:26 Esnan ku ta afligí lo kome i keda satisfecho; esnan ku ta buska SEÑOR lo alab'E. Laga boso kurason biba pa semper.

22:27 Tur e finnan di mundu lo kòrda i bolbe serka SEÑOR, i tur e famianan di e nashonnan lo adorá Bo dilanti.

22:28 Pasobra e reino ta di SEÑOR, i E ta goberná riba e nashonnan.

22:29 Tur esnan di mundu ku ta prosperá lo kome i adorá; tur esnan ku ta bolbe na stòf lo bùig Su dilanti, esnan ku no por tene nan alma na bida.

22:30 Nan desendensia lo sirbiE; esaki lo wòrdu kontá tokante di Señor na e generashon benidero.

22:31 Nan lo bin i deklará Su hustisia na un pueblo ku mester nase ainda, ku El a hasi tur esaki.

Salmonan 23

23:1 SEÑOR ta mi wardadó, lo mi no tin falta di nada.

23:2 E ta ponemi drumi den lugánan di yerba bèrdè; E ta hibami kantu di awanan ketu.

23:3 E ta restorá mi alma; E ta guiami den e kamindanan di hustisia pa motibu di Su nòmber.

23:4 Maske mi kana den e vaye di sombra di morto, mi no tin miedu di maldat, pasobra Abo ta ku mi; Bo bara i Bo garoti ta konsolámi.

23:5 Bo ta prepará un mesa mi dilanti den presensia di mi enemigunan; Bo ta ungi mi kabes ku zeta; mi kopa ta yen te basha ofer.

23:6 Siguramente bondat i miserikòrdia lo siguimi tur e dianan di mi bida, i lo mi biba den e kas di SEÑOR pa semper.

Salmonan 24

24:1 Tera ta di SEÑOR, i tur loke ku e ta kontené, mundu, i esnan ku ta biba den djé.

24:2 Pasobra El a fund'é riba e lamannan, i a stables'é riba e riunan.

24:3 Ken por subi bai den e seru di SEÑOR? I ken por para den Su lugá santu?

24:4 Esun ku tin man limpi i kurason puru, ku no a halsa su alma na banidat, i ku no a hura ku engaño.

24:5 Esei lo risibí un bendishon for di SEÑOR, i hustisia for di e Dios di su salbashon.

24:6 Esaki ta e generashon di esnan ku ta busk'E, ku ta buska Bo kara, O Dios di Jakòb.

24:7 Halsa boso kabesnan, O portanan, i keda halsá, O portanan etèrno, pa asina e Rei di gloria por drenta!

24:8 Ta ken ta e Rei di gloria? SEÑOR, fuerte i poderoso, SEÑOR, poderoso den bataya.

24:9 Halsa boso kabesnan, O portanan; halsa nan, O portanan etèrno, pa e Rei di gloria por drenta!

24:10 Ta ken ta e Rei di gloria aki? E SEÑOR di ehérsitonan, ta E ta e Rei di gloria.