Search the Bible

Salmo 143; Salmo 144; Salmo 145 BSNP Edit

Salmonan 143

143:1 Tende mi orashon, O SEÑOR, skucha mi súplikanan! Kontestámi den Bo fieldat, den Bo hustisia!

143:2 I no drenta den huisio ku Bo sirbidó, pasobra den Bo bista ningun hende bibu no ta hustu.

143:3 Pasobra e enemigu a pèrsiguí mi alma; el a trapa mi bida te na suela; el a hasimi biba den skuridat, manera esnan ku a muri hopi tempu pasá kaba.

143:4 Pesei mi spiritu ta keda desmayá den mi; mi kurason ta keda desolá den mi.

143:5 Mi ta kòrda e dianan di promé aya; mi ta meditá riba tur Bo obranan; mi ta reflekshoná riba e obra di Bo mannan.

143:6 Mi ta ekstendé mi mannan na Bo; mi alma ta anhelá na Bo manera un tera ku tin set di awa.

143:7 Kontestámi lihé, O SEÑOR, mi spiritu ta desmayá; no skonde Bo kara pa mi, pa mi no bira manera esnan ku ta baha den pos.

143:8 Lagami tende Bo miserikòrdia den mainta, pasobra den Bo mi ta konfia; siñami e kaminda ku mi mester kana, pasobra na Bo mi ta halsa mi alma.

143:9 Librami for di mi enemigunan, O SEÑOR; mi ta tuma refugio den Bo.

143:10 Siñami hasi Bo boluntat, pasobra Abo ta mi Dios; laga Bo bon Spiritu guiami na e tera di rektitut.

143:11 Pa kousa di Bo nòmber, O SEÑOR, rebibámi. Den Bo hustisia, saka mi alma for di angustia.

143:12 I den Bo miserikòrdia, kaba ku mi enemigunan, i destruí tur esnan ku ta afligí mi alma; pasobra mi ta Bo sirbidó.

Salmonan 144

144:1 Bendishoná sea SEÑOR, mi baranka, Kende ta tren mi mannan pa guera, i mi dedenan pa bataya;

144:2 mi miserikòrdia i mi fòrti, mi toren fuerte i Esun ku ta librami; mi eskudo i Esun den Ken mi ta tuma refugio; Kende ta hasi pueblonan someté nan mes na mi.

144:3 O SEÑOR, kiko hende ta, ku Bo ta kòrda riba djé? I e yu di hende, ku Bo ta hasi kaso di djé?

144:4 Hende ta manera un rosea; su dianan ta manera un sombra ku ta pasa bai.

144:5 Inkliná Bo shelunan, O SEÑOR, i baha bin abou; toka e serunan, pa nan huma.

144:6 Lansa lamper i plama nan; tira Bo flechanan i konfundí nan.

144:7 Ekstendé Bo man for di ariba; reskatámi i librami for di awanan grandi, for di man di stranheronan,

144:8 kende nan boka ta papia mentira, i kende nan man drechi ta man drechi di engaño.

144:9 O Dios, lo mi kanta un kantika nobo na Bo; riba arpa di dies kuèrdè lo mi kanta alabansa na Bo,

144:10 na Esun ku ta duna salbashon na reinan, na Esun ku ta reskatá Su sirbidó David for di e spada di maldat.

144:11 Reskatámi i librami for di man di stranheronan, kende nan boka ta papia mentira, i kende nan man drechi ta man drechi di engaño.

144:12 Laga nos yu hòmbernan den nan hubentut ta manera mata ku a krese bira grandi, i nos yu muhénan manera pilarnan di skina, trahá manera pa un palasio;

144:13 laga nos mangasinanan ta yen di tur sorto di provishon, i nos karnénan rende bira milnan i dies milnan den nos kunukunan.

144:14 Laga nos bueynan ta yen di forsa pa traha, sin desgrasia i sin pérdida, sin gritamentu den nos kayanan!

144:15 Bendishoná ta e pueblo ku ta asina pará; bendishoná ta e pueblo ku su Dios ta SEÑOR!

Salmonan 145

145:1 Lo mi halsaBo, mi Dios, O Rei, i lo mi bendishoná Bo nòmber pa semper i semper.

145:2 Tur dia lo mi bendishonáBo, i lo mi alabá Bo nòmber pa semper i semper.

145:3 SEÑOR ta grandi, i digno di ser alabá na gran manera; i Su grandesa ta inskudriñabel.

145:4 Generashon pa generashon lo alabá Bo obranan, i lo deklará Bo echonan poderoso.

145:5 Lo mi meditá den e splendor glorioso di Bo mahestat, i den Bo obranan maraviyoso.

145:6 Hende lo papia di e poder di Bo echonan temibel; i lo mi konta di Bo grandesa.

145:7 Ku ánimo nan lo papia di e rekuèrdo di Bo gran bondat, i lo kanta ku goso di Bo hustisia.

145:8 SEÑOR ta yen di grasia i kompashon, Kende no ta rabia lihé, i ta grandi den miserikòrdia.

145:9 SEÑOR ta bon pa tur, i Su miserikòrdianan ta riba tur Su obranan.

145:10 Tur Bo obranan lo alabáBo, O SEÑOR, i Bo santunan lo bendishonáBo.

145:11 Nan lo papia di e gloria di Bo reino, i papia di Bo poder,

145:12 pa hasi yunan di hende konosé Bo echonan poderoso, i e mahestat glorioso di Bo reino.

145:13 Bo reino ta un reino etèrno, i Bo dominio ta di generashon pa generashon.

145:14 SEÑOR ta sostené tur ku kai, i ta lanta tur ku ta abatí.

145:15 Wowo di tur hende ta spera riba Bo, i Bo ta duna nan nan kuminda na su debido tempu.

145:16 Bo ta habri Bo man, i ta satisfasé e deseo di tur ser bibu.

145:17 SEÑOR ta hustu den tur Su kamindanan, i miserikòrdioso den tur Su obranan.

145:18 SEÑOR ta serka di tur esnan ku ta sklama na djE, serka di tur esnan ku ta sklama na djE den bèrdat.

145:19 E lo kumpli ku e deseo di esnan ku ta tem'E; tambe E lo tende nan sklamashon i lo salba nan.

145:20 SEÑOR ta warda tur ku ta stim'E, ma tur e malbadonan E lo destruí.

145:21 Mi boka lo papia di e alabansa di SEÑOR; i tur karni lo bendishoná Su nòmber santu pa semper i semper.