Search the Bible

Salmo 138; Salmo 139 BSNP Edit

Salmonan 138

138:1 Lo mi alabáBo ku henter mi kurason; dilanti di e diosnan lo mi kanta alabansa na Bo.

138:2 Lo mi bùig den direkshon di Bo tèmpel santu, i alabá Bo nòmber pa Bo miserikòrdia i Bo bèrdat, pasobra Bo a engrandesé Bo palabra riba henter Bo nòmber.

138:3 Riba e dia ku mi a yama, Bo a kontestámi; Bo a dunami kurashi, ku fortalesa den mi alma.

138:4 Tur e reinan di tera lo dunaBo gradisimentu, O SEÑOR, ora nan tende e palabranan di Bo boka.

138:5 I nan lo kanta di e kamindanan di SEÑOR, pasobra grandi ta e gloria di SEÑOR.

138:6 Pasobra ounke SEÑOR ta halsá, tòg E ta atendé e hende umilde; ma e hende orguyoso E ta konosé djaleu.

138:7 Maske mi kana meimei di angustia, Abo lo rebibámi; lo Bo saka Bo man kontra e furia di mi enemigunan, i Bo man drechi lo salbami.

138:8 SEÑOR lo kumpli ku Su propósito den mi; O SEÑOR, Bo miserikòrdia ta etèrno; no bandoná e obranan di Bo mannan.

Salmonan 139

139:1 O SEÑOR, Bo a saminámi i Bo konosémi.

139:2 Bo sa ki ora mi ta sinta i ki ora mi ta lanta; Bo ta komprendé mi pensamentunan djaleu.

139:3 Bo ta skudriñá mi kanamentu i mi drumimentu, i tur mi kamindanan ta konosí pa Bo.

139:4 Promé ku tin un palabra riba mi lenga, ya Bo konosé esaki kaba, O SEÑOR.

139:5 Bo a rondonámi di patras i di padilanti, i a pone Bo man riba mi.

139:6 E konosementu aki ta muchu maraviyoso pa mi; e ta muchu haltu, mi no por alkans'é.

139:7 Na unda mi por bai for di Bo Spiritu? Of na unda mi por hui bai for di Bo presensia?

139:8 Si mi subi na shelu, Bo ta einan; si mi habri mi kama den Seol, mira, einan tambe Bo ta!

139:9 Si mi tuma hala di mardugá, si mi bai biba den e partinan mas alehá di laman,

139:10 ayanan tambe Bo man lo guiami, i Bo man drechi lo kohemi tene.

139:11 Si mi bisa: "Siguramente skuridat lo tapami, i e lus ku ta rònt di mi lo bira nochi,"

139:12 asta e skuridat no ta skur pa Bo, i anochi ta mes kla ku di dia. Skuridat i lus ta meskos pa Bo.

139:13 Pasobra Bo a forma mi riñonnan; Bo a wef mi, formami den barika di mi mama.

139:14 Mi ta alabáBo, pasobra mi ta trahá na un manera temerosamente maraviyoso; maraviyoso ta Bo obranan, i mi alma sa esei masha bon.

139:15 Mi wesunan no tabata skondí pa Bo, tempu ku mi a wòrdu trahá na sekreto, bon formá den e profundidatnan di tera.

139:16 Bo wowonan a mira mi supstansia sin forma; i e dianan ku tabata stipulá pa mi, tur tabata skirbí den Bo buki, tempu ku no tabatin ningun di nan ainda.

139:17 Ki presioso Bo pensamentunan ta pa mi, O Dios! Ki grandi nan kantidat ta!

139:18 Si mi lo a konta nan, nan lo a surpasá e pipitanan di santu. Ora mi spièrta, ainda mi ta serka Bo.

139:19 O Dios, ku Bo lo a kita bida di e malbado; bai for di mi, boso, hòmbernan dramadó di sanger!

139:20 Pasobra nan ta papia malu di Bo, i Bo enemigunan ta uza Bo nòmber en bano.

139:21 Lo mi no odia esnan ku ta odiaBo, O SEÑOR, i aboresé esnan ku ta lanta kontra Bo?

139:22 Mi ta odia nan di henter mi kurason; mi tin nan pa mi enemigu.

139:23 Skudriñámi, O Dios, i konosé mi kurason; purbami i konosé mi pensamentunan,

139:24 i mira si tin kualke kaminda di maldat den mi, i guiami riba e kaminda etèrno.