Search the Bible

Salmo 108; Salmo 109; Salmo 110 BSNP Edit

Salmonan 108

108:1 Mi kurason ta para firme, O Dios; lo mi kanta, lo mi kanta alabansa, sí, mi alma lo kanta.

108:2 Spièrta, arpa i lirio; lo mi spièrta e ourora!

108:3 Lo mi duna gradisimentu na Bo den e pueblonan, O SEÑOR; lo mi kanta alabansa na Bo den e nashonnan,

108:4 pasobra Bo miserikòrdia ta grandi, mas haltu ku e shelunan, i Bo bèrdat ta yega te na e nubianan.

108:5 Sea halsá ariba di e shelunan, O Dios, i Bo gloria riba henter mundu.

108:6 Salba ku Bo man drechi i kontestámi, pa Bo stimánan por wòrdu librá!

108:7 Dios a papia for di Su santuario: "Lo Mi regosihá, lo Mi repartí Sikem i midi e Vaye di Sukot.

108:8 Galaad ta di Mi, Manasés ta di Mi; tambe Efrain ta e hèlm di Mi kabes; Juda ta Mi sèpter.

108:9 Moab ta Mi punchero; riba Edòm lo Mi tira Mi sapatu; riba Filistea lo Mi triunfá."

108:10 Ken lo hibami na e stat rondoná? Ken lo guiami hiba Edòm?

108:11 No ta Abo mes, O Dios, a rechasá nos? I lo Bo no sali huntu ku nos ehérsitonan, O Dios?

108:12 Duna nos yudansa kontra e atversario, pasobra yudansa di hende ta en bano.

108:13 Ku Dios nos lo hasi kosnan grandi, i ta E ta Esun ku lo trapa nos atversarionan.

Salmonan 109

109:1 O DIOS di mi alabansa, no keda ketu!

109:2 Pasobra nan a habri boka di maldat i engaño kontra mi; nan a papia kontra mi ku lenga mentiroso.

109:3 Tambe nan a rondonámi ku palabranan di odio, i a bringa kontra mi sin motibu.

109:4 Komo pago pa mi amor nan ta aktua komo mi akusadónan; ma ami ta hasi orashon.

109:5 Asina nan a pagami malu pa bon, i odio pa mi amor.

109:6 Nombra un hende malbado pa ta riba djé, i laga un akusadó para na su man drechi.

109:7 Ora ku e wòrdu huzgá, lagu'é sali kulpabel, i laga su orashon bira piká.

109:8 Laga su dianan ta poko; laga un otro tuma su puesto.

109:9 Laga su yunan keda sin tata, i su esposa keda biuda.

109:10 Laga su yunan dwal rònt i pidi limosna, i laga nan buska pan leu for di nan kasnan ruiná.

109:11 Laga fiadó di plaka gara tur loke e tin, i laga stranheronan plùnder e fruta di su labor.

109:12 No laga tin ningun hende pa tene miserikòrdia di djé, ni ningun hende pa tene kompashon ku su yunan ku a keda sin tata.

109:13 Laga su desendientenan wòrdu kòrtá kitá afó, laga nan nòmber wòrdu kitá den e próksimo generashon.

109:14 Laga e inikidat di su tatanan keda rekòrdá dilanti di SEÑOR, i no laga e piká di su mama wòrdu kitá.

109:15 Laga nan ta kontinuamente dilanti di SEÑOR, pa E kòrta kita rekuèrdo di nan for di riba tera.

109:16 Pasobra e no a kòrda di tene miserikòrdia, ma a pèrsiguí e hende afligí i den nesesidat, i esun di kurason kibrá, pa mata nan.

109:17 Tambe e tabata gusta maldishon, i esei a bin riba djé; i e no tabata hiba gustu den bendishon, asina esei a keda leu for di djé.

109:18 Ma el a bisti maldishon komo si fuera ta su paña di bisti, i esei a drenta su kurpa manera awa, i manera zeta el a drenta su wesunan.

109:19 Laga esei sirbi p'é komo un paña ku e ta tapa su kurpa kuné, i komo un faha ku konstantemente e ta faha su mes kuné.

109:20 Laga esaki ta e rekompensa di SEÑOR pa mi akusadónan, i pa esnan ku ta papia malu kontra mi alma.

109:21 Ma Abo, O DIOS, e Señor, trata ku mi pa kousa di Bo nòmber; librami, pasobra Bo miserikòrdia ta bon;

109:22 pasobra mi ta afligí i den nesesidat, i mi kurason ta heridá den mi.

109:23 Mi ta pasa bai manera un sombra di atardi; mi ta wòrdu sakudí kitá for di kurpa manera tirakochi.

109:24 Mi rudianan ta debil pa motibu di yunamentu, i mi kurpa a bira flaku, sin vèt.

109:25 Tambe mi a bira un reproche pa nan; ora nan mirami, nan ta sakudí kabes.

109:26 Yudami, O SEÑOR mi Dios; salbami segun Bo miserikòrdia.

109:27 Laga nan sa ku esaki ta Bo man; Abo, SEÑOR, a hasi esaki.

109:28 Laga nan maldishoná, ma Abo bendishoná; ora nan lanta, nan lo keda brongosá, ma Bo sirbidó lo ta kontentu.

109:29 Laga mi akusadónan wòrdu bistí ku desonor, i laga nan tapa nan mes ku nan mes bèrguensa manera ku un mantel.

109:30 Ku mi boka lo mi duna masha hopi gradisimentu na SEÑOR, i meimei di e multitut lo mi alab'E.

109:31 Pasobra E ta para na man drechi di esun den nesesidat, pa salb'é for di esnan ku ta huzga su alma.

Salmonan 110

110:1 SEÑOR ta bisa mi Señor: "Sinta na Mi man drechi, te ora Mi hasi Bo enemigunan un banki pa Bo pianan."

110:2 SEÑOR lo ekstendé Bo sèpter poderoso for di Sion, bisando: "Goberná meimei di Bo enemigunan."

110:3 Bo pueblo lo pone su mes disponibel den e dia di Bo poder; den e splendor di santidat, for di e matris di mardugá, Bo hobennan ta pa Bo manera serena.

110:4 SEÑOR a hura, i lo no repentí: "Bo ta un saserdote pa semper, segun e òrdu di Melkisedek."

110:5 Señor ta na Bo man drechi; E lo plècha reinan den e dia di Su furia.

110:6 E lo huzga entre e nashonnan, E lo yena e lugánan ku kadaver, E lo plècha e kabesantenan di hopi pais.

110:7 E lo bebe for di e roi kantu di kaminda; pesei E lo hisa Su kabes.