Search the Bible

Salmo 102; Salmo 103; Salmo 104 BSNP Edit

Salmonan 102

102:1 Tende mi orashon, O SEÑOR! I laga mi sklamashon pa yudansa yega serka Bo.

102:2 No skonde Bo kara pa mi den e dia di mi angustia; inkliná Bo orea na mi; den e dia ku mi yama, kontestámi lihé.

102:3 Pasobra mi dianan ta kaba manera huma, i mi wesunan ta kima manera fogon.

102:4 Mi kurason ta dekaí i marchitá manera yerba, asina ku mi ta lubidá di kome mi pan.

102:5 Pa motibu di e bos di mi kehamentu mi wesunan ta pega na mi karni.

102:6 Mi a bira manera pelikan di desierto; mi a bira manera shoko di lugánan bandoná.

102:7 Mi no por drumi, mi a bira manera parha solitario riba dak di kas.

102:8 Henter dia mi enemigunan ta reprochámi; esnan ku ta hasi bofon di mi ta uza mi nòmber komo maldishon.

102:9 Pasobra mi a kome shinishi komo si fuera ta pan, i a meskla mi bibida ku yoramentu,

102:10 pa motibu di Bo indignashon i Bo furia, komo ku Bo a hisami bentami afó.

102:11 Mi dianan ta manera un sombra di atardi, i mi ta marchitá manera yerba.

102:12 Ma Abo, O SEÑOR, ta permanesé pa semper; i e rekuèrdo di Bo nòmber pa tur generashon.

102:13 Lo Bo lanta i tene kompashon ku Sion; pasobra ta tempu pa tin miserikòrdia di djé, pasobra e tempu stipulá a yega.

102:14 Siguramente Bo sirbidónan ta hiba gustu den su piedranan, i tin duele di su stòf.

102:15 Asina e nashonnan lo teme e nòmber di SEÑOR, i tur e reinan di tera, Bo gloria.

102:16 Pasobra SEÑOR a konstruí Sion; El a aparesé den Su gloria.

102:17 El a konsiderá e orashon di esnan desampará i no a despresiá nan orashon.

102:18 Esaki lo wòrdu skirbí pa e generashon benidero, ku un pueblo ku ainda mester wòrdu kreá por alabá SEÑOR.

102:19 Pasobra for di Su haltura santu El a wak abou; for di shelu SEÑOR a kontemplá tera,

102:20 pa skucha kehamentu di e prezo, pa libra esnan ku ta kondená na morto;

102:21 pa nan deklará e nòmber di SEÑOR den Sion, i Su alabansa na Jerusalèm,

102:22 ora ku e pueblonan ta reuní, i e reinonan, pa sirbi SEÑOR.

102:23 El a debilitá mi forsa na kaminda; El a hasi mi dianan mas kòrtiku.

102:24 Mi ta bisa: "O mi Dios, no hibami na mitar di mi dianan; Bo añanan ta dura di generashon pa generashon.

102:25 For di prinsipio Bo a funda tera; i e shelunan ta e obra di Bo mannan.

102:26 Nan lo peresé, ma Abo lo permanesé; nan tur lo gasta manera un bistí; manera paña lo Bo kambia nan, i nan lo ta kambiá.

102:27 Ma Abo ta keda meskos, i Bo añanan lo no tin fin.

102:28 E yunan di Bo sirbidónan lo biba den siguridat, i nan desendientenan lo biba den Bo presensia."

Salmonan 103

103:1 Bendishoná SEÑOR, O mi alma, i tur loke tin den mi, bendishoná Su nòmber santu.

103:2 Bendishoná SEÑOR, O mi alma, i no lubidá ni un di Su benefisionan;

103:3 Kende ta pordoná tur bo inikidatnan; Kende ta kura tur bo malesanan;

103:4 Kende ta redimí bo bida for di destrukshon; Kende ta koronábo ku miserikòrdia i kompashon;

103:5 Kende ta satisfasé bo deseonan ku kosnan bon, asina ku bo hubentut ta wòrdu renobá manera águila.

103:6 SEÑOR ta hasi hustisia i huisio pa tur esnan ku ta wòrdu oprimí.

103:7 El a hasi Su kamindanan konosí na Moisés, Su echonan na e yunan di Israel.

103:8 SEÑOR ta yen di kompashon i grasia, Kende no ta rabia lihé, i ta abundá den miserikòrdia.

103:9 E lo no reprendé pa semper, ni keda rabiá pa semper.

103:10 E no a trata ku nos segun nos pikánan, ni a paga nos segun nos inikidatnan.

103:11 Pasobra mes haltu ku e shelunan ta for di tera, mes grandi Su miserikòrdia ta pa esnan ku ta tem'E.

103:12 Mes leu ku pariba ta for di pabou, mes leu El a alehá nos transgreshonnan for di nos.

103:13 Meskos ku un tata tin kompashon ku su yunan, asina SEÑOR tin kompashon ku esnan ku ta tem'E.

103:14 Pasobra E sa di kiko nos ta trahá; E ta kòrda ku ta stòf nos ta.

103:15 Pa loke ta hende, su dianan ta manera yerba; manera flor di sabana, asina e ta floresé.

103:16 Ora bientu pasa riba djé, e no t'ei mas; i su lugá no konos'é mas.

103:17 Ma e miserikòrdia di SEÑOR ta di etèrnidat pa etèrnidat riba esnan ku ta tem'E, i Su hustisia na e yunan di yunan,

103:18 na esnan ku ta warda Su aliansa, i ku ta kòrda Su preseptonan pa kumpli ku nan.

103:19 SEÑOR a stablesé Su trono den e shelunan; i Su reino ta goberná riba tur kos.

103:20 Bendishoná SEÑOR, boso, Su angelnan, poderoso den fortalesa, ku ta ehekutá Su palabra, obedesiendo e bos di Su palabra!

103:21 Bendishoná SEÑOR, boso tur, Su ehérsitonan, boso ku ta sirbiE i ku ta hasi Su boluntat.

103:22 Bendishoná SEÑOR, boso tur, Su obranan, na tur parti di Su dominio. Bendishoná SEÑOR, O mi alma!

Salmonan 104

104:1 Bendishoná SEÑOR, O mi alma! O SEÑOR mi Dios, Bo ta masha grandi; Bo ta bistí ku splendor i mahestat.

104:2 E ta kubri Su mes ku lus manera ku un mantel, E ta span e shelunan manera lona di tènt,

104:3 E ta pone e balkinan di Su kambernan-ariba den e awanan, E ta hasi e nubianan Su garoshi, E ta kana riba e halanan di bientu,

104:4 E ta hasi e bientunan Su mensaheronan, Su sirbidónan flam di kandela.

104:5 El a stablesé tera riba su fundeshinan, pa asina esei no kita for di su lugá nunka mas.

104:6 Bo a tap'é ku profundidat, manera ku un bistí; ariba di e serunan e awanan tabata keda para.

104:7 Debí na Bo reprendementu nan a hui; na e zonidu di Bo strena nan a pura bai.

104:8 Nan a subi pasa riba e serunan i a baha den e vayenan, na e lugá ku Bo a stablesé pa nan.

104:9 Bo a pone un frontera ku nan no por pasa, pa nunka mas nan no bolbe kubri tera.

104:10 E ta manda fuentenan den e vayenan; nan ta kore meimei di e serunan.

104:11 Nan ta duna di bebe na tur bestia di sabana; e burikunan di mondi ta kita nan set.

104:12 Banda di nan e parhanan di shelu tin nan neishi; nan ta kanta den e ramanan.

104:13 E ta muha e serunan for di Su kambernan-ariba; tera ta keda satisfecho ku e fruta di Su obranan.

104:14 E ta hasi yerba krese pa bestia, i vegetashon pa hende kultivá, pa asina e por saka pan for di e tera,

104:15 i biña ku ta hasi kurason di hende kontentu, zeta pa hasi su kara lombra, i pan ku ta fortalesé kurason di hende.

104:16 E palunan di SEÑOR ta haña sufisiente awa, e palunan di seda di Líbano, ku El a planta.

104:17 Ayanan e parhanan ta traha nan neishi, i e oyevar tin su kas den e palu di pino.

104:18 E serunan haltu ta pa kabritu di mondi; e barankanan, un refugio pa konènchi.

104:19 El a pone luna pa e temporadanan di aña; solo sa ki ora e mester baha.

104:20 Bo ta pone skuridat, i ta bira nochi; e ora ei tur bestia di mondi ta kuminsá move.

104:21 E leonnan chikitu ta gruña tras di nan proi, i ta buska nan kuminda for di Dios.

104:22 Ora solo sali nan ta retirá, i ta kai drumi den nan kueba.

104:23 Hende ta sali bai su trabou i ta traha te anochi.

104:24 O SEÑOR, ki numeroso Bo obranan ta! Ku sabiduria Bo a traha tur; tera ta yen di loke Bo a krea.

104:25 Ata e laman, grandi i hanchu, kaminda tin kantidat di bestia ku no por wòrdu kontá ta kriul den otro, bestia chikitu i grandi.

104:26 Aya barkunan ta pasa; i Leviatan, ku Bo a forma, ta hunga den djé.

104:27 Esakinan tur ta spera riba Bo, pa Bo duna nan kuminda na su debido tempu.

104:28 Bo ta duna nan, nan ta rekohé esaki; Bo ta habri Bo man, nan ta keda satisfecho ku kosnan bon.

104:29 Bo ta skonde Bo kara, nan ta desmayá; Bo ta kita nan rosea, nan ta muri i ta bolbe bira stòf.

104:30 Bo ta manda Bo Spiritu, nan ta wòrdu kreá; Bo ta renobá e superfisio di tera.

104:31 Laga e gloria di SEÑOR dura pa semper; laga SEÑOR regosihá den Su obranan.

104:32 E ta wak e tera, i esaki ta tembla; E ta mishi ku e serunan, i nan ta saka huma.

104:33 Lo mi kanta na SEÑOR tanten ku mi ta biba; lo mi kanta alabansa na mi Dios mientras ku mi tin bida.

104:34 Laga mi meditashon ta agradabel p'E; pa loke t'ami, lo mi alegrá mi mes den SEÑOR.

104:35 Laga pekadónan peresé for di riba tera, i no laga malbadonan eksistí mas. Bendishoná SEÑOR, O mi alma. Alabá SEÑOR!