Search the Bible

Salmo 1; Salmo 2 BSNP Edit

Salmonan 1

1:1 Bendishoná ta e hende ku no ta kana den e konseho di malbadonan, ni ta para den e kaminda di pekadónan, ni ta sinta riba e stul di bofonadónan!

1:2 Ma su delisia ta den e lei di SEÑOR, i den Su lei e ta meditá di dia i anochi.

1:3 I e lo ta manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.

1:4 Ma no t'asina ku e malbadonan; nan ta manera bagas ku bientu ta supla bai kuné.

1:5 Pesei den e huisio e malbadonan lo no keda para, ni pekadónan den e asamblea di e hustunan.

1:6 Pasobra SEÑOR konosé e kaminda di e hustunan, ma e kaminda di e malbadonan lo peresé.

Salmonan 2

2:1 Pakiko e nashonnan ta reboltiá asina, i e pueblonan ta plania un kos bano?

2:2 E reinan di mundu ta tuma nan posishon, i e gobernantenan ta konsultá huntu kontra SEÑOR i kontra Su Ungí, bisando:

2:3 "Laga nos kibra nan kadenanan i tira nan kabuyanan for di nos!"

2:4 Esun ku ta sinta den e shelunan ta hari; Señor ta hasi bofon di nan.

2:5 Anto E lo papia ku nan den Su rabia i terorisá nan den Su furia:

2:6 "Ma pa loke ta Ami, Mi a stablesé Mi Rei riba Sion, Mi seru santu."

2:7 "Siguramente lo Mi proklamá e dekreto: SEÑOR a bisaMi: 'Bo ta Mi Yu, awe Mi a engendráBo.

2:8 PidiMi, i siguramente lo Mi dunaBo e nashonnan komo Bo erensia, i e finnan di tera komo Bo poseshon.

2:9 Lo Bo kibra nan ku bara di heru, lo Bo kibra nan na pida-pida manera kos trahá di klei.'"

2:10 Pesei anto, O reinan, uza sabiduria; aseptá spièrtamentu, O huesnan di tera.

2:11 Sirbi SEÑOR ku temor, i regosihá ku temblamentu.

2:12 Sunchi e Yu, pa E no rabia i boso peresé na kaminda, pasobra den un ratu di ora Su furia por sende. Bendishoná ta tur esnan ku ta tuma refugio den djE!