Search the Bible

Mateo 20; Mateo 21 BSNP Edit

Mateo 20

20:1 "Pasobra e reino di shelu ta manera un doño di kunuku ku a sali mainta tempran pa kontratá trahadó pa su kunuku di wendrùif.

20:2 I ora ku el a kumbiní ku e trahadónan pa un denario pa dia, el a manda nan bai na su kunuku di wendrùif.

20:3 "I el a sali banda di nueb'or di mainta i a mira otronan pará pòrnada riba plasa;

20:4 i el a bisa eseinan: 'Boso tambe bai na e kunuku di wendrùif i lo mi duna boso loke ta hustu.' I nan a bai.

20:5 "I el a bolbe sali banda di diesdos or di mèrdia i tres'or di atardi, i a hasi meskos.

20:6 I pa banda di sink'or di atardi el a sali i a haña otronan pará pòrnada, i el a bisa nan: 'Pakiko boso ta para aki henter dia sin hasi nada?'

20:7 "Nan a bis'é: 'Pasobra ni un hende no a kontratá nos.' "El a bisa nan: 'Boso tambe bai na e kunuku di wendrùif.'

20:8 "I ora ku a bira tardi, doño di e kunuku di wendrùif a bisa su mayordomo: 'Yama e trahadónan i paga nan nan suèldo, kuminsando ku e último grupo te na esun di promé.'

20:9 "I ora esnan ku a wòrdu kontratá banda di sink'or di atardi a bin, kada un a risibí un denario.

20:10 I ora esnan ku a wòrdu kontratá promé a bin, nan a spera ku nan lo a risibí mas; i nan tambe a risibí un denario kada un.

20:11 I ora nan a risibí esaki, nan a kuminsá murmurá kontra e doño di kunuku,

20:12 bisando: 'Esnan último aki a traha solamente ún ora, i bo a hasi nan igual ku nos ku a wanta e peso i e kalor di dia.'

20:13 "Ma el a kontestá i a bisa un di nan: 'Amigu, mi no ta hasi ningun inhustisia ku bo. No ta pa un denario bo a kumbiní ku mi?

20:14 Tuma loke ta di bo i sigui bo kaminda, ma mi ta deseá di duna e último hòmber aki mes tantu ku bo.

20:15 Mi no tin derecho di hasi loke mi ta deseá ku loke ta di mi? Of bo wowo ta envidioso, pasobra mi ta generoso?'

20:16 "Asina e últimonan lo ta e proménan, i e proménan lo ta e últimonan."

20:17 I ora Jesus tabata pa bai Jerusalèm, El a hala e diesdos disipelnan un banda, i na kaminda El a bisa nan:

20:18 "Mira, nos ta bai Jerusalèm; i e Yu di Hende lo wòrdu entregá na e saserdotenan prinsipal i eskribanan; i nan lo konden'E na morto,

20:19 i lo entregu'E na e paganonan, pa nan hasi bofon di djE, sut'E i krusifik'E. I riba e di tres dia E lo wòrdu lantá."

20:20 E ora ei mama di e yu hòmbernan di Zebedeo a bin serka djE, huntu ku su yu hòmbernan, i a bùig te na suela pa pidiE un fabor.

20:21 I El a puntr'é: "Kiko bo ta deseá?" El a kontest'E: "Ordená ku den Bo reino e dos yu hòmbernan aki di mi por sinta, ún na Bo man drechi i ún na Bo man robes."

20:22 Ma Jesus a kontestá i a bisa: "Boso no sa kiko boso ta pidi. Boso por bebe e kopa ku Ami ta bai bebe?" Nan a kontest'E: "Nos por."

20:23 El a bisa nan: "Mi kopa boso lo bebe, ma pa sinta na Mi man drechi i na Mi man robes, esaki no ta keda na Mi pa duna, ma ta pa esnan pa kendenan Mi Tata a prepará esei."

20:24 I ora ku e diesnan a tende esaki, nan a tuma e dos rumannan mashá na malu.

20:25 Ma Jesus a yama nan serka djE i a bisa: "Boso sa ku e gobernantenan di e paganonan tin dominio riba nan, i nan shon grandinan ta ehersé outoridat riba nan.

20:26 Entre boso no t'asina, ma ken ku kier bira grandi entre boso lo ta boso sirbidó,

20:27 i ken ku kier ta esun di promé entre boso lo ta boso esklabu;

20:28 meskos ku e Yu di Hende no a bin pa wòrdu sirbí, ma pa sirbi, i pa duna Su bida komo preis di reskate pa hopi."

20:29 I ora nan tabata sali for di Jeriko, un multitut grandi tabata siguiE.

20:30 I ata, dos hòmber siegu ku tabata sintá kantu di kaminda, ora nan a tende ku Jesus tabata pasa, a grita, bisando: "Señor, Yu di David, tene miserikòrdia di nos!"

20:31 I e multitut a rous nan manda nan keda ketu; ma nan a grita mas duru ainda, bisando: "Señor, Yu di David, tene miserikòrdia di nos!"

20:32 I Jesus a keda para i a yama nan i a puntra: "Kiko boso kier pa Mi hasi pa boso?"

20:33 Nan a kontest'E: "Señor, nos kier pa nos wowonan wòrdu habrí."

20:34 I Jesus a tene kompashon ku nan i a mishi ku nan wowonan; i mesora nan a rekobrá nan bista i a siguiE.

Mateo 21

21:1 I ora nan a yega serka di Jerusalèm i a yega na Bètfage, na Seru di Oleifi, Jesus a manda dos disipel,

21:2 bisando nan: "Bai den e pueblito ku ta keda enfrente di boso, i mesora boso lo haña un buriku yewa mará einan, i un yu di buriku huntu kuné; lòs nan i trese nan pa Mi.

21:3 I si un hende bisa boso algu, boso lo kontestá: 'Señor tin mester di nan;' i mesora e lo manda nan."

21:4 Awor esaki a sosodé pa por keda kumplí loke a wòrdu bisá dor di e profeta ku a bisa:

21:5 "Bisa e yu muhé di Sion: 'Ata bo Rei ta bin serka bo, mansu i sintá riba un buriku, un yu di buriku, yu di un bestia di karga.'"

21:6 I e disipelnan a bai i a hasi manera Jesus a ordená nan,

21:7 i a trese e buriku yewa i e yu di buriku i a pone nan mantelnan riba nan, i El a sinta riba e mantelnan.

21:8 I mayoria di e multitut tabata habri nan mantelnan riba kaminda, i otronan tabata kòrta rama for di e palunan i tabata pone nan riba kaminda.

21:9 I e multitutnan ku tabata bai Su dilanti, i esnan ku tabata sigui, tabata grita, bisando: "Hosana na e Yu di David!" "Bendishoná ta Esun ku ta bin den e nòmber di SEÑOR!" "Hosana den e halturanan!"

21:10 I ora ku El a drenta Jerusalèm, henter e stat a keda arib'abou i tabata bisa: "Ta ken esaki ta?"

21:11 I e multitutnan tabata bisa: "Esaki ta profeta Jesus, for di Nazarèt di Galilea."

21:12 I Jesus a bai den tèmpel i a kore ku tur esnan ku tabata kumpra i bende den tèmpel saka nan afó, i a bòlter e mesanan di e kambiadónan di plaka, i e stulnan di esnan ku tabata bende palomba.

21:13 I El a bisa nan: "Ta pará skirbí: 'Mi kas lo wòrdu yamá un kas di orashon'; ma boso ta hasié un kueba di ladron."

21:14 I e siegunan i lamnan tabata bin serka djE den tèmpel, i E tabata kura nan.

21:15 Ma ora ku e saserdotenan prinsipal i eskribanan a mira e kosnan maraviyoso ku E tabata hasi, i e muchanan ku tabata grita den tèmpel, bisando: "Hosana na e Yu di David," nan a tuma esaki na malu.

21:16 I nan a bis'E: "Bo ta tende kiko esakinan ta bisa?" I Jesus a bisa nan: "Sí; boso no a lesa nunka: 'For di boka di mucha chikitu i di yunan na pechu Bo a prepará alabansa pa Bo mes'?"

21:17 I El a bai laga nan i a sali for di e stat bai Betania, i a hospedá ayanan.

21:18 Awor su manisé, ora ku El a bolbe na e stat, El a haña hamber.

21:19 I mirando un palu di figo banda di kaminda, El a bai na djé, i no a haña nada na djé sino blachi so; i El a bisa e palu: "Nunka mas lo bo no bolbe duna fruta." I mesora e palu di figo a seka.

21:20 I ora ku e disipelnan a mira esaki, nan a keda atmirá i a puntra: "Ta kon e palu di figo a seka mesora asina?"

21:21 I Jesus a kontestá i a bisa nan: "Di bèrdat Mi ta bisa boso, si boso tin fe i no ta duda, no solamente boso lo por hasi loke a wòrdu hasí ku e palu di figo, ma asta si boso bisa e seru aki: 'Sea kitá for di einan i tirá den laman,' esei lo sosodé.

21:22 I tur loke boso pidi den orashon, ku fe, boso lo risibí."

21:23 I ora ku El a bin den tèmpel, e saserdotenan prinsipal i e ansianonan di e pueblo a bin serka djE, mientras ku E tabata siña hende, i a puntra: "Ku ki outoridat Bo ta hasi e kosnan aki, i ta ken a dunaBo e outoridat aki?"

G2064 -- I ora ku El a bin -> When He entered
G2413 -- den tèmpel -> the temple
G749 -- , e saserdotenan -> the chief
G749 -- prinsipal -> priests
G4245 -- i e ansianonan -> and the elders
G2992 -- di e pueblo -> of the people
G4334 -- a bin -> came
G1321 -- serka djE, mientras ku E tabata siña hende -> to Him while He was teaching
G3004 -- , i a puntra -> and said
G4169 -- : "Ku ki -> By what
G1849 -- outoridat -> authority
G4160 -- Bo ta hasi -> are You doing
G3778 -- e kosnan -> these
G3778 -- kosnan -> things
G5101 -- , i ta ken -> and who
G1325 -- a dunaBo -> gave
G3778 -- e outoridat -> You this
G1849 -- outoridat -> authority

21:24 I Jesus a kontestá i a bisa nan: "Ami tambe lo hasi boso un pregunta. Si boso kontestáMi, Ami tambe lo bisa boso ku ki outoridat Mi ta hasi e kosnan aki.

21:25 E boutismo di Juan, for di unda esei a bin, for di shelu òf for di hende?" I nan a kuminsá deliberá nan ku nan, bisando: "Si nos bisa: 'For di shelu,' E lo bisa nos: 'Pakiko boso no a ker'é anto?'

21:26 Ma si nos bisa: 'For di hende,' nos tin miedu di e multitut, pasobra nan tur tin Juan pa un profeta."

21:27 I nan a kontestá Jesus i a bisa: "Nos no sa." I El a bisa nan: "Ami tampoko lo no bisa boso ku ki outoridat Mi ta hasi e kosnan aki.

21:28 "Ma kiko boso ta pensa? Un hòmber tabatin dos yu hòmber, i el a bai serka esun di promé i a bis'é: 'Yu, bai traha awe den e kunuku di wendrùif.'

21:29 "I el a kontestá i a bisa: 'Mi no kier'; i despues el a haña duele i a bai.

21:30 "I e tata a bai serka e di dos i a bis'é e mesun kos. I esaki a kontestá i a bisa: 'Mi ta bai, señor'; ma e no a bai.

21:31 "Kual di nan dos a hasi e boluntat di su tata?" Nan a bisa: "Esun di promé." Jesus a bisa nan: "Di bèrdat Mi ta bisa boso ku e publikanonan i e prostitutanan lo drenta e reino di Dios promé ku boso.

21:32 Pasobra Juan a bin serka boso den e kaminda di hustisia i boso no a ker'é; ma e publikanonan i e prostitutanan a ker'é; i boso, mirando esaki, no a repentí despues pa ker'é.

21:33 "Skucha un otro parábola. Tabatin un doño di kunuku ku a planta un kunuku di wendrùif i a lanta un muraya rònt di djé. El a koba un baki-di-pèrs-wendrùif den djé, i a traha un toren, a hür é ku kunukeronan i a bai hasi un biahe.

21:34 I ora tempu di kosecha tabata aserkando, el a manda su esklabunan serka e kunukeronan pa risibí su frutanan.

21:35 "I e kunukeronan a kohe su esklabunan, i esun nan a bati, un otro nan a mata i e di tres nan a piedra.

21:36 El a bolbe manda un otro grupo di esklabu, mas grandi ku esun di promé; i nan a hasi e mesun kos ku nan.

21:37 I por último el a manda su yu hòmber serka nan, bisando: 'Nan lo respetá mi yu.'

21:38 "Ma ora ku e kunukeronan a mira e yu, nan a bisa otro: 'Esaki ta e eredero; ban laga nos mat'é i tuma su erensia pa nos.'

21:39 I nan a koh'é, a tir'é pafó di e kunuku di wendrùif i a mat'é.

21:40 "Pesei, ora doño di e kunuku di wendrùif bin, kiko lo e hasi ku e kunukeronan ei?"

21:41 Nan a bis'E: "E lo hasi e malbadonan ei muri un mal morto i lo hür e kunuku di wendrùif ku otro kunukeronan, kendenan lo entregu'é su frutanan na su debido tempu."

21:42 Jesus a bisa nan: "Boso no a lesa nunka den e Skrituranan: 'E piedra ku e trahadónan a rechasá, esaki a bira e piedra-di-skina prinsipal; esaki a bin di SEÑOR, i e ta maraviyoso den nos bista'?

21:43 "Pesei Mi ta bisa boso, e reino di Dios lo wòrdu kitá for di boso, i duná na un nashon ku sí ta hasié produsí fruta.

21:44 I esun ku kai riba e piedra aki lo wòrdu kibrá na pida-pida; ma riba esun ku e kai, esei e lo plama manera stòf."

21:45 I ora ku e saserdotenan prinsipal i e fariseonan a tende Su parábolanan, nan a komprendé ku E tabata papia di nan.

21:46 I ora nan tabata buska pa gar'E, nan tabatin miedu di e multitutnan, pasobra nan tabatin E pa un profeta.