Search the Bible

Lukas 10; Lukas 11 BSNP Edit

Lukas 10

10:1 Awor despues di esaki Señor a nombra setenta otro, i a manda nan dos-dos Su dilanti pa tur stat i lugá, kaminda E mes tabata pa bai.

10:2 I E tabata bisa nan: "E kosecha ta mashá grandi, ma trahadó ta poko; pesei, pidi e Señor di kosecha pa manda trahadó den Su kosecha.

10:3 Boso bai anto; Mi ta manda boso manera lamchi meimei di lobo.

10:4 No hiba bolsa, ni saku, ni sandalia; i no saludá ningun hende na kaminda.

10:5 "I den kualke kas ku boso drenta, bisa promé: 'Pas sea ku e kas aki.'

10:6 I si tin un hende di pas einan, boso pas lo keda riba djé; ma si no tin, boso pas lo bolbe serka boso.

10:7 I keda den e kas ei, i kome i bebe loke nan duna boso, pasobra e trahadó ta digno di su suèldo. No keda bai di un kas pa otro.

10:8 "I den kualke stat ku boso drenta, i nan risibí boso, kome loke wòrdu poní boso dilanti;

10:9 i kura e enfermonan ku tin einan, i bisa nan: 'E reino di Dios a yega serka boso.'

10:10 Ma ora boso drenta un stat i nan no risibí boso, sali bai den su kayanan i bisa:

10:11 'Te asta e stòf di boso stat ku ta pega na nos pia nos ta sakudí kita kontra boso; ma sea sigur di esaki, ku e reino di Dios a yega serka.'

10:12 Mi ta bisa boso, riba e dia ei lo ta mas tolerabel pa Sodoma ku pa e stat ei.

10:13 "Ai di bo, Korazin! Ai di bo, Bètsaida! Pasobra si na Tiro i na Sidon a wòrdu hasí e milagernan ku a sosodé den boso, ya pa hopi tempu kaba nan lo a repentí, sintá den paña di saku i shinishi.

10:14 Ma den e huisio lo ta mas tolerabel pa Tiro i Sidon ku pa boso.

10:15 I abo, Kapernaum, ta te na shelu bo kier wòrdu halsá? Te na fièrnu lo bo wòrdu rebahá!

10:16 "Esun ku tende na boso ta tende na Mi, i esun ku rechasá boso, ta Ami e ta rechasá; i esun ku rechasáMi ta rechasá Esun ku a mandaMi."

10:17 I e setentanan a bolbe ku goso, bisando: "Señor, asta e demoñonan ta sometí na nos den Bo nòmber."

10:18 I El a bisa nan: "Mi a mira Satanás kai for di shelu manera lamper.

10:19 Mira, Mi a duna boso outoridat pa trapa riba kolebra i skòrpion, i riba tur poder di e enemigu, i nada lo no hasi boso daño.

10:20 Ma no regosihá den esaki, ku e spiritunan ta sometí na boso, ma regosihá ku boso nòmbernan ta skirbí den shelu."

10:21 Na e mesun momento ei Jesus a regosihá grandemente den Spiritu Santu, i a bisa: "Mi ta alabáBo, O Tata, Señor di shelu i tera, ku Bo a skonde e kosnan aki pa sabínan i inteligentenan i a revelá nan na mucha chikitu. Sí, Tata, pasobra asina tabata agradabel den Bo bista.

10:22 "Tur kos a wòrdu entregá na Mi dor di Mi Tata, i ningun no sa Ken e Yu ta, sino e Tata so, i Ken e Tata ta, sino e Yu so, i esun na kende e Yu kier revel'E."

10:23 I El a drai wak Su disipelnan, i nan so El a bisa: "Bendishoná ta e wowonan ku ta mira e kosnan ku boso ta mira,

10:24 pasobra Mi ta bisa boso, ku hopi profeta i rei tabata deseá di mira e kosnan ku boso ta mira, ma no a mira nan, i di tende e kosnan ku boso ta tende, ma no a tende nan."

10:25 I mira, un eksperto di Lei a lanta para i a pon'E na prueba, bisando: "Maestro, kiko mi mester hasi pa eredá bida etèrno?"

10:26 I Jesus a bis'é: "Kiko ta pará skirbí den Lei? Kiko bo ta lesa den djé?"

10:27 I el a kontestá i a bisa: "Stima SEÑOR bo Dios ku henter bo kurason, i ku henter bo alma, i ku tur bo forsa, i ku henter bo mente; i bo próhimo manera bo mes."

10:28 I Jesus a bis'é: "Bo a kontestá bon; hasi esaki i lo bo biba."

10:29 Ma e kier a hustifiká su mes i a bisa Jesus: "I ta ken ta mi próhimo?"

10:30 Jesus a kontestá i a bisa: "Un hòmber tabata baha di Jerusalèm bai Jeriko, i el a kai den man di ladron; i nan a kita tur kos for di djé i a batié, i a bai lagu'é mitar morto.

10:31 I pa kasualidat un saserdote tabata baha bai pa e kaminda ei, i ora ku el a mir'é, el a pas'é forbei bai pa e otro banda.

10:32 I meskos un levita tambe, ora ku el a yega na e lugá ei i a mir'é, a pas'é forbei bai pa e otro banda.

10:33 Ma un samaritano, ku tabata biahando, a yega serka di djé; i ora ku el a mir'é, el a sinti kompashon,

10:34 i a bai serka djé i a mara su heridanan i a basha zeta i biña riba nan; i el a pon'é riba su buriku, a hib'é na un posada i a pèrkurá p'é.

10:35 I e siguiente dia el a saka dos denario duna e doño di posada i a bisa: 'Pèrkurá p'é; i ki gastu mas ku bo hasi lo mi pagabo ora mi bolbe.'

10:36 "Kual di e tresnan aki bo ta kere tabata próhimo di e hòmber ku a kai den man di ladron?"

10:37 I el a bisa: "Esun ku a mustra miserikòrdia na djé." I Jesus a bis'é: "Bai i hasi meskos."

10:38 Awor segun ku nan tabata sigui nan biahe, El a bai na un pueblito; i un muhé ku yama Marta a risibiE den su kas.

10:39 I e tabatin un ruman muhé ku yama Maria, kende, sintá na pia di Señor, tabata skucha Su Palabra.

10:40 Ma Marta tabata mashá okupá ku tantu kos di hasi; i el a bin serka Jesus, i a bisa: "Señor, no ta importáBo ku mi ruman muhé ta laga mi so sirbi? Bis'é anto pa yudami."

10:41 Ma Señor a kontestá i a bis'é: "Marta, Marta, bo ta preokupá i ta molestiá bo kurpa ku asina hopi kos;

10:42 ma poko kos ta nesesario, en realidat ún so, pasobra Maria a skohe e parti bon ku lo no wòrdu kitá for di djé."

Lukas 11

11:1 I a sosodé ku E tabata hasi orashon na un lugá, i ora ku El a kaba, un di Su disipelnan a bis'E: "Señor, siña nos hasi orashon, meskos ku Juan tambe a siña su disipelnan."

11:2 I El a bisa nan: "Ora boso ta hasi orashon, bisa: 'Nos Tata ku ta den shelu, Bo nòmber sea santifiká. Ku Bo reino bin.

11:3 Duna nos awe nos pan di kada dia.

11:4 I pordoná nos nos pikánan, pasobra nos tambe ta pordoná tur esnan ku ta debe nos. I no hiba nos den tentashon.'"

11:5 I El a bisa nan: "Suponé ku un di boso tin un amigu, i mei anochi bo ta bai serka djé, i ta bis'é: 'Amigu, fiami tres pan,

11:6 pasobra un amigu di mi a yega for di un biahe serka mi, i mi no tin nada pa pone su dilanti'.

11:7 "I for di paden e lo kontestá i bisa: 'No molestiámi; ya porta ta será kaba i mi yunan i ami ta riba kama; mi no por lanta pa dunabo nada.'

11:8 Mi ta bisa boso, maske e no lanta dun'é nada pasobra e ta su amigu, tòg, pa motibu di su impertinensia e lo lanta i dun'é tur loke e tin mester.

11:9 "I Mi ta bisa boso, pidi, i lo wòrdu duná na boso; buska, i boso lo haña; bati, i lo wòrdu habrí pa boso.

11:10 Pasobra ken ku pidi, ta risibí; i esun ku buska, ta haña; i pa esun ku bati, lo wòrdu habrí.

11:11 "Suponé ku un tata entre boso, si su yu pidié un piská, lo e dun'é un kolebra?

11:12 Of si e pidié un webu, lo e dun'é un skòrpion?

11:13 Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e Spiritu Santu na esnan ku pidiE!"

11:14 I E tabata saka un demoño, i esaki tabata mudo. I a sosodé ku ora e demoño a sali, e hòmber mudo a papia; i e multitutnan a keda asombrá.

11:15 Ma algun di nan a bisa: "E ta saka demoño pa medio di Beëlzebú, e prens di demoñonan."

11:16 I otronan, pa pon'E na prueba, tabata pidiE un señal for di shelu.

11:17 Ma E tabata konosé nan pensamentunan, i a bisa nan: "Tur reino dividí kontra su mes ta keda ruiná; i un kas dividí kontra su mes ta kai.

11:18 I si Satanás tambe ta dividí kontra su mes, kon su reino lo keda para? Pasobra boso ta bisa ku Ami ta saka demoño pa medio di Beëlzebú.

11:19 I si Ami ta saka demoño pa medio di Beëlzebú, pa medio di ken boso yu hòmbernan ta saka nan? Pesei eseinan lo ta boso huesnan.

11:20 Ma si Ami ta saka demoño pa medio di e dede di Dios, anto e reino di Dios a yega serka boso.

11:21 "Ora ku e hòmber fuerte, bon armá, ta kuida su mes palasio, su propiedatnan ta bon sigurá;

11:22 ma ora ku un ku ta mas fuerte kuné atak'é i poderá di djé, esei ta kita for di djé henter su armadura riba kual e tabata konfia, i ta parti su botín.

11:23 "Esun ku no ta ku Mi ta kontra Mi; i esun ku no ta rekohé huntu ku Mi ta plama.

11:24 "Ora ku un spiritu impuru sali for di un hende, e ta pasa dor di lugánan seku, buskando sosiegu, i ora ku e no haña esei, e ta bisa: 'Lo mi bolbe na mi kas for di unda mi a sali.'

11:25 I ora ku e bin, e ta hañ'é barí i tur na òrdu.

11:26 E ora ei e ta bai i ta hiba huntu kuné shete otro spiritu mas malbado kuné, i nan ta drenta paden i ta keda biba einan; i e último estado di e hende ei ta bai bira pió ku esun promé."

11:27 I a sosodé ku mientras E tabata papia e kosnan aki un di e muhénan den e multitut a halsa su bos, i a bis'E: "Bendishoná ta e barika ku a kargaBo, i e pechunan ku a kriaBo."

11:28 Ma El a bisa; "Alkontrario, bendishoná ta esnan ku ta tende e palabra di Dios, i ta ward'é."

11:29 I segun ku e multitutnan tabata oumentá, El a kuminsá bisa: "E generashon aki ta un generashon malbado; e ta buska un señal, ma ningun señal lo no wòrdu duná na djé, sino solamente e señal di Jonas.

11:30 Pasobra meskos ku Jonas a bira un señal pa e ninivitanan, asina e Yu di Hende lo ta pa e generashon aki.

11:31 E Reina di Sùit lo lanta den e huisio huntu ku e hòmbernan di e generashon aki i kondená nan, pasobra el a bin for di e finnan di mundu pa tende e sabiduria di Salomon; i mira, mas ku Salomon t'aki!

G938 -- E Reina -> The Queen
G3558 -- di Sùit -> of the South
G1453 -- lo lanta -> will rise
G2920 -- den e huisio -> at the judgment
G435 -- huntu ku e hòmbernan -> up with the men
G3778 -- di e -> of this
G1074 -- generashon -> generation
G2632 -- i kondená -> and condemn
G3754 -- nan, pasobra -> them, because
G2064 -- el a bin -> she came
G4009 -- for di e finnan -> from the ends
G1093 -- di mundu -> of the earth
G191 -- pa tende -> to hear
G4678 -- e sabiduria -> the wisdom
G4672 -- di Salomon -> of Solomon
G2400 -- i mira, -> and behold
G4183 -- mas -> something
G4183 -- ku -> greater
G4672 -- Salomon -> than Solomon
G5602 -- t'aki! -> is here

11:32 E hòmbernan di Nínive lo lanta den e huisio huntu ku e generashon aki i konden'é, pasobra nan a repentí dor di e predikashi di Jonas; i mira, mas ku Jonas t'aki.

11:33 "Ningun hende, despues di a sende un lampi, no ta pon'é den un bodega, ni bou di un kaha di midi trigo, ma riba un kandelá, pa esnan ku drenta por mira e lus.

11:34 E lampi di bo kurpa ta bo wowo; ora bo wowo ta bon, henter bo kurpa tambe ta yen di lus; ma ora ku e ta malu, bo kurpa tambe ta yen di skuridat.

11:35 Pesei, pèrkurá pa e lus den bo no ta skuridat.

11:36 Asina anto, si henter bo kurpa ta yen di lus, sin ningun parti skur den djé, e lo ta kompletamente iluminá, manera ora e lampi ta iluminábo ku su rayonan."

11:37 Awor ora ku El a kaba di papia, un fariseo a pidiE pa kome serka djé; i El a bai paden, i a bai sinta na mesa.

11:38 I ora ku e fariseo a mira esaki, el a keda strañá ku E no a laba Su mes promé ku kome.

11:39 Ma Señor a bis'é: "Awor boso, fariseonan, ta limpia parti pafó di kopa i di tayó; ma parti paden boso ta yen di ladronisia i maldat.

11:40 Boso, bobonan, no ta Esun ku a traha e parti pafó a traha e parti paden tambe?

11:41 Ma duna loke ta paden komo limosna, i e ora ei tur kos ta limpi pa boso.

11:42 "Ma ai di boso, fariseonan! Pasobra boso ta duna un di dies parti di menta i ruda i di tur sorto di yerba, i tòg no ta hasi kaso di hustisia i di amor di Dios. Ma esakinan ta e kosnan ku boso mester a hasi, sin neglishá e otronan.

G3759 -- "Ma ai -> But woe
G5330 -- di boso, fariseonan! -> to you Pharisees
G586b -- Pasobra boso ta duna -> ! For you pay
G586b -- un di dies parti -> tithe
G2238 -- di menta -> of mint
G4076 -- i ruda -> and rue
G3956 -- i di tur -> and every
G3001 -- sorto di -> ] garden
G3001 -- yerba, -> herb
G3928 -- i tòg no ta hasi kaso -> ] disregard
G2920 -- di hustisia -> justice
G26 -- i di amor -> and the love
G3778 -- di Dios. Ma esakinan -> but these
G3778 -- ta e kosnan -> are the things
G1163 -- ku boso mester -> you should
G4160 -- a hasi, -> have done
G3361 -- sin -> without
G2316 -- Dios -> of god
G3935 -- neglishá -> neglecting
G2548 -- e otronan. -> the others

11:43 "Ai di boso, fariseonan! Pasobra boso ta gusta e promé asientonan den snoa, i e saludonan di rèspèt riba plasa.

11:44 "Ai di boso, eskribanan i fariseonan, hipokrítnan! Pasobra boso ta manera grafnan ku hende no ta mira, i e hendenan ku ta kana pasa riba nan no sa mes."

11:45 I un di e ekspertonan di Lei a kontest'E, bisando: "Maestro, dor di bisa e kosnan aki Bo ta ofendé nos tambe."

11:46 Ma El a bisa: "Ai di boso tambe, ekspertonan di Lei! Pasobra boso ta pone riba hende karganan pisá pa karga, mientras ku boso mes, ni ku un dede boso no ta mishi ku e karganan ei.

11:47 "Ai di boso! Pasobra boso ta traha e monumentonan di e profetanan, i tabata boso tatanan ku a mata nan.

11:48 Asina boso ta testigunan i ta aprobá e echonan di boso tatanan; pasobra ta nan a mata nan, i boso ta traha nan tumbanan.

11:49 Pa e motibu aki tambe e sabiduria di Dios a bisa: 'Lo Mi manda profetanan i apòstelnan serka nan; i algun di nan nan lo mata i algun nan lo pèrsiguí,

11:50 asina ku e sanger di tur e profetanan, dramá desde fundashon di mundu, por wòrdu eksigí di e generashon aki,

11:51 for di e sanger di Abel te na e sanger di Zakarias, kende a peresé entre e altar i e kas di Dios; sí, Mi ta bisa boso, esaki lo wòrdu eksigí di e generashon aki.'

11:52 "Ai di boso, ekspertonan di Lei! Pasobra boso a kohe e yabi di konosementu bai kuné. Boso mes no a drenta, i esnan ku tabata drentando, boso a stroba."

11:53 I ora ku El a bai for di einan, e eskribanan i e fariseonan a kuminsá atak'E pisá i interogu'E tokante di hopi kos,

11:54 trahando kòmplòt kontra djE, pa koh'E den trampa ku algu ku E por a bisa, pa nan por a akus'E.