Search the Bible

1 Korintionan 15; 1 Korintionan 16 BSNP Edit

1 Korintionan 15

15:1 Awor, rumannan, mi ta deklará na boso e evangelio ku mi a prediká na boso, kual tambe boso a risibí, den kual tambe boso ta para,

15:2 pa medio di kual tambe boso ta salbá, si boso tene firme na e palabra ku mi a prediká na boso, a menos ku boso a kere en bano.

15:3 Pasobra na promé lugá mi a duna boso loke mi tambe a risibí, ku Cristo a muri pa nos pikánan segun e Skrituranan

15:4 i ku El a wòrdu derá, i ku El a wòrdu lantá riba e di tres dia segun e Skrituranan,

15:5 i ku El a paresé na Sefas, despues na e diesdosnan.

15:6 Despues di esei El a paresé na mas ku sinku shen ruman na e mesun tempu, di kualnan mayoria ta na bida te ainda, ma algun a muri;

15:7 despues El a paresé na Santiago, despues na tur e apòstelnan;

15:8 i por último El a paresé na mi tambe, manera na un ku a nase for di tempu.

15:9 Pasobra ami ta esun di mas menos di e apòstelnan, kende no ta digno pa wòrdu yamá apòstel, pasobra mi a pèrsiguí e iglesia di Dios.

15:10 Ma pa medio di e grasia di Dios mi ta loke mi ta, i Su grasia pa ku mi no tabata en bano; ma mi a traha mas ku nan tur, ma no ami mes, sino e grasia di Dios ku tabata ku mi.

15:11 Asina anto, sea ku tabata ami òf nan, asina nos ta prediká i asina boso a kere.

15:12 Awor si Cristo ta wòrdu prediká, ku El a wòrdu lantá for di e mortonan, kon algun di boso ta bisa ku no tin resurekshon di e mortonan?

15:13 Ma si no tin resurekshon di e mortonan, anto ni Cristo tampoko no a wòrdu lantá;

15:14 i si Cristo no a wòrdu lantá, e ora ei nos predikamentu ta bano, i boso fe tambe ta bano.

15:15 Ademas, nos ta resultá di ta testigunan falsu di Dios, pasobra nos a duna testimonio kontra Dios ku El a lanta Cristo, Kende E no a lanta, si di bèrdat e mortonan no ta wòrdu lantá.

15:16 Pasobra si e mortonan no ta wòrdu lantá, Cristo tampoko no a wòrdu lantá;

15:17 i si Cristo no a wòrdu lantá, boso fe ta sin balor; ainda boso ta den boso pikánan.

15:18 E ora ei tambe esnan ku a muri den Cristo a peresé.

15:19 Si ta den e bida aki so nos a spera den Cristo, e ora ei di tur hende nos ta esnan mas di kompadesé.

15:20 Ma awor Cristo a wòrdu lantá for di e mortonan, e promé fruta di esnan ku a muri.

15:21 Pasobra komo ku morto a bin pa medio di un hende, asina tambe pa medio di un hende a bin e resurekshon di e mortonan.

15:22 Pasobra meskos ku den Adam tur ta muri, asina tambe tur lo wòrdu hasí bibu den Cristo.

15:23 Ma kada un segun su mes orden: Cristo e promé fruta, despues di esei, esnan ku ta di Cristo na Su binida;

15:24 despues e fin ta yega, ora ku E ta entregá e reino na Dios Tata, ora ku El a pone un fin na tur dominio i na tur outoridat i poder.

15:25 Pasobra E mester reina te ora ku El a pone tur Su enemigunan bou di Su pia.

15:26 E delaster enemigu ku lo wòrdu destruí ta morto.

15:27 Pasobra El a someté tur kos bou di Su pia. Ma ora ku E bisa: "Tur kos ta wòrdu sometí," ta klaro ku ta ku eksepshon di Esun, Kende a someté tur kos na djE.

15:28 I ora tur kos ta wòrdu sometí na djE, e ora ei e Yu mes tambe lo wòrdu sometí na Esun, Kende a someté tur kos na djE, pa Dios por ta tur den tur.

15:29 Sino, kiko esnan ku ta wòrdu batisá pa e mortonan lo hasi? Si di ningun manera e mortonan no ta wòrdu lantá, pakiko nan ta wòrdu batisá pa e mortonan anto?

15:30 Pakiko nos tambe ta den peliger tur ora bai?

15:31 Mi ta sigurá boso, rumannan, pa e orguyo ku mi tin den boso den Cristo Jesus nos Señor, ku mi ta muri diariamente.

15:32 Si komo hende mi a bringa ku bestianan di mondi na Efeso, ki probecho mi tin di esei? Si e mortonan no ta wòrdu lantá, "Laga nos kome i bebe, pasobra mañan nos ta muri."

15:33 No laga hende gaña boso: "Mal kompania ta daña bon kustumber."

15:34 Uza boso sano huisio manera mester ta, i stòp di hasi piká; pasobra algun no tin konosementu di Dios. Mi ta bisa esaki pa brongosá boso.

15:35 Ma algun hende lo bisa: "Kon e mortonan ta wòrdu lantá? I ku ki sorto di kurpa nan ta bin?"

15:36 Boso, bobonan! Loke bo sembra no ta haña bida si e no muri;

15:37 i loke bo sembra, no ta e kurpa ku e lo bira bo ta sembra, ma un simpel simia, sea di trigo òf di algu otro.

15:38 Ma Dios ta dun'é un kurpa manera El a deseá, i na kada un di e simianan un kurpa di su mes.

15:39 Tur karni no ta e mesun karni, ma tin un karni di hende, i otro karni di bestia, i otro karni di parha, i otro di piská.

15:40 Tin tambe kurpanan selestial i kurpanan terenal, ma e gloria di esnan selestial ta ún, i e gloria di esnan terenal ta otro.

15:41 Tin un gloria di e solo, i un otro gloria di e luna, i un otro gloria di e streanan; pasobra esun strea ta diferente di e otro strea den gloria.

15:42 Asina e resurekshon di e mortonan tambe ta. Kurpa ta wòrdu sembrá den korupshon i ta wòrdu lantá den inkorupshon;

15:43 ta wòrdu sembrá den desonor, ta wòrdu lantá den gloria; ta wòrdu sembrá den debilidat, ta wòrdu lantá den poder;

15:44 ta wòrdu sembrá un kurpa natural, ta wòrdu lantá un kurpa spiritual. Si tin un kurpa natural, tin un kurpa spiritual tambe.

15:45 Asina tambe ta pará skirbí: "E promé hende, Adam, a bira un alma bibu." E último Adam a bira un spiritu ku ta duna bida.

15:46 Sinembargo, loke ta spiritual no ta promé, sino loke ta natural; despues loke ta spiritual.

15:47 E promé hende ta di tera, trahá di stòf; e di dos hende ta di shelu.

15:48 Manera esun trahá di stòf, esnan ku ta trahá di stòf tambe ta; i manera Esun selestial, esnan ku ta selestial tambe ta.

15:49 I meskos ku nos a karga e semehansa di e hende trahá di stòf, nos lo karga e semehansa di e Hende selestial tambe.

15:50 Awor mi ta bisa esaki, rumannan, ku karni i sanger no por eredá e reino di Dios; ni korupshon no ta eredá inkorupshon.

15:51 Mira, mi ta konta boso un misterio; nos tur lo no muri, ma nos tur lo wòrdu transformá,

15:52 den un momento, den un fregá di wowo, na e último zonidu di tròmpèt; pasobra e tròmpèt lo zona, i e mortonan lo wòrdu lantá den inkorupshon, i nos lo wòrdu transformá.

15:53 Pasobra e loke ta koruptibel aki mester wòrdu bistí ku loke ta inkoruptibel, i e loke ta mortal aki mester wòrdu bistí ku loke ta inmortal.

15:54 Ma ora e loke ta koruptibel aki bisti loke ta inkoruptibel, i e loke ta mortal aki bisti loke ta inmortal, e ora ei e palabra ku ta pará skirbí lo keda kumplí: "Morto ta tragá den viktoria.

15:55 O morto, unda bo viktoria ta? O morto, unda bo pui ta?"

15:56 E pui di morto ta piká, i e poder di piká ta lei;

15:57 ma grasia sea na Dios, Kende ta duna nos e viktoria pa medio di nos Señor Jesu-Cristo.

15:58 Pesei, mi rumannan stimá, sea firme, konstante, semper abundando den e trabou di Señor, sabiendo ku boso trabou no ta en bano den Señor.

1 Korintionan 16

16:1 Awor tokante di e ofrenda pa e santunan, boso hasi meskos ku mi a ordená e iglesianan na Galasia.

16:2 Riba e promé dia di siman laga kada un di boso pone algu un banda i spar esaki, segun ku e prosperá, pa no tin mester di rekohé ofrenda ora mi yega.

16:3 I ora mi yega, tur esnan ku boso aprobá, eseinan lo mi manda ku karta pa hiba boso donashon na Jerusalèm;

16:4 i si ta kumbiní pa mi mes bai tambe, nan lo bai huntu ku mi.

16:5 Ma lo mi bin serka boso despues ku mi pasa dor di Masedonia, pasobra mi ta bai pasa dor di Masedonia;

16:6 i kisas lo mi keda serka boso, òf asta pasa wenter, pa boso por yudami sigui mi biahe, unda ku mi bai.

16:7 Pasobra mi no kier bishitá boso awor djis di paso; pasobra mi ta spera di keda serka boso pa algun tempu, si Señor pèrmití.

16:8 Ma lo mi keda na Efeso te Pentekòste;

16:9 pasobra a habri pa mi un porta hanchu i efikas, i tin hopi atversario.

16:10 Awor si Timoteo bin, mira pa e keda serka boso sin temor, pasobra e ta hasiendo e trabou di Señor, meskos ku ami tambe.

16:11 Pesei, no laga ningun hende menospresi'é. Ma despedí di djé na pas, pa e por bin serka mi, pasobra mi ta sper'é huntu ku e rumannan.

16:12 Ma tokante di nos ruman Apolos, mi a enkurash'é mashá pa bin ku e rumannan serka boso; ma di ningun manera no tabata su deseo pa bin awor, ma e lo bin ora ku e tin oportunidat.

16:13 Sea alerta, para firme den fe, aktua manera hòmber, sea fuerte.

16:14 Laga tur loke boso hasi wòrdu hasí ku amor.

16:15 Awor mi ta roga boso, rumannan (boso konosé e hendenan di kas di Stéfanas, ku nan tabata e promé frutanan di Akaya, i ku nan a dediká nan mes na e sirbishi di e santunan),

16:16 pa boso tambe sea sometí na hòmbernan asina i na tur ku ta yuda den e obra, i ku ta traha.

16:17 I mi ta regosihá den e binida di Stéfanas i Fortunato i Akaiko, pasobra nan a kompletá loke tabata falta di boso parti.

16:18 Pasobra nan a refreská mi spiritu i esun di boso. Pesei, rekonosé hòmbernan asina.

16:19 E iglesianan di Asia ta saludá boso. Akila i Prisila ta manda un kordial saludo pa boso den Señor, huntu ku e iglesia ku ta na nan kas.

16:20 Tur e rumannan ta saludá boso. Saludá otro ku un sunchi santu.

16:21 E saludo aki ta skirbí ku mi propio man--Pablo.

16:22 Si tin hende ku no ta stima Señor, lagu'é ta maldishoná. Maranata.

16:23 E grasia di Señor Jesu-Cristo sea ku boso.

16:24 Mi amor sea ku boso tur den Cristo Jesus. Amèn.